ଫୁଲୱାମା ଆକ୍ରମଣ: ୪୪ ଜଣ ସୈନିକଙ୍କ ସହ ଦେଶଲାଗି ପ୍ରାଣବଳୀ ଦେଲେ ଓଡ଼ିଆ ଯବାନ ପ୍ରସନ୍ନ ସାହୁ

ଭୁବନେଶ୍ୱର: ଜମ୍ମୁ ଓ କାଶ୍ମୀରର ଫୁଲୱାମାଠାରେ ଜୈଶ-ଇ-ମହମ୍ମଦ ଆତଙ୍କବାଦୀ ସଂଗଠନର ଆକ୍ରମଣରେ ଯେଉଁ ୪୪ ଜଣ ସୁରକ୍ଷାକର୍ମୀ ସହିଦ ହୋଇଛନ୍ତି ସେମାନଙ୍କ ମଧ୍ୟରେ ଅଛନ୍ତି ଓଡ଼ିଆ ବୀର ଯବାନ ପ୍ରସନ୍ନ କୁମାର ସାହୁ । ଏହି ଖବର ମିଳିବା ମାତ୍ରେ ସହିଦ ସିଆରପିଏଫ ଯବାନ ପ୍ରସନ୍ନଙ୍କ ଗ୍ରାମ ଜଗତସିଂହପୁର ଜିଲ୍ଲାରେ ଥିବା ନିଜ ଗ୍ରାମ ଶିଖରରେ ଶୋକର ଛାୟା ଖେଳିଯାଇଛି ।

ଦେଶର ସୁରକ୍ଷା ଲାଗି ଜମ୍ମୁ ଓ କାଶ୍ମୀରରେ ଏହି ଓଡ଼ିଆ ଯବାନ ହେଡ଼ କନଷ୍ଟେବଳ ଭାବେ କାର୍ଯ୍ୟରତ ଥିଲେ । ଗୁରୁବାର ସନ୍ଧ୍ୟାରେ ଆତଙ୍କବାଦୀଙ୍କ ପକ୍ଷରୁ ଘଟିଥିବା ଏହି ବର୍ବରୋଚିତ ଆତ୍ମଘାତୀ ଆକ୍ରମଣରେ ସହିଦ ହେବାର ଦୁଃଖଦ ଖବର ଶୁଣି ପ୍ରସନ୍ନଙ୍କ ମାଆ ଓ ପତ୍ନୀଙ୍କ କାନ୍ଦରେ ଫାଟି ପଡୁଛି ଶିଖର ଗାଁର ମାଟି । ଗ୍ରାମବାସୀମାନେ ଏହି ଦୁଃଖଦ ଖବର ଶୁଣିବା ପରେ ନିଜର କୋହ ସମ୍ବରଣ କରିପାରୁନାହାନ୍ତି ।

ଆତଙ୍କବାଦୀଙ୍କ ଏହି ଘୃଣ୍ୟ ଆକ୍ରମଣରେ ପ୍ରାୟ ୪୪ ଜଣ ଭାରତୀୟ ଯବାନଙ୍କ ପ୍ରାଣହାନୀ ଘଟିଥିବା ବେଳେ ୧୨ ଜଣରୁ ଅଧିକ ଯବାନ ଗୁରୁତର ଭାବେ ଆହତ ହୋଇ ଚିକିତ୍ସିତ ହେଉଛନ୍ତି । ଜମ୍ମୁ ରାଜପଥରେ ଏକ ବିସ୍ଫୋରକ ବୋଝେଇ ଗାଡ଼ି ଦ୍ୱାରା ଜଣେ ଆତ୍ମଘାତୀ ଆତଙ୍କବାଦୀ ସିଆରପିଏଫ ବସ ସହିତ ଧକ୍କା ଦେବା ସହିତ ଗୁଳି ଚାଳନା କରିଥିଲା ।

ଏହି ଆକ୍ରମଣ ଘଟଣାରେ ଆତଙ୍କବାଦୀ ସଂଗଠନ ଜୈଶ-ଇ-ମହମ୍ମଦ ନିଜକୁ ଦାୟୀ କରିଛି । ଏହି ବେଆଇନ ଆତଙ୍କବାଦୀ ସଂଗଠନ ଏହି ବିସ୍ଫୋରଣ କରିଥିବା ଆତ୍ମଘାତୀ ଆତଙ୍କବାଦୀର ଏକ ଭିଡ଼ିଓ କ୍ଲିପ୍ ପ୍ରଚାର ମଧ୍ୟ କରିଛି ।

