କଟକ: ନିକଟରେ ବାଲେଶ୍ୱରର ବାହାନଗାରେ ଘଟିଥିବା ରେଳ ଦୁର୍ଘଟଣାକୁ ଦେଶର ସବୁଠାରୁ ଭୟଙ୍କର ଦୁର୍ଘଟଣା ଭାବେ ରେକର୍ଡ କରାଯାଇଛି। ଏହି ଦୁର୍ଘଟଣାରେ ୨୮୮ ଜଣଙ୍କ ଜୀବନ ଯାଇଛି ଏବଂ ୧୦୦୦ରୁ ଅଧିକ ଆହତ ହୋଇଛନ୍ତି। ବର୍ତ୍ତମାନ ପଶ୍ଚିମବଙ୍ଗ, ବିହାର, ଆନ୍ଧ୍ରପ୍ରଦେଶ, ଓଡ଼ିଶା ସମେତ ବିଭିନ୍ନ ରାଜ୍ୟରୁ ଆସିଥିବା ୧୧୧ ଜଣ ଯାତ୍ରୀ କଟକ ଏସସିବି ମେଡିକାଲ କଲେଜ ଓ ହସ୍ପିଟାଲର ବିଭିନ୍ନ ବିଭାଗରେ ଚିକିତ୍ସିତ ହେଉଛନ୍ତି।
ଚିକିତ୍ସିତ ହେଉଥିବା ଯାତ୍ରୀମାନଙ୍କ ମଧ୍ୟରୁ ପ୍ରାୟ ୨୦ ଜଣ ଯାତ୍ରୀଙ୍କୁ ଏସସିବିର ବିଭିନ୍ନ ବିଭାଗରେ ଥିବା ଆଇସିୟୁରେ ଆବଶ୍ୟକ ଚିକିତ୍ସା ସେବା ଯୋଗାଇ ଦିଆଯାଉଛି ବୋଲି ହସ୍ପିଟାଲ କର୍ତ୍ତୃପକ୍ଷ ଅଭିନାଶ ରାଉତ ସୂଚନା ଦେଇଛନ୍ତି। ଓଡ଼ିଶାର ୨୩, ବିହାରର ୩୨, ପଶ୍ଚିମବଙ୍ଗର ୪୫, ଝାଡଖଣ୍ଡର ୭ ଏବଂ ମଧ୍ୟପ୍ରଦେଶ, ତାମିଲନାଡୁ ଓ ନେପାଳର ଜଣେ ଲେଖାଏଁ ରୋଗୀ ରହିଛନ୍ତି। ସେମାନେ ଏସସିବିର ସର୍ଜରୀ, ଅର୍ଥୋପେଡିକ୍ସ, ପ୍ଲାଷ୍ଟିକ ସର୍ଜରୀ ଭଳି ବିଭାଗରେ ଚିକିତ୍ସିତ ହେଉଛନ୍ତି।
ଆଇସିୟୁରେ ଥିବା ରୋଗୀଙ୍କ ସମ୍ପର୍କରେ ସୂଚନା ଦେଇ ଶ୍ରୀ ରାଉତ କହିଛନ୍ତି ଯେ ସେଣ୍ଟ୍ରାଲ ଆଇସିୟୁରେ ୯ ଜଣ ଓ ଟ୍ରମା ଆଇସିୟୁରେ ୮ ଜଣ ସମେତ ୨୦ ଜଣଙ୍କ ଅବସ୍ଥା ସ୍ଥିର ରହିଛି। ଆଇସିୟୁରେ ଚିକିତ୍ସିତ ହେଉଥିବା ଜଣେ ରୋଗୀଙ୍କ ପରିଚୟ ନିର୍ଦ୍ଧାରଣ କରାଯାଇଛି। ଏଥିସହିତ ହସ୍ପିଟାଲରେ ୬୩ ଜଣ ଯାତ୍ରୀଙ୍କ ଅସ୍ତ୍ରୋପଚାର ହୋଇସାରିଛି ବୋଲି ଶ୍ରୀ ରାଉତ ଉଲ୍ଲେଖ କରିଛନ୍ତି।
ଏହି ଦୁଃଖଦ ଘଟଣା ସମଗ୍ର ଦେଶରେ ଗଭୀର ଶୋକ ଓ ଚିନ୍ତା ସୃଷ୍ଟି କରିଛି। ଦୁର୍ଘଟଣାଗ୍ରସ୍ତଙ୍କୁ ଉତ୍ତମ ଚିକିତ୍ସା ସେବା ଓ ସହାୟତା ଯୋଗାଇ ଦେବାକୁ ଉଦ୍ୟମ ଜାରି ରହିଛି। ଏସସିବି ମେଡିକାଲ କଲେଜ ଓ ହସ୍ପିଟାଲର ଡାକ୍ତରୀ ଦଳ ଓ କର୍ମଚାରୀମାନେ ନିଷ୍ଠାର ସହ କାମ କରି ଆହତ ଯାତ୍ରୀଙ୍କ ଆରୋଗ୍ୟ ଓ ସୁସ୍ଥତା ପାଇଁ ଉଦ୍ୟମ ଜାରି ରଖିଛନ୍ତି।
Comments are closed.