ଭବାନୀପାଟଣା: କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ ଅନ୍ତର୍ଗତ ବିମଳା ଗ୍ରାମରେ ବୁଧବାର ଦିନ ଲଗାଣ ବର୍ଷାରେ ଏକ ଘର ଭୁଶୁଡି ପଡିବାରୁ ୬ ଜଣ ଆହତ ହୋଇଛନ୍ତି। ମିଳିଥିବା ସୂଚନା ଅନୁଯାୟୀ, ଆହତଙ୍କ ମଧ୍ୟରେ ଘର ନିକଟରେ ଖେଳୁଥିବା ପାଞ୍ଚ ଜଣ ଶିଶୁ ଥିବା ବେଳେ ଏହା ସେମାନଙ୍କ ଉପରେ ଭୁଶୁଡ଼ି ପଡ଼ିଥିଲା।
ଆହତମାନଙ୍କୁ ତୁରନ୍ତ ଜୟପାଟଣା ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି। ପରେ ଜଣେ ଆହତ ଶିଶୁଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଭବାନୀପାଟଣା ମେଡିକାଲକୁ ସ୍ଥାନାନ୍ତର କରାଯାଇଛି।
ରାୟଗଡା ଜିଲ୍ଲାର କଲ୍ୟାଣସିଂହପୁର ଠାରେ ଥିବା ଶିବ ମନ୍ଦିର ନିକଟରେ ଥିବା ନାଗାବଳୀ ନଦୀ ଉପରେ ନିର୍ମିତ ଏକ ପୋଲର ଆପ୍ରୋଚ୍ ରୋଡ୍ ବର୍ଷା ଯୋଗୁଁ ଭୁଶୁଡ଼ି ପଡ଼ିଛି। ରାସ୍ତା ଧସିବା ଫଳରେ ପୋଲ ଦେଇ ଯୋଗାଯୋଗ ବ୍ୟାହତ ହୋଇଛି। ଗତ ୨୪ ଘଣ୍ଟା ମଧ୍ୟରେ ରାୟଗଡା ଜିଲ୍ଲାରେ ୪୪୭ ମିଲିମିଟର ବର୍ଷା ରେକର୍ଡ କରାଯାଇଥିବା ବେଳେ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡିଛି।
ଜିଲ୍ଲାର ମୁଖ୍ୟ ନଦୀ ବଂଶଧାରା, ନାଗାବଳୀ, କଲ୍ୟାଣୀ, ଝାଞ୍ଜବାଟି ସମେତ ଅଧିକାଂଶ ନଦୀରେ ବନ୍ୟାଜଳ ପ୍ରବାହିତ ହେଉଛି।