DK Shivakumar: ବିଧାନସଭାରେ ଆରଏସଏସ ପ୍ରାର୍ଥନା ଗାଇଲେ କର୍ଣ୍ଣାଟକ ଉପମୁଖ୍ୟମନ୍ତ୍ରୀ, ପାଳିଆ ଧରିଲେ ବିଜେପି ବିଧାୟକ….

ବେଙ୍ଗାଲୁରୁ: ଆଜି କର୍ଣ୍ଣାଟକ ବିଧାନସଭାରେ କିଛି ଏମିତି ରୋଚକ ଦୃଶ୍ୟ ଦେଖିବାକୁ ମିଳିଛି, ଯାହା ସମସ୍ତଙ୍କୁ ଚକିତ କରିଛି । ବିଧାନସଭା ଚାଲିଥିବା ବେଳେ ଉପମୁଖ୍ୟମନ୍ତ୍ରୀ ତଥା କଂଗ୍ରେସ ରାଜ୍ୟ ସଭାପତି ଡିକେ ଶିବକୁମାର ରାଜ୍ୟ ବିଧାନସଭାରେ ଆରଏସଏସ ପ୍ରାର୍ଥନା ଗାଇ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲେ । ଚିନ୍ନାସ୍ୱାମୀ ଷ୍ଟାଡିୟମ ନିକଟରେ ଦଳାଚକଟା ଉପରେ ଆଲୋଚନା ସମୟରେ ଡିକେ ଶିବକୁମାର ରାଷ୍ଟ୍ରୀୟ ସ୍ୱୟଂସେବକ ସଂଘ (RSS) ପ୍ରାର୍ଥନାର କିଛି ଧାଡ଼ି ଗାଇଥିଲେ। କଂଗ୍ରେସ ନେତାଙ୍କ ମୁହଁରୁ ଏହି ଧାଡ଼ିଗୁଡ଼ିକ ଶୁଣି ବିଧାନସଭା ଭିତରେ ଥିବା ସମସ୍ତ ନେତା ସ୍ତବ୍ଧ ହୋଇଯାଇଥିଲେ ।

ଆଇପିଏଲରେ ଆରସିବିର ବିଜୟ ପରେ ଆୟୋଜିତ କାର୍ଯ୍ୟକ୍ରମରେ ଦଳାଚକଟାରେ ୧୧ ଜଣଙ୍କର ମୃତ୍ୟୁ ହୋଇଥିଲା। ଯେତେବେଳେ ବିଜେପି ବିଧାୟକମାନେ ତାଙ୍କୁ ‘ଦଳାଚକଟା ସମୟରେ ଉତ୍ତେଜିତ’ ବୋଲି ଅଭିଯୋଗ କରୁଥିଲେ, ସେତେବେଳେ ଶିବକୁମାର ଆରଏସଏସ ଶାଖାଗୁଡ଼ିକରେ ପଢ଼ାଯାଇଥିବା ‘ନମସ୍ତେ ସଦା ଭତ୍ସଲେ ମାତୃଭୂମି…’ ପ୍ରାର୍ଥନାର ପ୍ରଥମ କିଛି ଧାଡ଼ି ଗାଉଥିବାର ଦେଖାଯାଇଥିଲା।  ଆଉ ଏହା ପରେ ବିଜେପି ବିଧାୟକ ତାଙ୍କୁ ଉତ୍ସାହିତ କରିବାର ଦେଖାଯାଇଥିଲା ।

