ସିନେମା ‘ଅର୍ଦ୍ଧସତ୍ୟ’ର ସ୍ପେଶାଲ ସ୍କ୍ରିନିଂ

ଭୁବନେଶ୍ବର : କୌସ୍ତଭ ଡ୍ରିମଓ୍ବାର୍କ ପ୍ରାଇଭେଟ୍ ଲିମିଟେଡ୍ ବ୍ୟାନରରେ ନିର୍ମିତ ଭିନ୍ନ ଧରଣର ସିନେମା ‘ଅର୍ଦ୍ଧସତ୍ୟ’ର ସ୍ପେଶାଲ ସ୍କ୍ରିନିଂ ହୋଇଛି । ଏକ୍ସପ୍ଲାନେଡ୍ ମଲର ସିନେପଲିସରେ ଏହି ସିନେମାର ପ୍ରମିୟର କରାଯାଇଛି । ଆୟୋଜିତ ଏହି ସ୍ପେଶାଲ ସ୍କ୍ରିନିଂରେ ଚଳଚ୍ଚିତ୍ର କଳାକାର ଓ ଟେକ୍ନିସିଆନଙ୍କ ସହ ଚଳଚ୍ଚିତ୍ର ଜଗତ ସହ ସମ୍ପୃକ୍ତ ବହୁ ବିଶିଷ୍ଟ ବ୍ୟକ୍ତି ଯୋଗଦେଇ ସିନେମାର ବେଶ ପ୍ରଶଂସା କରିଥିଲେ ।

ଓଡ଼ିଶାର ଏକମାତ୍ର ଓଟିଟି ପ୍ଲାଟଫର୍ମ ଆଉ ନେକ୍ସଟରେ ଷ୍ଟ୍ରିମିଂ ହେବାକୁ ଥିବା ଏହି ଚଳଚ୍ଚଚିତ୍ରର କାହାଣୀ, ଚିତ୍ରନାଟ୍ୟ ଓ ନିର୍ଦ୍ଦେଶନା ଦେଇଛନ୍ତି ଭରଦ୍ବାଜ ପଣ୍ଡା । ଫିଲ୍ମର ପ୍ରଯୋଜନା କରିଛନ୍ତି କୌଶିକ ଦାସ । ବିଭିନ୍ନ ଭୂମିକାରେ ହର ରଥ, ଋତୁପର୍ଣ୍ଣ ମହାପାତ୍ର, ଆର.ଜେ ଗୁଡି, ସୈଲେନ୍ ରାଉତରାୟ, କ୍ରିଷ୍ଣା ସୌରଭ, ରବିନ୍ଦ୍ର ନାଥ ମିଶ୍ର, ବର୍ଷା ସାମଲ ଓ ଆର.ଜେ କେପି ଅଭିନୟ କରିଛନ୍ତି । ‘ଅର୍ଦ୍ଧସତ୍ୟ’ କେବଳ ଏକ ମନୋରଞ୍ଜନଧର୍ମୀ ସିନେମା ନୁହେଁ, ବରଂ ଏହା ଏକ ମୂଲ୍ୟବୋଧ ଭିତ୍ତିକ ଚଳଚ୍ଚିତ୍ର ବୋଲି କହିଛନ୍ତି ପ୍ରଯୋଜକ ।

ସତ୍ୟପ୍ରକାଶ ଦାଶ ନାମକ ଜଣେ ପୋଲସ ଅଧିକାରୀଙ୍କ କାହାଣୀ ହେଉଛି ‘ଅର୍ଦ୍ଧସତ୍ୟ’ । ନିଲମ୍ବିତ ହେବା ପରେ ତାଙ୍କୁ ପୋଲିସ ସହାୟତା କେନ୍ଦ୍ରରେ ଯୋଗଦେବାକୁ କୁହାଯାଏ । ଜଣେ ଅପହୃତା ମହିଳା ସତ୍ୟଙ୍କୁ ସତ୍ୟର ସାମ୍ନା କରିବାକୁ ପ୍ରବର୍ତ୍ତାନ୍ତି । ଏପରି ଏକ ରୋଚକ କାହାଣୀ ଆରମ୍ଭରୁ ଶେଷ ଯାଏଁ ଦର୍ଶକଙ୍କୁ ବାନ୍ଧି ରଖିବ ବୋଲି ଆଶା ରଖିଛନ୍ତି ପୂରା ଟିମ୍ ।