ନୂଆଦିଲ୍ଲୀ: ଆମେରିକା ଗସ୍ତରେ କଂଗ୍ରେସ ନେତା ରାହୁଲ ଗାନ୍ଧୀ । ଲୋକସଭାରେ ବିରୋଧୀ ଦଳ ନେତା ଭାବେ ପ୍ରଥମ ଥର ପାଇଁ ଆମେରିକା ଗସ୍ତରେ ଯାଇ ରାହୁଲ ବିଭିନ୍ନ ପ୍ରସଙ୍ଗରେ ରଖିଛନ୍ତି ମତ । ଲୋକସଭା ନିର୍ବାଚନ ଫଳାଫଳ, ଭାରତ ଯୋଡ ଯାତ୍ରା, ଅର୍ଥନୀତି ଏମିତି ଅନେକ ପ୍ରସଙ୍ଗରେ ମତ ରଖିଛନ୍ତି ବିରୋଧୀ ଦଳ ନେତା । ଚୀନର ଅର୍ଥନୀତିକୁ ପ୍ରଶଂସା କରିଛନ୍ତି । ବିଜେପି ଓ ଆରଏସଏସ ବିରୋଧରେ ଟିପ୍ପଣୀ ରଖିଛନ୍ତି । ସେପଟେ, ରାହୁଲ ଗାନ୍ଧୀଙ୍କ ଟିକାଟିପ୍ପଣୀରେ ପ୍ରତିକ୍ରିୟାଶୀଳ ହୋଇଛି ବିଜେପି।
‘ଲୋକଙ୍କ ମନରୁ ବିଜେପି ଓ ମୋଦିଙ୍କ ଡର ଦୂର ହୋଇଛି’
ଆମେରିକାର ଟେକ୍ସାସରେ ଏକ କାର୍ଯ୍ୟକ୍ରମରେ ଯୋଗ ଦେଇ ଆରଏଏସ ଓ ବିଜେପିକୁ ଜୋରଦାର ଟାର୍ଗେଟ କରିଛନ୍ତି ରାହୁଲ । ଲୋକସଭା ନିର୍ବାଚନ ଫଳାଫଳ ପରେ ଲୋକଙ୍କ ମନରୁ ବିଜେପି ଓ ପ୍ରଧାନମନ୍ତ୍ରୀଙ୍କ ଡର ଦୂର ହୋଇଛି ବୋଲି କହିଛନ୍ତି ରାହୁଲ । ଆମେରିକାରେ ବି ସମ୍ବିଧାନ କଥା ଉଠାଇଛନ୍ତି । ବିଜେପି ସମ୍ବିଧାନ ଉଲ୍ଲଂଘନ କରୁଛି ଓ ଆରଏସଏସ ଭାରତକୁ ଗୋଟିଏ ବିଚାରର ଦେଶ ବୋଲି ମନେ କରୁଛି । ହେଲେ ଆମେରିକା ଭଳି ଭାରତରେ ମଧ୍ୟ ସମସ୍ତଙ୍କର ସ୍ୱପ୍ନ ଦେଖିବା ଅଧିକାର ରହିଛି । ସମସ୍ତଙ୍କୁ ଭାଗିଦାରୀର ସୁଯୋଗ ମିଳିବା ଦରକାର । ଆମେ ଏଥିପାଇଁ ଲଢେଇ କରୁଛୁ ବୋଲି ରାହୁଲ ଗାନ୍ଧୀ କହିଥିଲେ । ଭାରତର ପ୍ରଧାନମନ୍ତ୍ରୀ ଦେଶର ସମ୍ବିଧାନର ଅବମାନନା କରୁଛନ୍ତି । ଲୋକସଭା ନିର୍ବାଚନ ବେଳେ ଲୋକେ ଏକଥା ଭଲ ଭାବେ ବୁଝିପାରିଥିଲେ ବୋଲି ଦାବି କରିଛନ୍ତି ରାହୁଲ ।
ରୋଜଗାର ପ୍ରସଙ୍ଗରେ ଚୀନକୁ ପ୍ରଶଂସା
ବେକାରୀ ଓ ରୋଜଗାର ପ୍ରସଙ୍ଗରେ ମତ ରଖି ରାହୁଲ କହିଥିଲେ ଯେ, ବିଶ୍ୱରେ ସବୁଠି ଏଭଳି ସମସ୍ୟା ନାହିଁ । ପାଶ୍ଚାତ୍ୟ ଓ ଭାରତରେ ହିଁ ରୋଜଗାର ସମସ୍ୟା ରହିଛି । ଚୀନ୍ ଓ ଭିଏତନାମରେ ରୋଜଗାର ସମସ୍ୟା ନାହିଁ । ଚୀନ୍ ଏବେ ବୈଶ୍ୱିକ ଉତ୍ପାଦନରେ ଆଗୁଆ । ଭାରତରେ ଫୋନ୍, ଫର୍ନିଚର, କପଡାରେ ମେଡ୍ ଇନ୍ ଚାଇନା ଲେଖା ହେଉଛି । ଏହା ଏକ ବାସ୍ତବତା ବୋଲି ଟେକ୍ସାସରେ ରାହୁଲ କହିଛନ୍ତି ।
