ଭୁବନେଶ୍ୱର: ମହାପ୍ରଭୁ ଜଗନ୍ନାଥ ମୋଦୀଙ୍କ ଭକ୍ତ ବୋଲି କହି ଅପମାନିତ ହେବା ପରେ ବିଜେପି ରାଷ୍ଟ୍ରୀୟ ମୁଖପାତ୍ର ତଥା ପୁରୀ ସାଂସଦ ପ୍ରାର୍ଥୀ ସମ୍ବିତ ପାତ୍ର ନିଜ ଭୁଲ ସ୍ୱୀକାର କରିଛନ୍ତି।
ସକାଳେ ମୋଦୀ ପୁରୀରେ ରୋଡ୍ ସୋ କରିବା ପରେ ଏକ ନ୍ୟୁଜ୍ ଚ୍ୟାନେଲକୁ ସାକ୍ଷାତକାର ଦେଇ ସମ୍ବିତ ପାତ୍ର ଏଭଳି କିଛି କହିଥିଲେ। ପ୍ରଧାନମନ୍ତ୍ରୀଙ୍କ ରୋଡ୍ ସୋ’ରେ ଯୋଗ ଦେବା ପାଇଁ ଲୋକସଭା ନିର୍ବାଚନମଣ୍ଡଳୀର ବିଭିନ୍ନ ଅଞ୍ଚଳରୁ ଲକ୍ଷ ଲକ୍ଷ ଲୋକ ଆସିଥିଲେ। ସେମାନେ ମୋଦୀଙ୍କ ଭକ୍ତ ମହାପ୍ରଭୁ ଜଗନ୍ନାଥଙ୍କ ଦର୍ଶନ କରିବାକୁ ଆସିଥିଲେ ବୋଲି ସମ୍ବିତ କହିଥିଲେ।
ଏହାକୁ ନେଇ ଚାରିଆଡୁ ସମାଲୋଚନାର ଶିକାର ହୋଇଛନ୍ତି ସମ୍ବିତ ପାତ୍ର। ଏପରିକି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ରାଜ୍ୟ କଂଗ୍ରେସ ସମାଲୋଚନା କରିବା ସହ ସମ୍ବିତଙ୍କ ମନ୍ତବ୍ୟ ନିନ୍ଦନୀୟ ବୋଲି କହିଥିଲେ।
ସମ୍ବିତ ପାତ୍ରଙ୍କ ଏହି ବୟାନକୁ ତୀବ୍ର ବିରୋଧ କରି ନବୀନ ଏକ୍ସରେ ଏକ ପୋଷ୍ଟରେ ଏହାକୁ ବ୍ରହ୍ମାଣ୍ଡର ମହାପ୍ରଭୁ ଶ୍ରୀଜଗନ୍ନାଥଙ୍କ ପ୍ରତି ଅପମାନ ବୋଲି ନିନ୍ଦା କରିଛନ୍ତି।
ମହାପ୍ରଭୁଙ୍କୁ ଅନ୍ୟ ମଣିଷର ଭକ୍ତ କହିବା ମହାପ୍ରଭୁଙ୍କ ପ୍ରତି ଅପମାନ। ଏହା ସମଗ୍ର ବିଶ୍ୱର କୋଟି କୋଟି ଜଗନ୍ନାଥ ଭକ୍ତ ଓ ଓଡ଼ିଆଙ୍କ ଭାବନାକୁ ଆଘାତ ଦେବା ସହ ବିଶ୍ୱାସକୁ କ୍ଷୁଣ୍ଣ କରିଛି। ମହାପ୍ରଭୁ ହେଉଛନ୍ତି ଓଡ଼ିଆ ଅସ୍ମିତାର ସର୍ବଶ୍ରେଷ୍ଠ ପ୍ରତୀକ।
କଂଗ୍ରେସର ବରିଷ୍ଠ ନେତା ପ୍ରସାଦ ହରିଚନ୍ଦନ ମଧ୍ୟ ସମ୍ବିତ ପାତ୍ରଙ୍କ ବୟାନକୁ ନିନ୍ଦା କରିଛନ୍ତି। ଭୁବନେଶ୍ୱରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ ବିଜେପି ନେତା ମହାପ୍ରଭୁ ଜଗନ୍ନାଥଙ୍କୁ ମୋଦୀଙ୍କ ଭକ୍ତ କହି ଅପମାନିତ କରିବା ଆଶ୍ଚର୍ଯ୍ୟଜନକ।
ନବୀନଙ୍କ ନିନ୍ଦା ଉପରେ ନିଜର ପ୍ରତିକ୍ରିୟାରେ ସମ୍ବିତ ପାତ୍ର କହିଛନ୍ତି ଯେ ଏହା ଭୁଲ ବଶତଃ ହୋଇଛି। ପୁରୀରେ ନରେନ୍ଦ୍ର ମୋଦୀଙ୍କ ରୋଡ୍ ସୋ’ର ବିପୁଳ ସଫଳତା ପରେ ଏକାଧିକ ଗଣମାଧ୍ୟମ ଚ୍ୟାନେଲକୁ ପ୍ରତିକ୍ରିୟା ଦେଇଥିଲି। ସବୁଠି ଉଲ୍ଲେଖ କରିଥିଲି ଯେ ମୋଦୀଜୀ ଶ୍ରୀଜଗନ୍ନାଥ ମହାପ୍ରଭୁଙ୍କର ଭକ୍ତ। ଭୁଲବଶତଃ ଥରେ ପାଟିରୁ ଯାହା ନକହିବା କଥା କହିଦେଇଥିଲି। ମୁଁ ଜାଣେ ଆପଣ ମଧ୍ୟ ଏହା ଜାଣିଛନ୍ତି ଏବଂ ବୁଝିଛନ୍ତି । ଆମ ସମସ୍ତଙ୍କ ଜିଭ ବେଳେବେଳେ ଖସିଯାଏ ବୋଲି ସେ କହିଛନ୍ତି।
Comments are closed.