ଜମ୍ମୁ ଓ କାଶ୍ମୀରର ଶ୍ରୀନଗର-ଜମ୍ମୁ ରାଜପଥରେ ୭୦ଟି ବସରେ ସିଆରପିଏଫ ସୁରକ୍ଷାକର୍ମୀ ଯାଉଥିବା ବେଳେ ଜୈଶ-ଇ-ମହମ୍ମଦ ଆତଙ୍କବାଦୀ ସଂଗଠନର ସଦସ୍ୟ ଆଦିଲ୍ ଅହମ୍ମଦ ଏକ ବିସ୍ଫୋରକ ଭରା ଗାଡ଼ିରେ ଆସି ଗୋଟିଏ ବସରେ ଧକ୍କା ଦେଇଥିଲା । ଆତଙ୍କବାଦୀମାନଙ୍କ ବିସ୍ଫୋରକ ଭରା ଗାଡ଼ି ସୁରକ୍ଷାକର୍ମୀଙ୍କ ଗାଡ଼ିକୁ ଧକ୍କା ଦେବା ଫଳରେ ପ୍ରଚଣ୍ଡ ବିସ୍ଫୋରଣ ହୋଇଥିଲା । ଘଟଣାସ୍ଥଳରେ ଅଧିକାଂଶ ଯବାନଙ୍କ ପ୍ରାଣହାନୀ ଘଟିଥିବାର ସୂଚନା ହସ୍ତଗତ ହୋଇଛି ।

ଏହି ଘଟଣାକୁ ତୀବ୍ର ନିନ୍ଦା କରିବା ସହିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି, ଦେଶର ସୁରକ୍ଷା ଲାଗି ପ୍ରାଣବଳୀ ଦେଇଥିବା ଯବାନମାନଙ୍କ ଉତ୍ସର୍ଗ କେବେ ବି ନିଃଷ୍ଫଳ ଯିବନାହିଁ ।

Attack on CRPF personnel in Pulwama is despicable. I strongly condemn this dastardly attack. The sacrifices of our brave security personnel shall not go in vain. The entire nation stands shoulder to shoulder with the families of the brave martyrs. May the injured recover quickly.

— Narendra Modi (@narendramodi) February 14, 2019

ଘଟଣାସ୍ଥଳରେ ଖଣ୍ଡ ବିଖଣ୍ଡିତ ମୃତ ଶରୀର ପଡ଼ିରହିଥିଲା । ବିଭିନ୍ନ ସେନା ଗାଡ଼ିରେ ପ୍ରାୟ ୨,୫୦୦ ଯବାନ ବିଭିନ୍ନ ସ୍ଥାନରେ ମୂତୟନ ହେବାକୁ ଯାଉଥିଲେ ।

आज पाकिस्तान स्थित और उनके द्वारा संरक्षित आतंकवादी संगठन जैश-ए -मोहम्मद ने कश्मीर में एक हृदय विदारक आतंकवादी हमला किया जिसकी मैं और सारा देश भर्त्सना करता है। इस आतंकी हमले का समुचित जबाब देने के लिए सारा देश एकजुट है।

— Rajnath Singh (@rajnathsingh) February 14, 2019

 

ଗୃହମନ୍ତ୍ରୀ ରାଜନାଥ ସିଂହ ତାଙ୍କର ପାଟନା ଗସ୍ତ ବାତିଲ୍ କରି ଶୁକ୍ରବାର ଦିନ ଫୁଲୱାମାର ଘଟଣାସ୍ଥଳ ପରିଦର୍ଶନ କରିବେ ବୋଲି ସୂଚନା ମିଳିଛି ।

Deeply saddened by the martyrdom of so many @crpfindia #jawans in terrorist attack in #Pulwama district of #JammuAndKashmir. Strongly condemn the cowardly act and condolences to the bereaved families.

— Naveen Patnaik (@Naveen_Odisha) February 14, 2019

ଏହି ଘଟଣାର ତୀବ୍ର ନିନ୍ଦା କରିଛନ୍ତି ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ । ସହିଦ ଯବାନମାନଙ୍କ ପ୍ରତି ଗଭୀର ଶୋକ ପ୍ରକାଶ କରିବା ସହିତ ଏହା ବର୍ବରୋଚିତ ଏବଂ କାପୁରୁଷୋଚିତ କାର୍ଯ୍ୟ ବୋଲି ବର୍ଣ୍ଣନା କରିଛନ୍ତି ।