ସୋନପୁର ରାଲିରୁ ବିଜେଡି ବିରୋଧରେ ଅମିତ ଶାହଙ୍କ ଏପରି ଆକ୍ରମଣାତ୍ମକ ଆଭିମୁଖ୍ୟ, ଆଗକୁ କେତେ?

ସୋନପୁର: ଗୁରୁବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ସୋନପୁର ରାଲି ଉପରେ ସମସ୍ତଙ୍କର ନଜର ଥିଲା । କାରଣ ମେଣ୍ଟ ଚର୍ଚ୍ଚାରେ ବିରାମ ଲାଗିବା ପରେ ବିଜେପିର ଆକ୍ରମଣାତ୍ମକ ଆଭିମୁଖ୍ୟକୁ ଅପେକ୍ଷା ଥିଲା । ଯାହା ଶାହ ଦେଖାଇଛନ୍ତି। ଅନ୍ତିମ ନିର୍ବାଚନ ଶୈଳୀରେ ଅଭିଭାଷଣ ରଖି ରାଜ୍ୟରେ ପ୍ରଚାର ମାହୋଲକୁ ସରଗରମ କରିଛନ୍ତି ଶାହ। ସେ ନବୀନ ପଟ୍ଟନାୟକଙ୍କ ନାଁ ନେଇ ବିଜେଡି ସରକାରକୁ ସମାଲୋଚନା କରିଛନ୍ତି। ବିଜେଡି ଓଡ଼ିଶାର ପ୍ରଗତିରେ ବାଧା ସୃଷ୍ଟି କରିବା ସହ ଦୁର୍ନୀତିରେ ଲିପ୍ତ ରହିଛି ବୋଲି ଶାହା ଅଭିଯୋଗ କରିଛନ୍ତି।

ଓଡ଼ିଶାକୁ ଭାରତର ଅଗ୍ରଣୀ ରାଜ୍ୟରେ ପରିଣତ କରିବାକୁ ପ୍ରତିଶ୍ରୁତି ଦେଇ ବିଜେପିକୁ ଭୋଟ୍ ଦେବାକୁ ସେ ମତଦାତାଙ୍କୁ ସୋନପୁର ରାଲିରେ ଅନୁରୋଧ କରିଛନ୍ତି। ଅନ୍ୟ ରାଜ୍ୟରେ ବିଜେପିର ବିକାଶ ରେକର୍ଡ ଉପରେ ଆଲୋକପାତ କରିବା ସହ ବିଜେପି ଶାସନରେ ଓଡ଼ିଶାବାସୀଙ୍କୁ ରୋଜଗାର ପାଇଁ ରାଜ୍ୟ ବାହାରକୁ ଯିବାକୁ ପଡ଼ିବ ନାହିଁ ବୋଲି ଶାହା ପ୍ରତିଶ୍ରୁତି ଦେଇଛନ୍ତି।

୨୦୩୬ ସୁଦ୍ଧା ରାଜ୍ୟକୁ ସର୍ବୋଚ୍ଚ ମାନ୍ୟତା ହାସଲ କରିବାକୁ ନବୀନ ଦେଇଥିବା ପ୍ରତିଶ୍ରୁତି ସହ ଶାହା ଓଡ଼ିଶା ପାଇଁ ବିଜେପିର ଦୃଷ୍ଟିକୋଣକୁ ତୁଳନା କରିଛନ୍ତି। ଅଯୋଧ୍ୟା ଶ୍ରୀରାମ ଜନ୍ମଭୂମି ମନ୍ଦିରର ‘ପ୍ରାଣ ପ୍ରତିଷ୍ଠା’ ସମାରୋହକୁ ବିଜେଡି ସରକାର ପୁରୀରେ ଧାର୍ମିକ କାର୍ଯ୍ୟକ୍ରମ ମାଧ୍ୟମରେ ଲୁଚାଇବାକୁ ଚେଷ୍ଟା କରୁଛି ବୋଲି ସେ ଅଭିଯୋଗ କରିଛନ୍ତି। ବିଜେପି ସରକାର ଆସିଲେ ଜଗନ୍ନାଥ ମନ୍ଦିରକୁ ଉତ୍ତରପ୍ରଦେଶର କାଶୀ ବିଶ୍ୱନାଥଙ୍କ ସମକକ୍ଷ କରାଯିବ ବୋଲି ଶାହା ପ୍ରତିଶ୍ରୁତି ଦେଇଛନ୍ତି।

