ଟ୍ରାକ୍‌ଟର ରାଲିକୁ ପ୍ରତ୍ୟାହାର କଲେ ଚାଷୀ ସଂଗଠନ, ଜାରି ରହିବ ଶାନ୍ତିପୂର୍ଣ୍ଣ ଧାରଣା

ନୂଆଦିଲ୍ଲୀ: ଚାଷୀ ସଂଗଠନର ଟ୍ରାକ୍‌ଟର ରାଲି ପାଇଁ ଆଜି ଗଣତନ୍ତ୍ର ଦିବସରେ ରାଜଧାନୀ ନୂଆଦିଲ୍ଲୀରେ ଅଭାବନୀୟ ପରିସ୍ଥିତି ସୃଷ୍ଟି ହେବା ପରେ ଏହି ଟ୍ରାକ୍‌ଟର ରାଲିକୁ ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛନ୍ତି ଚାଷୀ ସଂଗଠନ । ସଂଯୁକ୍ତ କିଷାନ ମୋର୍ଚ୍ଚା କହିଛି, ଟ୍ରାକ୍‌ଟର ରାଲିକୁ ତୁରନ୍ତ ପ୍ରତ୍ୟାହାର କରାଯାଇଛି ।
ଏହା ସହିତ ସମସ୍ତ ଆନ୍ଦୋଳନକାରୀଙ୍କୁ ସେମାନଙ୍କର ନିଜ ନିଜ ଧାରଣାସ୍ଥଳକୁ ଫେରି ଆସିବାକୁ ସଂଯୁକ୍ତ କିଷାନ ମୋର୍ଚ୍ଚା ଆହ୍ୱାନ ଦେଇଛି । ତା ସହିତ ଶାନ୍ତିପୂର୍ଣ୍ଣ ଭାବେ ଆନ୍ଦୋଳନ ଜାରି ରହିବ ବୋଲି କୁହାଯାଇଛି । ଆଜିର ହିଂସାକୁ କଡା ଭାଷାରେ ନିନ୍ଦା କରିବା ସହିତ ଏପରି ହେବା ଅନୁଚିତ ବୋଲି ମଧ୍ୟ କୁହାଯାଇଛି ।
ଆଜି ସାରା ଦେଶରେ ଗଣତନ୍ତ୍ର ଦିବସ ପାଳିତ ହେଉଥିବା ବେଳେ ଦିଲ୍ଲୀରେ ଜାତୀୟ ସ୍ତରୀୟ ପରେଡ ହେଉଥିଲା । ନିଜ ଦାବି ଜଣାଇବା ପାଇଁ ଚାଷୀମାନେ ଟ୍ରାକଟର ରାଲି କରୁଥିଲେ । ହେଲେ ତାହା ହିଂସାର ରୂପ ନେଇଥିଲା । କେତେକ ଚାଷୀ ନିଜ ନିଜ ଟ୍ରାକଟର ଧରି ଲାଲକିଲ୍ଲାରେ ପହଞ୍ଚିଥିଲେ । ନିଜର ପତାକା ବି ଉଡାଇଥିଲେ । ଦିଲ୍ଲୀ ପୋଲିସ ନୀରବଦ୍ରଷ୍ଟା ସାଜିଥିଲା । ପରେ ପୋଲିସ ଲୁହବୁହା ଗ୍ୟାସ ସହିତ ଲାଠିମାଡ କରିଥିଲା । ତେବେ ଗଣତନ୍ତ୍ର ଦିବସରେ ଆନ୍ଦୋଳନକାରୀମାନେ ଲାଲକିଲ୍ଲାକୁ ଯିବାରୁ ଯେଉଁ ପରିସ୍ଥିତି ସୃଷ୍ଟି ହୋଇଥିଲା, ତାକୁ ସବୁ ମହଲରେ ନିନ୍ଦା କରାଯାଉଛି ।