ନୂଆଦିଲ୍ଲୀ: ଭାରତରେ ପ୍ରତିବର୍ଷ ୨ ଅକ୍ଟୋବର, ଗାନ୍ଧୀ ଜୟନ୍ତୀ ଦିନ ମଦ ବିକ୍ରି ଉପରେ କଟକଣା ଲଗାଯାଇଥାଏ। ଏହି ଦିନଟିକୁ ‘ଡ୍ରାଇ ଡେ’ ବୋଲି କୁହାଯାଏ, ଯେତେବେଳେ ପୂରା ଦେଶରେ ମଦ ଦୋକାନ, ବାର ଓ ମଦ ଦେଉଥିବା ରେଷ୍ଟୁରାଣ୍ଟ ବନ୍ଦ ରହିଥାଏ। କିନ୍ତୁ ଅନେକ ସମୟରେ ପ୍ରଶ୍ନ ଉଠିଥାଏ ଯେ, ଯେଉଁପରି ଭାରତରେ ୨ ଅକ୍ଟୋବର କିମ୍ବା ବିଶେଷ ଦିନମାନଙ୍କରେ ‘ଡ୍ରାଇ ଡେ’ ଘୋଷଣା କରାଯାଏ, ତେବେ କ’ଣ ବିଦେଶରେ ମଧ୍ୟ ଖାସ୍ ଅବସରରେ ମଦ ଦୋକାନ ବନ୍ଦ ରହିଥାଏ? ଆସନ୍ତୁ ଆଜି ଆମେ ଆପଣଙ୍କୁ କହିବୁ, କେଉଁ ଦେଶମାନଙ୍କରେ ଖାସ୍ ଅବସରରେ ମଦ ଦୋକାନ ବନ୍ଦ ରହିଥାଏ।
ଶ୍ରୀଲଙ୍କାରେ ପୋୟା ଦିବସରେ ମଦ ଦୋକାନ ବନ୍ଦ
ଶ୍ରୀଲଙ୍କାରେ ପୂର୍ଣ୍ଣିମା ଦିନ, ଅର୍ଥାତ୍ ‘ପୋୟା ଡେ’ରେ ମଦ ବିକ୍ରି ଉପରେ କଡ଼ା କଟକଣା ଲାଗୁ ହୋଇଥାଏ। ଏହି ଦିନମାନଙ୍କରେ ଅଧିକାଂଶ ବାର, ରେଷ୍ଟୁରାଣ୍ଟ ଓ ମଦ ଦୋକାନ ବନ୍ଦ ରହିଥାଏ। ଏହା ବ୍ୟତୀତ, କିଛି ସରକାରୀ ଛୁଟି ଦିନରେ ମଧ୍ୟ ଶ୍ରୀଲଙ୍କାରେ ମଦ ବିକ୍ରି ଉପରେ କଟକଣା ଲାଗୁ ହୋଇଥାଏ। ଏହି ଦିନମାନଙ୍କରେ କେବଳ କିଛି ହୋଟେଲ ପର୍ଯ୍ୟଟକମାନଙ୍କ ପାଇଁ ମଦ ପରଷିଥାଏ।
ଫିଲିପାଇନ୍ସରେ ନିର୍ବାଚନ ସମୟରେ ମଦ ଦୋକାନ ବନ୍ଦ
ଫିଲିପାଇନ୍ସରେ ନିର୍ବାଚନ ଦିନ ଓ ଏହାର ଗୋଟିଏ ଦିନ ପୂର୍ବରୁ ମଦ ବିକ୍ରି ଉପରେ କଟକଣା ଲାଗୁ ହୋଇଥାଏ। ତେବେ, ଏହି ନିର୍ବାଚନୀ ଦିନମାନଙ୍କରେ ବିଦେଶୀ ପର୍ଯ୍ୟଟକମାନଙ୍କୁ କେବଳ ଲାଇସେନ୍ସପ୍ରାପ୍ତ ହୋଟେଲଗୁଡ଼ିକରେ ମଦ ପିଇବାର ଅନୁମତି ମିଳିଥାଏ।
ଡେନମାର୍କରେ ମଧ୍ୟ ଖାସ୍ ଦିନ ମଦ ଦୋକାନ ବନ୍ଦ
ଡେନମାର୍କରେ ମଧ୍ୟ ଉତ୍ସବ ସମୟରେ କିମ୍ବା କିଛି ସାର୍ବଜନୀନ ଅବସରରେ ମଦ ଦୋକାନଗୁଡ଼ିକୁ ଶୀଘ୍ର ବନ୍ଦ କରାଯାଇଥାଏ। ଏହି ଦିନମାନଙ୍କରେ ଡେନମାର୍କର ଅନେକ ସ୍ଥାନରେ ମଦ ଦୋକାନ ପୁରା ଦିନ ବନ୍ଦ ରହିଥାଏ। ଖ୍ରୀଷ୍ଟମାସ ଓ ନୂଆ ବର୍ଷ ଦିନମାନଙ୍କରେ ମଦ ଦୋକାନ ସହ ସମସ୍ତ ଦୋକାନ ଶୀଘ୍ର ବନ୍ଦ ହୋଇଯାଇଥାଏ।
Comments are closed.