ରାଜ୍ୟର ୬ ଜିଲ୍ଲାରେ ୬୦% କରୋନା ଆକ୍ଟିଭ୍ କେସ୍

ଭୁବନେଶ୍ୱର: ରାଜ୍ୟରେ ୭ ହଜାର ଛୁଇଁବ କରୋନା ପଜିଟିଭ୍ କେସ୍ । ସୁସ୍ଥ ହୋଇଛନ୍ତି ୪ ହଜାର ୭୪୩ । ଆଶ୍ୱସ୍ତିକର ଖବର ହେଉଛି ରାଜ୍ୟର ୬୯ ପ୍ରତିଶତ କରୋନା ଆକ୍ରାନ୍ତ ସୁସ୍ଥ ହୋଇ ସାରିଛନ୍ତି । ଏବେ ବିଭିନ୍ନ କୋଭିଡ୍ ହସ୍ପିଟାଲରେ ଚିକିତ୍ସାଧୀନ ଅଛନ୍ତି ୨ ହଜାର ୮୬ ଭୂତାଣୁ ସଂକ୍ରମିତ । କିନ୍ତୁ ଚିନ୍ତାଜନକ ପ୍ରସଙ୍ଗ ହେଉଛି, ରାଜ୍ୟର ମୋଟ୍ ଆକ୍ଟିଭ୍ କେସର ଅଧାରୁ ଅଧିକ କେବଳ ୬ଟି ଜିଲ୍ଲାର ଭୂତାଣୁ ସଂକ୍ରମିତ ଅଛନ୍ତି ।
୬ ଜିଲ୍ଲା, ୬୦% ଆକ୍ଟିଭ୍ କେସ୍
ଅଧିକ ପ୍ରଭାବିତ ୬ଟି ଜିଲ୍ଲାରେ ତିନି ଅଙ୍କ ଉପରେ ରହିଛି ଆକ୍ଟିଭ୍ କେସ୍ । ସେସବୁ ଜିଲ୍ଲାଗୁଡ଼ିକ ହେଲା ଗଞ୍ଜାମ, ଖୋର୍ଦ୍ଧା, କଟକ, ଯାଜପୁର, ଗଜପତି ଓ ଜଗତସିଂହପୁର । ଏହି ଜିଲ୍ଲାଗୁଡ଼ିକରୁ ୧ ହଜାର ୨୬୮ ଆକ୍ରାନ୍ତ କୋଭିଡ୍ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଅର୍ଥାତ୍ ମୋଟ୍ ଆକ୍ଟିଭ୍ କେସରେ ୬୦ ପ୍ରତିଶତ କେବଳ ୬ଟି ଜିଲ୍ଲାର ଅଛନ୍ତି ।

ଗଞ୍ଜାମ ଜିଲ୍ଲାରେ ସର୍ବାଧିକ ୪୬୩ଟି ଆକ୍ଟିଭ୍ କେସ ରହିଥିବା ବେଳେ ଖୋର୍ଦ୍ଧାରେ ୨୩୪, କଟକ ୧୨୧, ଯାଜପୁର ୧୩୫, ଗଜପତି ୩୦୨ ଓ ଜଗତସିଂହପୁର ଜିଲ୍ଲାରେ ୧୧୨ ସକ୍ରିୟ କରୋନା ମାମଲା ରହିଛି । ସେହିପରି ୫୦ରୁ ୧୦୦ଭିତରେ ଚାରିଟି ଜିଲ୍ଲାରେ ଆକ୍ଟିଭ୍ କେସ ରହିଥିବା ବେଳେ ୧୦ରୁ ୫୦ ଆକ୍ଟିଭ କେସ୍ ଭିତରେ ୧୫ଟି ଜିଲ୍ଲା ଆସୁଛି । ବାକି ୫ଟି ଜିଲ୍ଲାରେ ୧୦ ଭିତରେ ରହିଛି ଆକ୍ଟିଭ୍ କେସ ।