ପାଣିପାଗ: ୨୦୨୩ ତୁଳନାରେ ୨୦୨୪ରେ ଅଧିକ ଚ୍ଯାଲେଞ୍ଜ କାହିଁକି? ଜାଣନ୍ତୁ କ’ଣ କହୁଛନ୍ତି ପାଣିପାଗ ବିଶେଷଜ୍ଞ ସୁରେନ୍ଦ୍ର ପଶୁପାଳକ

ଭୁବନେଶ୍ୱର: ଚଳିତ ବର୍ଷର ଗ୍ରୀଷ୍ମ ପ୍ରବାହ କିଭଳି ସାରା ରାଜ୍ୟକୁ ଝାଳନାଳ କରିଥିଲା ତାହା ହୁଏତ କେହି କେବେ ଭୁଲିନଥିବେ। ଯଦିଓ ବର୍ଷ ଶେଷ ହେଉଛି କିନ୍ତୁ ଏହି ପ୍ରବାହ ଏବେ ବି ଶେଷ ହୋଇନି। ଅର୍ଥାତ ଆସନ୍ତାବର୍ଷ ମଧ୍ୟ ଏପରି ସିଝିବାକୁ ପଡ଼ିବ ବୋଲି ପାଣିପାଗ ବିଶେଷଜ୍ଞ ଆକଳନ କରିଛନ୍ତି।

ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ ଏଭଳି ପୂର୍ବାନୁମାନ କରିଛନ୍ତି। ୨୦୨୩ ତୁଳନାରେ ୨୦୨୪ରେ ଅଧିକ ଗରମ ଦିନ ବା ଗ୍ରୀଷ୍ମ ପ୍ରବାହ ରହିବ ବୋଲି ସେ ଅନୁମାନ କରିଛନ୍ତି। ୧୯୮୦ ମସିହାରୁ ଦେଖାଯାଇଥିବା ଏଲ୍ ନିନୋ ପ୍ରଭାବ ଏବଂ ଜଳବାୟୁ ପରିବର୍ତ୍ତନ ପାଇଁ ଏପରି ପ୍ରଭାବ ରହିବ ବୋଲି ସେ ଆକଳନ କରିଛନ୍ତି।

ଏଲ୍ ନିନୋ ପ୍ରଭାବ, ଯାହା ଏକ ପ୍ରାକୃତିକ ଜଳବାୟୁ ଘଟଣା, ପ୍ରଶାନ୍ତ ମହାସାଗରରେ ସମୁଦ୍ର ପୃଷ୍ଠର ହାରାହାରି ତାପମାତ୍ରାଠାରୁ ଅଧିକ ଉଷ୍ମ କରିଥାଏ । ଏହାଦ୍ୱାରା ସମଗ୍ର ବିଶ୍ୱରେ ପାଣିପାଗ ଢାଞ୍ଚାରେ ପରିବର୍ତ୍ତନ ଆସିଥାଏ, ଯେଉଁଥିରେ କେତେକ ଅଞ୍ଚଳରେ ଗରମ ଏବଂ ଶୁଖିଲା ଅବସ୍ଥାର ସମ୍ଭାବନା ଅଧିକ ଥାଏ।

ପଶୁପାଳକ ସ୍ପଷ୍ଟ କରିଛନ୍ତି ଯେ ୨୦୨୩ର ଏଲ୍ ନିନୋର ପ୍ରଭା ୨୦୨୪ ମାର୍ଚ୍ଚ/ଏପ୍ରିଲ ପର୍ଯ୍ୟନ୍ତ ଚାଲିପାରେ। ଫଳରେ ୨୦୨୩ରେ ଭୁବନେଶ୍ୱରରେ ଯେଉଁଭଳି ପ୍ରବଳ ଗ୍ରୀଷ୍ମ ପ୍ରବାହ ଅନୁଭୂତ ହୋଇଥିଲା ତାହା ଆଗାମୀ ଗ୍ରୀଷ୍ମ ପ୍ରବାହରେ ମଧ୍ୟ ଆହୁରି ଅଧିକ ଅନୁଭୂତ ହେବ ବୋଲି ଅନୁମାନ କରାଯାଉଛି।

ସେ ନ୍ୟାସନାଲ ଓସେନିକ୍ ଆଣ୍ଡ ଆଟ୍ମୋସ୍ଫେରିକ ଆଡମିନିଷ୍ଟ୍ରେସନ (ଏନଓଏଏ)ର ବିଶେଷଜ୍ଞଙ୍କ ସିଦ୍ଧାନ୍ତକୁ ବିଶ୍ଳେଷଣ କରି କହିଛନ୍ତି। ଏବଂ ଉଲ୍ଲେଖ କରିଛନ୍ତି ଯେ ୨୦୧୫ ଏଲ ନିନୋ ଘଟଣାର ପ୍ରଭାବ ୨୦୧୬ରେ ଦେଖିବାକୁ ମିଳିଥିଲା। ସେହିପରି ୨୦୨୩ ଏଲ୍ ନିନୋ ପ୍ରଭାବ ଭୁବନେଶ୍ୱରରେ ୨୦୨୪ରେ ଅନୁଭୂତ ହେବାର ସମ୍ଭାବନା ରହିଛି।

ଗରମ ପ୍ରବାହ ବ୍ୟତୀତ ଆସନ୍ତା ବର୍ଷ ମୌସୁମୀ ମଧ୍ୟ ବିଳମ୍ବରେ ଆସିପାରେ। ଯାହା ଫଳରେ ଜୁନ୍ ଏବଂ ଜୁଲାଇର ପ୍ରଥମ ଦୁଇ ମାସରେ କମ୍ ବର୍ଷା ହୋଇପାରେ ବୋଲି ପଶୁପାଳକ ପୂର୍ବାନୁମାନ କରିଛନ୍ତି। ତେବେ ଅଗଷ୍ଟ ପରଠାରୁ ବର୍ଷା ବଢ଼ିବ ବୋଲି ସେ ଆକଳନ କରିଥିବାରୁ ଏହି ସମୟରେ ସ୍ୱାଭାବିକଠାରୁ ଅଧିକ ବର୍ଷା ହେବ ବୋଲି ସେ ଆକଳନ କରିଛନ୍ତି।

ମୋଟାମୋଟି ଭାବେ ପାଣିପାଗ ବିଶେଷଜ୍ଞଙ୍କ ପୂର୍ବାନୁମାନ ଅନୁଯାୟୀ ଗ୍ରୀଷ୍ମ ପ୍ରବାହ ଓ ବିଳମ୍ବିତ ମୌସୁମୀ ଥିବାରୁ ପାଣିପାଗ ଦୃଷ୍ଟିରୁ ରାଜ୍ୟ ପାଇଁ ଏକ ଚ୍ୟାଲେଞ୍ଜିଂ ବର୍ଷ।