ପୁରୀ : ପୁରୀ ସହରରେ ଥିବା ସମୁଦ୍ର ବେଳାଭୂମିରେ ମଙ୍ଗଳବାର ଏକ ଅଜବ ଘଟଣା ଦେଖିବାକୁ ମିଳିଛି। ସମୁଦ୍ର କୂଳରେ ହଜାର ହଜାର ଜେଲି ଫିସର ଶବ ଭାସୁଥିବାର ଦେଖିବାକୁ ମିଳିଛି। ସକାଳେ ସ୍ଥାନୀୟ ମତ୍ସ୍ୟଜୀବୀ ଓ ପର୍ଯ୍ୟଟକମାନେ ପ୍ରଥମେ ମୃତ ଜେଲିଫିସ୍ କୂଳରେ ପହଞ୍ଚିବା ପରେ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ଖେଳି ଯାଇଥିଲା ଏବଂ ସମ୍ଭାବ୍ୟ ବିଷାକ୍ତତାକୁ ନେଇ ବେଳାଭୂମିକୁ ଆସୁଥିବା ଲୋକଙ୍କ ମଧ୍ୟରେ ଉଦବେଗ ପ୍ରକାଶ ପାଇଥିଲା।
ଏତେ ସଂଖ୍ୟାର ଜେଲି ଫିସ୍ ମୃତ୍ୟୁର ପ୍ରକୃତ କାରଣ ଅସ୍ପଷ୍ଟ ରହିଛି, କିନ୍ତୁ ସ୍ଥାନୀୟ ବାସିନ୍ଦା ଅନୁମାନ କରିଛନ୍ତି ଯେ ନିକଟରେ ବଙ୍ଗୋପସାଗରରେ ହୋଇଥିବା ବାତ୍ୟା ‘ମୋକା’ ଏଥିପାଇଁ ଦାୟୀ ହୋଇପାରେ, ଯାହା ପରବର୍ତ୍ତୀ ସମୟରେ ଜେଲିଫିସ ଗୁଡିକୁ କୂଳକୁ ନେଇ ଆସିଛି। ତେବେ ଏହାର କାରଣ ସମ୍ପର୍କରେ ସରକାରୀ ଭାବେ କୌଣସି ସୂଚନା ଦିଆଯାଇନାହିଁ।
ସମୁଦ୍ରରେ ପ୍ରଦୂଷଣଠାରୁ ଆରମ୍ଭ କରି ସାମୁଦ୍ରିକ ଝଡ଼ର ପ୍ରଭାବ ପର୍ଯ୍ୟନ୍ତ ବିଭିନ୍ନ କାରଣରୁ ଏଭଳି ଘଟଣା ଘଟିପାରେ ବୋଲି ସାମୁଦ୍ରିକ ବିଜ୍ଞାନୀ ଜ୍ଞାନରଞ୍ଜନ ସାହୁ କହିଛନ୍ତି।
ସୂଚନାଯୋଗ୍ୟ ଯେ, ୨୦୨୧ ମେ’ ୨୪ ତାରିଖରେ ଓଡ଼ିଶାରେ ବାତ୍ୟା ‘ୟାସ୍’ ଲ୍ୟାଣ୍ଡଫଲ୍ କରିବାର ଠିକ୍ ଦୁଇ ଦିନ ପୂର୍ବରୁ ପୁରୀ ବେଳାଭୂମିରେ ମଧ୍ୟ ଅନୁରୂପ ଘଟଣା ଘଟିଥିଲା। ବାରମ୍ବାର ଏଭଳି ଘଟଣା ପରିବେଶ ପରିସ୍ଥିତି ଏବଂ ସାମୁଦ୍ରିକ ବାତ୍ୟାର ପ୍ରଭାବ ଏହି ଅଞ୍ଚଳର ସାମୁଦ୍ରିକ ଜୀବନ ଉପରେ ପଡୁଥିବା ଚିନ୍ତାକୁ ବଢାଇଦେଉଛି।
Comments are closed.