ନୂଆଦିଲ୍ଲୀ: ସୋସିଆଲ ଆଣ୍ଡ ମିଡିଆ ମ୍ୟାଟର୍ସ ଦ୍ୱାରା ନିକଟରେ କରାଯାଇଥିବା ଏକ ସର୍ବେକ୍ଷଣରୁ ଜଣାପଡିଛି ଯେ ଭାରତର ପ୍ରଥମ ଥର ମତଦାନ କରିଥିବା ଭୋଟରଙ୍କ ମଧ୍ୟରୁ ପ୍ରାୟ ୮୦% ଲୋକପ୍ରିୟ ସୋସିଆଲ ମିଡିଆ ପ୍ଲାଟଫର୍ମରେ ଅନେକ ମିଥ୍ୟା ଖବରର ସମ୍ମୁଖୀନ ହେଉଛନ୍ତି।
ଏହି ଅଧ୍ୟୟନରୁ ଜଣାପଡିଛି ଯେ ୨୮ଟି ରାଜ୍ୟରେ ହୋଇଥିବା ୬୩୬ ଜଣ ଅଂଶଗ୍ରହଣକାରୀଙ୍କ ମଧ୍ୟରୁ ୭୮.୯% ଉତ୍ତରଦାତା ହ୍ୱାଟସଆପ, ଇନଷ୍ଟାଗ୍ରାମ ଏବଂ ଫେସବୁକ ଭଳି ପ୍ଲାଟଫର୍ମରେ ମିଥ୍ୟା ଖବରର ସମ୍ମୁଖୀନ ହୋଇଛନ୍ତି ।
୨୦୨୪ ନିର୍ବାଚନ ଯେତିକି ପାଖେଇ ଆସୁଛି, ଏହି ପ୍ରସଙ୍ଗ ଏବେ ଚର୍ଚ୍ଚାର ବିଷୟ ପାଲଟିଛି। ସର୍ବେକ୍ଷଣରେ ପ୍ରଥମ ଥର ମତଦାତାଙ୍କ ମଧ୍ୟରେ ଗଣମାଧ୍ୟମ ସାକ୍ଷରତା ବୃଦ୍ଧିର ଆବଶ୍ୟକତା ଉପରେ ଆଲୋକପାତ କରାଯାଇଛି ଯାହା ଦ୍ୱାରା ସେମାନେ ପ୍ରକୃତ ସୂଚନା ଏବଂ ମିଥ୍ୟା ବିବରଣୀ ମଧ୍ୟରେ ପ୍ରଭାବଶାଳୀ ଭାବରେ ପାର୍ଥକ୍ୟ କରିପାରିବେ।
ଫେକନ୍ୟୁଜ୍ ପ୍ରସାରଣ ପାଇଁ ସୋସିଆଲ ମିଡିଆ ପ୍ଲାଟଫର୍ମ ଗୁଡ଼ିକ ପ୍ରାଥମିକ ଚ୍ୟାନେଲ ପାଲଟିଛି। ଯେଉଁଥିରେ ହ୍ଵାଟସଆପ୍ ୨୯.୮%, ଇନଷ୍ଟାଗ୍ରାମ ୧୭.୮% ଏବଂ ଫେସବୁକ୍ ୧୫.୮% ରହିଛି।
ସର୍ବେକ୍ଷଣରୁ ଏହା ମଧ୍ୟ ଜଣାପଡିଛି ଯେ ୩୭.୧% ଉତ୍ତରଦାତା ମିଥ୍ୟା ଖବର କିମ୍ବା ଭୁଲ ସୂଚନା ଦ୍ୱାରା ସିଧାସଳଖ ପ୍ରଭାବିତ ହୋଇଥିବା ସ୍ୱୀକାର କରିଛନ୍ତି। ଏହା ଭୋଟରଙ୍କ ନିଷ୍ପତ୍ତି ଗ୍ରହଣ ପ୍ରକ୍ରିୟା ଏବଂ ଗଣତାନ୍ତ୍ରିକ ପ୍ରକ୍ରିୟାର ସାମଗ୍ରିକତା ଉପରେ ଭୁଲ ସୂଚନାର ସମ୍ଭାବ୍ୟ ପରିଣାମ ବିଷୟରେ ଚିନ୍ତା ସୃଷ୍ଟି କରେ।
‘ଡୋଣ୍ଟ ବି ଫୁଲ୍ ୩.୦’ ଶୀର୍ଷକ ଏହି ସର୍ଭେ ରିପୋର୍ଟରେ #KeepItReal ଭଳି ପଦକ୍ଷେପର ଗୁରୁତ୍ବପୂର୍ଣ୍ଣ ଆବଶ୍ୟକତା ଉପରେ ଗୁରୁତ୍ୱାରୋପ କରାଯାଇଛି। ଯାହାର ଉଦ୍ଦେଶ୍ୟ ହେଉଛି ଭାରତରେ ପ୍ରଥମ ଥର ମତଦାତାଙ୍କ ମଧ୍ୟରେ ଭୁଲ ସୂଚନାର ମୁକାବିଲା କରିବା ଏବଂ ଗଣମାଧ୍ୟମ ସାକ୍ଷରତାକୁ ପ୍ରୋତ୍ସାହିତ କରିବା।
Comments are closed.