ଭୁବନେଶ୍ୱର: ମାଲକାନଗିରି, ନବରଙ୍ଗପୁର ଓ କୋରାପୁଟ ଜିଲ୍ଲା ଗସ୍ତ କରି ବିଭିନ୍ନ ଉନ୍ନୟନମୂଳକ କାର୍ଯ୍ୟର ଅଗ୍ରଗତି ସମୀକ୍ଷା କରିବା ସହ ଜନସାଧାରଣଙ୍କ ସହ ଆଲୋଚନା କରିଛନ୍ତି ୫ଟି ଓ ନବୀନ ଓଡ଼ିଶାର ଅଧ୍ୟକ୍ଷ ଭିକେ ପାଣ୍ଡିଆନ।
ନବରଙ୍ଗପୁର ଜିଲ୍ଲାର ତେନ୍ତୁଳିଖୁଣ୍ଟି, କୋଷାଗୁମୁଡା, ଝରିଗାଁ ଓ ରାଇଘର ବ୍ଲକ, କୋରାପୁଟର ବନ୍ଧୁଗାଁ ଓ ନାରାୟଣପାଟଣା ବ୍ଲକ ଏବଂ ମାଲକାନଗିରିର ଚିତ୍ରକୋଣ୍ଡା ବ୍ଲକରେ ସରକାର ନୂତନ ଡିଗ୍ରୀ କଲେଜ ମଞ୍ଜୁର କରିଛନ୍ତି। ୨୦୨୪-୨୫ ଶିକ୍ଷାବର୍ଷରୁ ଏହି ସବୁ କଲେଜ କାର୍ଯ୍ୟକ୍ଷମ ହେବ ବୋଲି ସେ ଘୋଷଣା କରିଛନ୍ତି।
ନବରଙ୍ଗପୁରରେ ୪୮,୫୦୦ ଏକର ଜମିକୁ ଜଳସେଚନ ଯୋଗାଇବା ପାଇଁ ୧୨୭୨ କୋଟି ଟଙ୍କା ବ୍ୟୟରେ ଆରମ୍ଭ ହୋଇଥିବା ପାର୍ବତୀ ଗିରି ମେଗା ଉଠା ଜଳସେଚନ ପ୍ରକଳ୍ପ ଏବଂ ୨୨,୫୦୦ ଏକର ଜମିକୁ ଜଳସେଚନ ସୁବିଧା ପାଇଁ ୫୭୭ କୋଟି ଟଙ୍କା ବ୍ୟୟରେ ତୁରୀ-ଗୁଣ ଜଳସେଚନ ପ୍ରକଳ୍ପର ଅଗ୍ରଗତି ସମୀକ୍ଷା କରିଛନ୍ତି।
ନବରଙ୍ଗପୁର ଜିଲ୍ଲାର ବିଭିନ୍ନ ସ୍ଥାନରେ ସାଢ଼େ ୨୫ କୋଟି ଟଙ୍କା ବ୍ୟୟରେ ଚାଲିଥିବା ପର୍ଯ୍ୟଟନ ଭିତ୍ତିଭୂମି ବିକାଶର ଅଗ୍ରଗତିର ସମୀକ୍ଷା କରିଥିଲେ।
ନବରଙ୍ଗପୁରର ରାଇଘର ଷ୍ଟାଡିୟମ ଓ କୋରାପୁଟର ଲକ୍ଷ୍ମୀପୁରରେ ଥିବା ରେଲୱେ ଗ୍ରାଉଣ୍ଡରେ ଜନସାଧାରଣଙ୍କ ସହ ଆଲୋଚନା କରିବା ସହ ଜନସାଧାରଣଙ୍କ ଠାରୁ ବିଭିନ୍ନ ସମସ୍ୟା ସମ୍ପର୍କରେ ଅଭିଯୋଗ ଗ୍ରହଣ କରିଥିଲେ।
ମାଲକାନଗିରି ଜିଲ୍ଲାର ସପ୍ତଧାରା ଓ ଗରିଆ ନଦୀ ଉପରେ ଗୋବିନ୍ଦପଲ୍ଲୀ ସମନ୍ବିତ ଜଳସେଚନ ପ୍ରକଳ୍ପର ଅଗ୍ରଗତି ସମୀକ୍ଷା କରି ପାଣ୍ଡିଆନ ମାଲକାନଗିରି, ମାଥିଲି, ଖଇରପୁଟ ଓ କୋରକୁଣ୍ଡା ବ୍ଲକରେ ୯୨,୮୧୫ ଏକର ଜମିକୁ ଜଳସେଚନ ସୁବିଧା ଯୋଗାଇ ଦେବେ ବୋଲି ପ୍ରତିଶ୍ରୁତି ଦେଇଛନ୍ତି। ଶେଷ ଥର ପାଇଁ ୨୦୨୩ ମାର୍ଚ୍ଚ ୨୮ତାରିଖରେ ମାଲକାନଗିରି ଗସ୍ତ ସମୟରେ ଲୋକେ ଏହି ପ୍ରକଳ୍ପ ପାଇଁ ଅନୁରୋଧ କରିଥିଲେ। ଏହାକୁ ଆଧାର କରି ୪ ହଜାର କୋଟି ଟଙ୍କାର ଡିପିଆର୍ ପ୍ରସ୍ତୁତ କରାଯାଇଛି ବୋଲି ସେ କହିଛନ୍ତି।
କୋରାପୁଟରେ ପାଣ୍ଡିଆନ ୨୦.୨ କୋଟି ଟଙ୍କା ବ୍ୟୟରେ ବୈପାରିଗୁଡାସ୍ଥିତ ଗୁପ୍ତେଶ୍ୱର ମନ୍ଦିର ଓ ୧୦୦ କୋଟି ଟଙ୍କା ବ୍ୟୟରେ ଝଞ୍ଜାବତୀ ନଦୀ ବ୍ୟାରେଜର ୪୭୨୦ ଏକର ଜମିକୁ ଜଳସେଚନ କରିବାର ଅଗ୍ରଗତି ସମୀକ୍ଷା କରିଥିଲେ।