ନୂଆଦିଲ୍ଲୀ: ରାହୁଲ ଗାନ୍ଧୀଙ୍କ ଭାରତ ଯୋଡ଼ ଯାତ୍ରାରେ ଯୋଗଦେବା ପାଇଁ ଶିବସେନା ଉଦ୍ଧବ ଗୋଷ୍ଠୀର ନେତା ସଞ୍ଜୟ ରାଉତ ଜମ୍ମୁରେ ପହଞ୍ଚିଛନ୍ତି। ଏହି ସମୟରେ ସେ ପୁଣି ଥରେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ପ୍ରଶଂସା କରିଛନ୍ତି। ଏବଂ ରାହୁଲ ଗାନ୍ଧୀ ଭାରତର ପ୍ରଧାନମନ୍ତ୍ରୀ ହେବାକୁ ଜଣେ ଯୋଗ୍ୟ ନେତା ବୋଲି ସେ କହିଛନ୍ତି। ଏପରି କହିବା ସହ ତୃତୀୟ ସାମ୍ମୁଖ୍ୟକୁ କଟାକ୍ଷ କରିଛନ୍ତି ସାଂସଦ ରାଉତ।
ସଞ୍ଜୟ ରାଉତ ଶନିବାର କହିଛନ୍ତି ଯେ କଂଗ୍ରେସ ନେତା ରାହୁଲ ଗାନ୍ଧୀଙ୍କର ଭାରତର ପ୍ରଧାନମନ୍ତ୍ରୀ ହେବାର ସମ୍ଭାବନା ଅଛି। ସେ ଆହୁରି ମଧ୍ୟ କହିଛନ୍ତି ଯେ ଦେଶର ସର୍ବ ପୁରାତନ ଦଳ ବିନା କୌଣସି ତୃତୀୟ ସାମ୍ମୁଖ୍ୟ ସଫଳ ହୋଇପାରିବ ନାହିଁ।
ସଞ୍ଜୟ ରାଉତ କହିଛନ୍ତି ଯେ ଭରତ ଯୋଡ ଯାତ୍ରା ରାହୁଲ ଗାନ୍ଧୀଙ୍କ ନେତୃତ୍ୱ ଦକ୍ଷତା ପ୍ରଦର୍ଶନ କରିବ ଏବଂ ୨୦୨୪ ସାଧାରଣ ନିର୍ବାଚନରେ ଶାସକ ବିଜେପି ପାଇଁ ଏକ ଆହ୍ୱାନ ସୃଷ୍ଟି କରିବ।
ସେ ଆହୁରି ମଧ୍ୟ କହିଛନ୍ତି ଯେ ଏହି ଭାରତ ଯୋଡ଼ ଯାତ୍ରାର ଉଦ୍ଦେଶ୍ୟ ହେଉଛି ଦେଶକୁ ଏକଜୁଟ କରିବା ଏବଂ ଘୃଣା ଓ ଭୟ ଦୂର କରିବା, ବିରୋଧୀ ଦଳଗୁଡ଼ିକୁ କଂଗ୍ରେସ ବ୍ୟାନରରେ ଏକଜୁଟ କରିବା।
ସେ କହିଛନ୍ତି ଯେ ୩୫୦୦ କିଲୋମିଟରରୁ ଅଧିକ ଦୂରତା ଅତିକ୍ରମ କରିବା କନ୍ୟାକୁମାରୀଠାରୁ କଶ୍ମୀର ପର୍ଯ୍ୟନ୍ତ ସମସ୍ତେ ଯାଇପାରିବେ ନାହିଁ। ଏହା ଦେଶ ପାଇଁ ବହୁତ ନିଷ୍ଠା ଥିଲେ ହିଁ ସମ୍ଭବ ହୋଇପାରିବ। ସେ କହିଛନ୍ତି, ମୋର ଜମ୍ମୁ କଶ୍ମୀର ଗସ୍ତର ମୂଳ ଉଦ୍ଦେଶ୍ୟ ଥିଲା ମୋର ନେତାଙ୍କ ନିର୍ଦ୍ଦେଶ କ୍ରମେ ରାହୁଲ ଗାନ୍ଧୀଙ୍କ ନେତୃତ୍ୱାଧୀନ ଭାରତ ଯୋଡ଼ ଯାତ୍ରାରେ ଯୋଗଦେବା।
ଉଲ୍ଲେଖଯୋଗ୍ଯ, ସଞ୍ଜୟ ରାଉତ ଏହି ଅବସରରେ ହାଇଦ୍ରାବାଦରେ କେସିଆରଙ୍କ ନେତୃତ୍ୱାଧୀନ ବିଆରଏସକୁ ଟାର୍ଗେଟ କରିଛନ୍ତି।ନିକଟରେ ହୋଇଥିବା ଏହି ରାଲିରେ ଅଣ କଂଗ୍ରେସ, ଅଣ ବିଜେପି ଦଳର ପ୍ରମୁଖ ନେତା ସାମିଲ ହୋଇଥିଲେ। ଆଉ ଆଗାମୀ ଦିନରେ ବିଜେପି ବିରୋଧରେ କଂଗ୍ରେସ ନୁହଁ ତୃତୀୟ ସାମ୍ମୁଖ୍ୟ ହିଁ ମୋଦୀ ସରକାରକୁ ମୁକାବିଲା କରିବ ବୋଲି ଏକ ବାର୍ତ୍ତା ଦେଇଥିଲେ। ଯାହାକୁ ଶନିବାର ପରୋକ୍ଷରେ ଜବାବ ଦେବାକୁ ଯାଇ ସାଂସଦ ସଞ୍ଜୟ ରାଉତ କହିଛନ୍ତି, ବିନା କଂଗ୍ରେସରେ କୌଣସି ତୃତୀୟ ସାମ୍ମୁଖ୍ୟ ସଫଳ ହେବ ନାହିଁ।
Comments are closed.