ଆୟୁଷ୍ମାନ ଭାରତ ଯୋଜନା କାର୍ଯ୍ୟକାରୀ ନ କରିବା ପାଇଁ କେନ୍ଦ୍ରମନ୍ତ୍ରୀ ନବୀନଙ୍କୁ ସମାଲୋଚନା କରିବା ସହ ବିଜେଡି ସରକାର କେନ୍ଦ୍ର ସରକାରଙ୍କ ଯୋଜନାର ଅପବ୍ୟବହାର କରୁଛନ୍ତି ବୋଲି ଅଭିଯୋଗ କରିଛନ୍ତି।

ଶାହ ଓଡ଼ିଶାରେ ବିଜେପିର ସମ୍ଭାବନା ଉପରେ ଆସ୍ଥା ପ୍ରକଟ କରିବା ସହ ଦଳକୁ ୨୦ରୁ ଅଧିକ ଲୋକସଭା ଆସନ ମିଳିବ ବୋଲି ପୂର୍ବାନୁମାନ କରିବା ସହ ଧାରା ୩୭୦ ଉଚ୍ଛେଦ ଏବଂ ପାକିସ୍ତାନରେ ସାମରିକ କାର୍ଯ୍ୟାନୁଷ୍ଠାନ ସମେତ ମୋଦୀଙ୍କ ନେତୃତ୍ୱାଧୀନ ସରକାରଙ୍କ ସଫଳତା ସମ୍ପର୍କରେ ଉଲ୍ଲେଖ କରିଛନ୍ତି।

ଶାହାଙ୍କ ଏହି ମନ୍ତବ୍ୟ ୨୦୧୯ ନିର୍ବାଚନ ପୂର୍ବରୁ ବିଜେଡି ସରକାରଙ୍କୁ ସମାଲୋଚନା ଭଳି ଥିଲା। ସେତେବେଳେ ଶାହ ମଧ୍ୟ ରାଜ୍ୟର ବିଜେଡି ସରକାରକୁ ଦୁର୍ନୀତିଗ୍ରସ୍ତ ବୋଲି କହିଥିଲେ। ଏବେ ମଧ୍ୟ ସମାନ କଥା ଦୋହରାଇଛନ୍ତି। ଦୁଇ ଦଳ ମଧ୍ୟରେ ମେଂଟ ଆଲୋଚନା ଚର୍ଚ୍ଚାରେ ବିରାମ ଲାଗିବା ପରେ ଶାହ ଆକ୍ରମଣାତ୍ମକ ମୁଦ୍ରାରେ ଓହ୍ଲାଇଛନ୍ତି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନବୀନ ପଟ୍ଟନାୟକଙ୍କୁ କେତେକ ନିର୍ବାଚନ ମଣ୍ଡଳୀର ବିକାଶ ମୂଳକ କାର୍ଯ୍ୟ କଳାପ ସମ୍ପର୍କରେ ସୂଚନା ଦେବାକୁ ଚ୍ୟାଲେଞ୍ଜ ଦେଇଥିବା ବେଳେ ମନମୋହନ ସାମଲ ଓ ଜୟନାରାୟଣ ମିଶ୍ରଙ୍କ ସମେତ ଅନ୍ୟ ବିଜେପି ନେତାମାନେ ରାଲିରେ ଉପସ୍ଥିତ ଥିଲେ।