ଆସନ୍ତାକାଲି ୬୮ ତମ ଜାତୀୟ ରେଳ ପୁରସ୍କାର ପ୍ରଦାନ କରିବେ କେନ୍ଦ୍ର ରେଳ ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ
ଉଲ୍ଲେଖନୀୟ ସେବା / ସର୍ବୋତ୍ତମ ପ୍ରଦର୍ଶନ ପାଇଁ ରେଳ କର୍ମଚାରୀ / ଜୋନାଲ ରେଳବାଇ / ପିଏସୟୁକୁ ପୁରସ୍କାର / ଶିଲ୍ଡ ପ୍ରଦାନ କରିବେ ଶ୍ରୀ ଅଶ୍ୱିନୀ ବୈଷ୍ଣବ | ପୂର୍ବତଟ ରେଳପଥକୁ 2 ଟି ଦକ୍ଷତା ଶିଲ୍ଡ ଏବଂ ଗୋଟିଏ ବ୍ୟକ୍ତିଗତ ପୁରସ୍କାର |
ନୂଆଦିଲ୍ଲୀ: ପ୍ରଦାନ କରାଯିବ ୬୮ତମ ଜାତୀୟ ରେଳ ପୁରସ୍କାର । ଆସନ୍ତାକାଲି ନୂଆଦିଲ୍ଲୀ ସ୍ଥିତ ଭାରତ ମଣ୍ଡପମ୍ ଠାରେ ଏହି ପୁରସ୍କାର ପ୍ରଦାନ କରିବେ କେନ୍ଦ୍ର ରେଳ, ଯୋଗାଯୋଗ ଏବଂ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ । କର୍ମଚାରୀଙ୍କ ମଧ୍ୟରେ ସର୍ବୋତ୍ତମ ଅଭ୍ୟାସକୁ ପ୍ରୋତ୍ସାହିତ କରିବା ପାଇଁ ଶ୍ରେଷ୍ଠ ପ୍ରଦର୍ଶନ କରୁଥିବା ରେଳ କର୍ମଚାରୀଙ୍କୁ ପୁରସ୍କାର ସହିତ ଜୋନାଲ ରେଳବାଇକୁ ଶିଲ୍ଡ ପ୍ରଦାନ କରିବେ କେନ୍ଦ୍ରମନ୍ତ୍ରୀ |
ଏହି ଅବସରରେ ନିର୍ଦ୍ଦିଷ୍ଟ କ୍ଷେତ୍ରରେ ସର୍ବୋତ୍ତମ ପ୍ରଦର୍ଶନ ପାଇଁ ଜୋନାଲ ରେଳବାଇ / ପିଏସୟୁର ଶିଲ୍ଡଗୁଡିକ ମଧ୍ୟ ପୁରସ୍କୃତ ହେବେ | ରେଳ, କୋଇଲା ଏବଂ ଖଣି ରାଷ୍ଟ୍ର ମନ୍ତ୍ରୀ ଶ୍ରୀ ରାଓସାହେବ ପାଟିଲ ଦାନଭେ ଏବଂ ରେଳ ଓ ବୟନ ରାଷ୍ଟ୍ର ମନ୍ତ୍ରୀ ଶ୍ରୀମତୀ ଦର୍ଶନା ଜାରଡୋଶ ସମ୍ମାନିତ ଅତିଥି ଭାବେ ଏହି ଅବସରରେ ଯୋଗଦାନ କରିବେ | ଏହି କାର୍ଯ୍ୟକ୍ରମରେ ରେଳ ବୋର୍ଡ ଅଧ୍ୟକ୍ଷ ତଥା ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ, ରେଳ ବୋର୍ଡର ସଦସ୍ୟ ମାନେ, ସମସ୍ତ ଜୋନାଲ ରେଳବାଇର ମହାପ୍ରବନ୍ଧକ ମାନେ ଏବଂ ରେଳବାଇର ଉତ୍ପାଦନ ୟୁନିଟ୍ ଏବଂ ରେଳବାଇର ପିଏସୟୁର ମୁଖ୍ୟମାନେ ମଧ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ରହିବେ |
ମୋଟ ଉପରେ, ବିଭିନ୍ନ ଜୋନାଲ ରେଳବାଇ, ଉତ୍ପାଦନ ୟୁନିଟ୍ ଏବଂ ରେଳ ପିଏସୟୁ ମାନଙ୍କର ସର୍ବମୋଟ ୧୦୦ ଜଣ ରେଳ କର୍ମଚାରୀଙ୍କୁ ସେମାନଙ୍କର କାର୍ଯ୍ୟ ଦକ୍ଷତା ଏବଂ ଉଲ୍ଲେଖନୀୟ ସେବା ପାଇଁ ୨୧ ଟି ଶିଲ୍ଡ ସହିତ ପୁରସ୍କୃତ କରାଯିବ | ୧୬.୦୪.୧୮୫୩ ରେ ଭାରତରେ ପ୍ରଥମ ଟ୍ରେନ୍ ଚଳାଚଳକୁ ସ୍ମରଣ କରିବା ପାଇଁ ପ୍ରତିବର୍ଷ ୧୦ ରୁ ୧୬ ଏପ୍ରିଲ ପର୍ଯ୍ୟନ୍ତ ରେଳ ସପ୍ତାହ ପାଳନ କରାଯାଏ | ରେଳ ସପ୍ତାହରେ, ସମଗ୍ର ଭାରତୀୟ ରେଳବାଇରେ ଏହି କାର୍ଯ୍ୟକ୍ରମ ଆୟୋଜନ କରାଯାଇ ଥାଏ |
ଏହି ଅବସରରେ ପୂର୍ବତଟ ରେଳପଥ ଦୁଇଟି ସମ୍ମାନଜନକ ପୁରସ୍କାର ଗ୍ରହଣ କରିବ | ତାହା ବାଣିଜ୍ୟିକ ଏବଂ ସୁରକ୍ଷା ବିଭାଗ କ୍ଷେତ୍ରରେ ଦକ୍ଷତା ଶିଲ୍ଡ | ଏହା ବ୍ୟତୀତ ପୂର୍ବତଟ ରେଳପଥ ଗୋଟିଏ ବ୍ୟକ୍ତିଗତ ପୁରସ୍କାର “ଅତି ବିଶିଷ୍ଟ ରେଳ ସେବା ପୁରସ୍କାର” ମଧ୍ୟ ପାଇବ | ମାଲ ପରିବହନ ଓ ରାଜସ୍ୱ ଉତ୍ପାଦନରେ ସେବା ପ୍ରତି ଉତ୍ସର୍ଗୀକୃତ ତଥା ନୂତନ ଦ୍ରବ୍ୟ ପରିବହନ ପାଇଁ ନୂତନ ହିତାଧିକାରୀଙ୍କୁ ଆକର୍ଷିତ କରିବା କ୍ଷେତ୍ରରେ ଖୋର୍ଦ୍ଧା ରୋଡ ରେଳ ମଣ୍ଡଳର ମଣ୍ଡଳ ପରିଚାଳନା (ଅପରେସନ୍) ପ୍ରବନ୍ଧକ ରାନ୍ଦି ମନୋଜ ବାବୁ “ଅତି ବିଶିଷ୍ଟ ରେଳ ସେବା ପୁରସ୍କାର” ପାଇବାକୁ ମନୋନୀତ ହୋଇଛନ୍ତି |