ତେବେ ବିଧାନସଭା ଆରମ୍ଭ ରୁ ବିରୋଧୀ ବିଧାୟକମାନେ ଅଭିଯୋଗ କରିଥିଲେ ଯେ ଶିବକୁମାର ବେଙ୍ଗାଲୁରୁ ବିମାନବନ୍ଦରରେ ଆରସିବି ଦଳର ଆଗମନରେ ଖେଳାଳିମାନଙ୍କୁ ସ୍ୱାଗତ କରିବାକୁ ଯାଇଥିଲେ। ବିମାନବନ୍ଦରରୁ ଚିନ୍ନାସ୍ୱାମୀ ଷ୍ଟାଡିୟମ ପର୍ଯ୍ୟନ୍ତ ଯାତ୍ରା ସମୟରେ ସେ କନ୍ନଡ ପତାକା ହଲାଇ ଚାଲିଥିଲେ। ଏହି ଅଭିଯୋଗଗୁଡ଼ିକର ଜବାବ ଦେଇ ଶିବକୁମାର କହିଥିଲେ, ମୁଁ କର୍ଣ୍ଣାଟକ ରାଜ୍ୟ କ୍ରିକେଟ ଆସୋସିଏସନ (କେଏସସିଏ)ର ସଦସ୍ୟ। କେଏସସିଏ ସଚିବ ସମେତ ସଂଗଠନର ଲୋକମାନେ ମୋର ବନ୍ଧୁ। ମୁଁ ବେଙ୍ଗାଲୁରୁର ଦାୟିତ୍ୱରେ ଥିବା ମନ୍ତ୍ରୀ। ମୁଁ ବିମାନବନ୍ଦର ଏବଂ ଷ୍ଟାଡିୟମକୁ ଜୁନ୍ ୪ ତାରିଖରେ ଯାଇଥିଲି । ମୁଁ କର୍ଣ୍ଣାଟକ ପତାକା ମଧ୍ୟ ଧରିଥିଲି, ଆରସିବି ଶୁଭେଚ୍ଛା ଜଣାଇଥିଲି ଏବଂ କପକୁ ଚୁମ୍ବନ ମଧ୍ୟ କରିଥିଲି। ମୁଁ ମୋର କାମ କରିଥିଲି । ସେ ଆହୁରି କହିଥିଲେ, ଦୁର୍ଘଟଣା ଘଟିଛି। ଏପରି ଘଟଣା ଅନ୍ୟ ରାଜ୍ୟରେ ମଧ୍ୟ ଘଟିଛି । ଆବଶ୍ୟକ ହେଲେ, ମୁଁ ଅନ୍ୟ ସ୍ଥାନରେ ଘଟିଥିବା ଘଟଣାର ତାଲିକା ମଧ୍ୟ ପଢ଼ି ଶୁଣାଇବି। ମୋର ଆପଣଙ୍କ ବିଷୟରେ ମଧ୍ୟ ବହୁତ କିଛି କହିବାକୁ ଅଛି।

ଉପମୁଖ୍ୟମନ୍ତ୍ରୀ ଡିକେ ଶିବକୁମାର ମଧ୍ୟ କହିଥିଲେ ଯେ ସେ ଗୃହମନ୍ତ୍ରୀ ଜି ପରମେଶ୍ୱରଙ୍କ ସହିତ ବଢ଼ିଛନ୍ତି। ଏଥିରେ ବିରୋଧୀ ଦଳ ନେତା ବିଜେପି ଦଳର ଆର ଅଶୋକ ଶିବକୁମାରଙ୍କୁ ମନେ ପକାଇ ଦେଇଥିଲେ ଯେ ସେ ଥରେ କହିଥିଲେ ଯେ ସେ ‘ଆରଏସଏସ ଚଡ୍ଡି’ ପିନ୍ଧନ୍ତି। ଏହି ସମୟରେ, ଶିବକୁମାର ହସି ହସି କହିଥିଲେ ‘ନମସ୍ତେ ସଦା ଭତ୍ସଲେ ମାତୃଭୂମେ’ ଗାଇବା ଆରମ୍ଭ କରିଥିଲେ। ବିରୋଧୀ ଦଳ ଏହା ଶୁଣି ଟେବୁଲ ବାଡ଼େଇ ମନ୍ତ୍ରୀଙ୍କୁ ଉତ୍ସାହିତ କରିଥିଲେ, କିନ୍ତୁ କଂଗ୍ରେସ ଶିବିରରେ ନୀରବତା ଥିଲା । ଏହାପରେ ବିଜେପି ବିଧାୟକ ଭି. ସୁନୀଲ କୁମାର କଟାକ୍ଷ କରି କହିଥିଲେ, ଆଶା କରୁଛି ଏହି ଧାଡ଼ିଗୁଡ଼ିକୁ ଗୃହର ରେକର୍ଡରୁ ହଟାଯିବ ନାହିଁ।