କାଠମାଣ୍ଡୁ: ନେପାଳରେ ଶୁକ୍ରବାର ବିଳମ୍ବିତ ରାତିରେ ୬.୪ ତୀବ୍ରତାର ଭୂକମ୍ପରେ ୨୪ ଜଣଙ୍କ ମୃତ୍ୟୁ ଘଟିଛି। ଜାତୀୟ ଭୂକମ୍ପ ମାପନ କେନ୍ଦ୍ରର ଅଧିକାରୀଙ୍କ କହିବାନୁସାରେ, ଜାଜରକୋଟ ଜିଲ୍ଲାର ଲମିଦଣ୍ଡା ଅଞ୍ଚଳରେ ଏହି ଭୂକମ୍ପର କେନ୍ଦ୍ରସ୍ଥଳ ଥିଲା। ଗୃହ ମନ୍ତ୍ରାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଉଦ୍ଧାର ହୋଇଥିବା ୨୪ ଜଣଙ୍କ ମଧ୍ୟରୁ ୧୦ ଜଣ ଜାଜରକୋଟ ଏବଂ ୧୪ ଜଣ ପଶ୍ଚିମ ରୁକୁମ ଜିଲ୍ଲାର ବୋଲି ଜଣାପଡ଼ିଛି। ମୃତକଙ୍କ ମଧ୍ୟରେ ଗୋଟିଏ ପରିବାରର ଜଣେ ମହିଳା ଓ ଜଣେ ଶିଶୁ ମଧ୍ୟ ଅଛନ୍ତି।
ମନ୍ତ୍ରଣାଳୟ କହିଛି ଯେ ବିଭିନ୍ନ ଜିଲ୍ଲାରୁ ଏବେ ଆହତ ଏବଂ ସମ୍ପତ୍ତି ନଷ୍ଟ ହେବାର ଖବର ଆସୁଛି। ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଜାଜରକୋଟ କାଠମାଣ୍ଡୁର ପଶ୍ଚିମରେ ପ୍ରାୟ ୫୦୦ କିଲୋମିଟର ଦୂରରେ ଅବସ୍ଥିତ।
ଉଲ୍ଲେଖଯୋଗ୍ୟ, ହିମାଳୟ ପାଦଦେଶ ନେପାଳରେ ଭୂମିକମ୍ପ ହେବା ଏକ ସାଧାରଣ କଥା। ଅକ୍ଟୋବର ୩ ତାରିଖରେ ଦିଲ୍ଲୀ-ଏନସିଆର ଅଞ୍ଚଳ ସମେତ ଉତ୍ତର ଭାରତର କେତେକ ଅଞ୍ଚଳରେ କ୍ରମାଗତ ଭାବେ ୬.୨ ତୀବ୍ରତାର ଭୂକମ୍ପ ଅନୁଭୂତ ହୋଇଥିଲା।
ବର୍ଷକ ପୂର୍ବେ, ୨୦୨୨ ନଭେମ୍ବରରେ ନେପାଳର ଡୋଟି ଜିଲ୍ଲାରେ ୬.୩ ତୀବ୍ରତାର ଭୂକମ୍ପରେ ୬ ଜଣଙ୍କର ମୃତ୍ୟୁ ହୋଇଥିଲା। ଦେଶକୁ ଥରାଇ ଦେଉଥିବା ଭୂମିକମ୍ପର ଏକ ସିରିଜ୍ ମଧ୍ୟରେ ଏହା ମଧ୍ୟ ଥିଲା। ୨୦୧୫ରେ ୭.୮ ତୀବ୍ରତାର ଭୂକମ୍ପରେ ଏହି ପାର୍ବତ୍ୟ ଦେଶରେ ୧୨ ହଜାରରୁ ଅଧିକ ଲୋକ ପ୍ରାଣ ହରାଇଥିଲେ ଏବଂ ପ୍ରାୟ ୧ ନିୟୁତ କୋଠା କ୍ଷତିଗ୍ରସ୍ତ ହୋଇଥିଲା।