ନୂଆଦିଲ୍ଲୀ: ପ୍ଲାଷ୍ଟିକ ବର୍ଜ୍ୟବସ୍ତୁରୁ ରାସ୍ତା ନିର୍ମାଣ ପାଇଁ ସରକାର ନିରନ୍ତର ଉଦ୍ୟମ କରୁଛନ୍ତି । ମଙ୍ଗଳବାର ପାନୀୟ ଜଳ ଏବଂ ପରିମଳ ବିଭାଗର ସଚିବ ବିନୀ ମହାଜନ ଗଣମାଧ୍ୟମକୁ କହିଛନ୍ତି ଯେ, ବର୍ତ୍ତମାନ ପର୍ଯ୍ୟନ୍ତ ପ୍ଲାଷ୍ଟିକ ବର୍ଜ୍ୟବସ୍ତୁରୁ ୪୦ ହଜାର କିଲୋମିଟର ଗ୍ରାମୀଣ ରାସ୍ତା ନିର୍ମାଣ କରାଯାଇଛି ।
ସେଥିମଧ୍ୟରୁ ଗତ ଦୁଇ ବର୍ଷ ମଧ୍ୟରେ ୧୩ ହଜାର କିଲୋମିଟର ନିର୍ମାଣ କାର୍ଯ୍ୟ ଶେଷ ହୋଇଛି । ମହାଜନ କହିଛନ୍ତି ଯେ, ସ୍ୱଚ୍ଛତା ଅଭିଯାନ ଅଧୀନରେ ୫୫ ପ୍ରତିଶତ ରୁ ଅଧିକ ଗାଁକୁ ‘ଓଡିଏଫ୍ ପ୍ଲସ୍ ମଡେଲ୍’ ଘୋଷିତ କରାଯାଇଛି । ଏହା ସହିତ,୫ ଲକ୍ଷରୁ ଅଧିକ ବର୍ଜ୍ୟବସ୍ତୁ ସଂଗ୍ରହ ଗାଡି କାମ କରୁଛି ଏବଂ ଗ୍ରେ ଓ୍ବାଟର ଏବଂ ପ୍ଲାଷ୍ଟିକ ବର୍ଜ୍ୟବସ୍ତୁ ପରିଚାଳନାରେ ଉଲ୍ଲେଖନୀୟ ଅଗ୍ରଗତି ହୋଇଛି ।
ସେ କହିଛନ୍ତି, “ଏହି ଉଦ୍ଭାବନଗୁଡ଼ିକ ଆମର ସ୍ଥାୟୀ ଅଭିବୃଦ୍ଧି ଏବଂ ଏକ ସ୍ୱଚ୍ଛ ଭାରତ ଭବିଷ୍ୟତ ପ୍ରତି ଆମର ପ୍ରତିବଦ୍ଧତାକୁ ପ୍ରତିଫଳିତ କରେ।”
‘ସ୍ୱଚ୍ଛତା ହିଁ ସେବା-୨୦୨୪’ ଅଭିଯାନର ଅଗ୍ରଗତି ବିଷୟରେ ଆଲୋଚନା କରି ମହାଜନ କହିଛନ୍ତି ଯେ ଏହି ପଦକ୍ଷେପ ଅନୁଯାୟୀ ୧୭ କୋଟିରୁ ଅଧିକ ଲୋକଙ୍କ ଅଂଶଗ୍ରହଣରେ ୧୯.୭୦ ଲକ୍ଷରୁ ଅଧିକ କାର୍ଯ୍ୟକ୍ରମ ଆୟୋଜିତ ହୋଇଛି । ପ୍ରାୟ ୬.୫ ଲକ୍ଷ ପରିମଳ ୟୁନିଟ୍ କୁ ନବୀକରଣ କରାଯାଇଛି ଏବଂ ୩୦ ଲକ୍ଷରୁ ଅଧିକ ସଫାଇ ମିତ୍ର ଏକ ଲକ୍ଷ ସଫାଇ ମିତ୍ର ସୁରକ୍ଷା ଶିବିରରୁ ଉପକୃତ ହୋଇଛନ୍ତି । ଏହା ବ୍ୟତୀତ ‘ମା ପାଇଁ ଗଛଟିଏ ‘ ଅଭିଯାନ ଅଧୀନରେ ୪୫ ଲକ୍ଷରୁ ଅଧିକ ଗଛ ଲଗାଯାଇଛି ।