ରାହୁଲ ଗାନ୍ଧୀଙ୍କ ଚୀନ୍ ପ୍ରୀତିକୁ ବିଜେପିର ଭର୍ତ୍ସନା
ଆମେରିକାରେ ରାହୁଲ ଗାନ୍ଧୀଙ୍କ ବୟାନକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଛି ବିଜେପି । ଦଳ କହିଛି ଯେ, ବିଦେଶରେ ଭାରତକୁ ଅପମାନିତ କରିବା ରାହୁଲ ଗାନ୍ଧୀଙ୍କ ପୁରୁଣା ଅଭ୍ୟାସ । ବିଶେଷ କରି ରୋଜଗାର ଓ ଉତ୍ପାଦନ ପ୍ରସଙ୍ଗରେ ରାହୁଲଙ୍କ ଚୀନ୍ ସଂପର୍କିତ ବୟାନରେ ଆକ୍ରମଣାତ୍ମକ ପ୍ରତିକ୍ରିୟା ରଖିଛି ବିଜେପି । କମ୍ୟୁନିଷ୍ଟ ପାର୍ଟି ସହ ଭିତିରିଆ ସଂପର୍କ ଦୃଷ୍ଟିରୁ ରାହୁଲ ଗାନ୍ଧୀ ଚୀନ୍ ସପକ୍ଷରେ କହୁଛନ୍ତି କି ବୋଲି ପ୍ରଶ୍ନ କରିଛି ବିଜେପି । ଏବର୍ଷ ଅଗଷ୍ଟ ଯାଏଁ ଚୀନରେ ଯୁବକମାନଙ୍କ ମଧ୍ୟରେ ବେକାରୀ ହାର ୧୭ ପ୍ରତିଶତ । ସାରା ଦୁନିଆ ଏହା ଜାଣିଛି । କିନ୍ତୁ ରାହୁଲ ସିପିଆଇ ସହ ନିଜର ଏମଓୟୁ କାରଣରୁ ଚୀନ୍ ସପକ୍ଷରେ ଓ ଭାରତ ବିରୋଧରେ କହୁଛନ୍ତି କି ବୋଲି ବିଜେପି ମୁଖପାତ୍ର ପ୍ରଦୀପ ଭଣ୍ଡାରୀ କହିଛନ୍ତି ।
‘ଏ ଜନ୍ମରେ ଆରଏସଏସକୁ ବୁଝିପାରିବେନି ରାହୁଲ’
ଆମେରିକାରେ ରାହୁଲଙ୍କ ଆରଏସଏସ ବିରୋଧୀ ଟିପ୍ପଣୀକୁ ନିନ୍ଦା କରିଛି ବିଜେପି । ଆରଏସଏସକୁ ଜାଣିବା ପାଇଁ ରାହୁଲଙ୍କୁ ଅନେକ ଥର ଜନ୍ମ ନେବାକୁ ପଡିବ ବୋଲି ବିଜେପି ସାଂସଦ ଗିରିରାଜ ସିଂହ କହିଛନ୍ତି । ଯିଏ ବିଦେଶ ଯାଇ ଦେଶକୁ ନିନ୍ଦା କରେ ସେ ଆରଏସଏସକୁ ବୁଝିପାରିବ ନାହିଁ ବୋଲି ରାହୁଲଙ୍କୁ ଟାର୍ଗେଟ କରି କହିଛନ୍ତି ଗିରିରାଜ । ଅତୀତରେ ମଧ୍ୟ ରାହୁଲ ଆମେରିକା ଓ ଅନ୍ୟ ଦେଶ ଗସ୍ତ କରି ବିଭିନ୍ନ ପ୍ରସଙ୍ଗରେ ମତ ରଖିଛନ୍ତି । ମୋଦି ସରକାରଙ୍କ ବିଭିନ୍ନ ନୀତିର ସମାଲୋଚନା କରିଛନ୍ତି ରାହୁଲ । ଏଥିପାଇଁ ରାହୁଲଙ୍କୁ ଟାର୍ଗେଟ କରିଆସିଛି ବିଜେପି ।
Comments are closed.