ଯାଜପୁର: କାଳିଆପାଣି ଥାନା ସୁକୁରଙ୍ଗି ଅଞ୍ଚଳରେ ୨ ଶିଶୁକନ୍ୟାଙ୍କୁ ସ୍ଥାନୀୟ ଅଞ୍ଚଳର ଜଣେ ଯୁବକ ଦୁଷ୍କର୍ମ କରିଥିବା ଅଭିଯୋଗ। ଅଭିଯୋଗ କ୍ରମେ
ଅଭିଯୁକ୍ତକୁ ଗିରଫ କଲା କାଳିଆପାଣି ଥାନା ପୋଲିସ। ଅଭିଯୁକ୍ତ ଜଣକ ସ୍ଥାନୀୟ ଅଞ୍ଚଳର କ୍ଷେତ୍ରବାସୀ ଦେହୁରୀଙ୍କ ପୁଅ ରତ୍ନାକର ଦେହୁରୀ ବୋଲି ଜଣାପଡିଛି।
ସୂଚନା ମୁତାବକ ପ୍ରଥମ ଶ୍ରେଣୀରେ ପଢ଼ୁଥିବା ୨ ଶିଶୁକନ୍ୟା ସ୍କୁଲରୁ ଫେରି ନିଜ ଘର ନିକଟରେ ଖେଳୁଥିଲେ। ଗାଁ ପାଖ ପୋଖରୀରେ ମାଛ ଦେଖାଇବାକୁ କହି ଅଭିଯୁକ୍ତ ଜଣକ ୨ ନାବାଳିକାଙ୍କୁ ପୋଖରୀ ନିକଟକୁ ଡାକି ନେଇଥିଲା। ସେଠାରେ ଅଭିଯୁକ୍ତ ଜଣକ ଉଭୟ ନାବାଳିକାଙ୍କୁ ଜଣକ ପରେ ଅନ୍ୟଜଣଙ୍କୁ ଦୁଷ୍କର୍ମ କରିଥିଲା। କିଛି ସମୟ ପରେ ନାବାଳିକା ଦ୍ବୟ ପୋଖରୀ ପାଖରେ କାନ୍ଦୁଥିବା ସ୍ଥାନୀୟ ଲୋକେ ଦେଖି ପରିବାର ଲୋକଙ୍କୁ ଖବର ଦେଇଥିଲେ। ପରିବାର ଲୋକେ ଆହତ ଅବସ୍ଥାରେ ୨ ନାବାଳିକାଙ୍କୁ ଘରକୁ ନେଇ ସେମାନଙ୍କଠାରୁ ପୁରା ଘଟଣା ଶୁଣିବା ପରେ ପୋଲିସକୁ ଖବର ଦେଇଥିଲେ।
କାଳିଆପାଣି ପୋଲିସ ଖବର ପାଇ ଘଟଣାସ୍ଥଳରେ ପହଞ୍ଚି ୨ ନାବାଳିକାଙ୍କୁ ଚିକିତ୍ସା ନିମନ୍ତେ ମେଡିକାଲ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଥିଲା। ପରେ ଆତ୍ମଗୋପନ କରିଥିବା ଅଭିଯୁକ୍ତକୁ ପୋଲିସ ତା’ଘରୁ ଉଠାଇ ଆଣିଥିଲା। ଏ ସଂକ୍ରାନ୍ତରେ ଆଜି କାଳିଆପାଣି ଥାନାରେ କେସ୍ ନଂ ୭୭/୨୩ ରେ ଏକ ମାମଲା ରୁଜୁ କରାଯାଇ ଅଭିଯୁକ୍ତକୁ କୋର୍ଟ ଚାଲାଣ କରାଯାଇଛି।
Comments are closed.