ମାଲକାନଗିରି: ଓଡ଼ିଶାର ଉପାନ୍ତ ଜିଲ୍ଲା ମାଲକାନଗିରି ବଜାରରେ ପ୍ଲାଷ୍ଟିକ୍ ଅଣ୍ଡା ମିଳିଥିବା ଅଭିଯୋଗ ହୋଇଛି ।
ମିଳିଥିବା ସୂଚନା ଅନୁଯାୟୀ ସ୍ଥାନୀୟ ହାଇଟେକ୍ କଲୋନିର ଦିଗମ୍ବର ବେହେରା ନାମକ ଜଣେ ବ୍ୟକ୍ତି ନିକଟସ୍ଥ ଥିବା ଏକ ଦୋକାନରୁ ୪ଟି ଅଣ୍ଡା କିଣିଥିଲେ । ଘରେ ଏହାକୁ ଭାଙ୍ଗି ପ୍ରସ୍ତୁତ କରିବା ବେଳକୁ ଏଥିରେ ଏକ ପ୍ଲାଷ୍ଟିକ ଆସ୍ତରଣ ଥିବା ଦେଖିବାକୁ ପାଇଲେ ।
ଦିଗମ୍ବରଙ୍କ କହିବା ଅନୁସାରେ ଏହି ପ୍ଲାଷ୍ଟିକ୍ ଅଣ୍ଡାର କେଶରକୁ ହାତରେ ଧରିଲେ ତାହା ତଳକୁ ଝୁଲି ରହୁଛି । ଆହୁରି ମଧ୍ୟ ଏହି ପ୍ଲାଷ୍ଟିକ୍ ଅଣ୍ଡାଗୁଡ଼ିକର ଆକାର ଟିକେ ଅଧିକ ଗୋଲ୍ ମଧ୍ୟ ଦିଶୁଛି ।
ଏହି ଅଣ୍ଡା ବିକ୍ରି କରିଥିବା ଦୋକାନୀଙ୍କ କହିବା ଅନୁଯାୟୀ, ସେ ହୋଲସେଲ ଦୋକାନରୁ ଏହି ଅଣ୍ଡା କିଣିଛନ୍ତି।
ସ୍କୁଲମାନଙ୍କର ମଧ୍ୟାହ୍ନ ଭୋଜନରେ ଅଣ୍ଡା ଖାଇବାକୁ ଦିଆଯାଉଥିବା କାରଣରୁ ଏହି ଘଟଣା ସାମ୍ନାକୁ ଆସିବା ପରେ, ସାରା ଜିଲ୍ଲାରେ ଆତଙ୍କ ଖେଳିଯାଇଛି।