ମୁମ୍ବାଇ: ମହାରାଷ୍ଟ୍ରର ଗଡଚିରୋଲି ଜଙ୍ଗଲରେ ନକ୍ସଲ ଏବଂ ସୁରକ୍ଷା ବାହିନୀ ମଧ୍ୟରେ ଏକ ଗୁଳିବିନିମୟ ହୋଇଛି। ସୁରକ୍ଷାବାହିନୀର ଏନକାଉଣ୍ଟରରେ ୩ ନକ୍ସଲଙ୍କ ମୃତ୍ୟୁ ଘଟିଛି। ହତ୍ୟାର ଶିକାର ନକ୍ସଲମାନଙ୍କ ଉପରେ ୩୬ ଲକ୍ଷ ଟଙ୍କା ପୁରସ୍କାର ଘୋଷଣା କରାଯାଇଥିଲା। ଭାମରାଗର ତାଲୁକାରେ ସି୬୦ କମାଣ୍ଡୋ ଏବଂ ନକ୍ସଲମାନଙ୍କ ମଧ୍ୟରେ ଏହି ଗୁଳିବିନିମୟ ହୋଇଥିଲା। ସଂଧ୍ୟା ସମୟରେ ହୋଇଥିବା ଏହି ଗୁଳିବିନିମୟ ବେଳେ ପ୍ରବଳ ବର୍ଷା ହୋଇଥିଲା। ଗଡଚିରୋଲି ଏସପି ଏହି ସୂଚନା ଦେଇଛନ୍ତି।
ପାଟ୍ରୋଲିଂ ଟିମ୍ ନକ୍ସଲମାନଙ୍କ ଉପସ୍ଥିତି ବିଷୟରେ ସୂଚନା ପାଇଥିଲେ। ଏହା ପରେ ସଂପୃକ୍ତ ଟିମ୍ ଘଟଣାସ୍ଥଳରେ ପହଞ୍ଚିବା ମାତ୍ରେ ନକ୍ସଲମାନେ ସେମାନଙ୍କ ଉପରକୁ ଗୁଳି ଚଳାଇଥିଲେ। ପ୍ରତିଶୋଧ ପରାୟଣ ହୋଇ ଗୁଳି ଚଳାଇଥିଲେ ଆଉ ସୁରକ୍ଷା ବାହିନୀଙ୍କ ପାଲଟା ଗୁଳିମାଡରେ ୩ ନକ୍ସଲଙ୍କ ମୃତ୍ୟୁ ଘଟିଛି। ବାକି ନକ୍ସଲମାନେ ଅନ୍ଧାରର ସୁଯୋଗ ନେଇ ପଳାଇ ଯାଇଥିଲେ। ସଂଧ୍ୟା ପ୍ରାୟ ୭ଟା ସମୟରେ ଏହି ଏନକାଉଣ୍ଟର ହୋଇଥିଲା।
ଉଲ୍ଲେଖଯୋଗ୍ଯ, ଛତିଶଗଡ ଦନ୍ତେଓ୍ୱାଡାର ନକ୍ସଲ ଆକ୍ରମଣ ପରେ କମାଣ୍ଡୋ ଏବଂ ସ୍ଥାନୀୟ ପୋଲିସ ମହାରାଷ୍ଟ୍ର ସୀମାରେ ସତର୍କ ରହିଛନ୍ତି। ବର୍ତ୍ତମାନ ସୁଦ୍ଧା ଜଙ୍ଗଲରେ ସର୍ଚ୍ଚ ଅପରେସନ ଚାଲିଛି। ବହୁ ପରିମାଣରେ ଅସ୍ତ୍ରଶସ୍ତ୍ର ଏବଂ ଅନ୍ୟାନ୍ୟ ସାମଗ୍ରୀ ଉଦ୍ଧାର କରାଯାଇଛି।
Comments are closed.