Rakesh Kishore Attacking CJI: ସୁପ୍ରିମକୋର୍ଟ CJIଙ୍କ ଉପରକୁ ଜୋତା ଫିଙ୍ଗିଲେ…କିଏ ଏହି ରାକେଶ କିଶୋର?, କାହିଁକି କଲେ ଏପରି ଦୁଃସାହାସ…

ନୂଆଦିଲ୍ଲୀ: ସୋମବାର ସୁପ୍ରିମକୋର୍ଟରେ ଏକ ନିୟମିତ ଶୁଣାଣି ଭୟଙ୍କର ମୋଡ଼ ନେଇଥିଲା, ଯେତେବେଳେ ଜଣେ ବ୍ୟକ୍ତି ଭାରତର ମୁଖ୍ୟ ବିଚାରପତି ବି.ଆର. ଗଭାଇଙ୍କ ଉପରକୁ ଜୋତା ଫିଙ୍ଗିଥିଲେ। ମୁଖ୍ୟ ବିଚାରପତିଙ୍କୁ କୌଣସି ଶାରୀରିକ ଆଘାତ ଲାଗିନଥିଲା କାରଣ ଜୋତା କେବଳ ତାଙ୍କ ପାଦକୁ ଛୁଇଁଥିଲା। କିନ୍ତୁ ଏହି ଘଟଣା ଭାରତୀୟ ନ୍ୟାୟପାଳିକାର ଇତିହାସରେ ଏକ ଦାଗ ଛାଡ଼ିଥିଲା। ତଥାପି, ଶୁଣାଣି ସମୟରେ ଜଷ୍ଟିସ ଗଭାଇ ସମ୍ପୂର୍ଣ୍ଣ ଶାନ୍ତ ରହିଥିଲେ। ଗଭାଇ କହିଛନ୍ତି ଯେ ଏପରି ଘଟଣା ଦ୍ୱାରା ସେ ପ୍ରଭାବିତ ହୋଇନାହାଁନ୍ତି। “ଆପଣଙ୍କ ଯୁକ୍ତି ଜାରି ରଖିବା ଉଚିତ।”

ତେବେ ସିଜେଆଇ ଗଭାଇଙ୍କ ଉପରକୁ ଜୋତା ଫିଙ୍ଗିଥିବା ଅଭିଯୁକ୍ତ ପେଶାରେ ଜଣେ ଓକିଲ। ତାଙ୍କ ନାମ ରାକେଶ କିଶୋର। କୋର୍ଟ କର୍ମଚାରୀମାନେ ତାଙ୍କୁ ଧରି ପୋଲିସକୁ ହସ୍ତାନ୍ତର କରିଥିଲେ। ଜୋତା ଫିଙ୍ଗିବାକୁ ଚେଷ୍ଟା କରିବା ପୂର୍ବରୁ, ୭୨ ବର୍ଷୀୟ ଓକିଲ ଚିତ୍କାର କରି କହିଥିଲେ, “ସନାତନ ଧର୍ମର ଅପମାନକୁ ବରଦାସ୍ତ କରାଯିବ ନାହିଁ।” ପୋଲିସ ଅଧିକାରୀଙ୍କ ଉଦ୍ଧୃତି ଅନୁଯାୟୀ, ରାକେଶ କିଶୋର ସୁପ୍ରିମକୋର୍ଟ ବାର ଆସୋସିଏସନର ଜଣେ ପଞ୍ଜିକୃତ ସଦସ୍ୟ ଏବଂ ଦିଲ୍ଲୀର ମୟୂର ବିହାର ଅଞ୍ଚଳରେ ରୁହନ୍ତି। ସେ ୨୦୦୯ ମସିହାରେ ଦିଲ୍ଲୀ ବାର କାଉନସିଲରେ ନାମ ପଞ୍ଜୀକରଣ କରିଥିଲେ। ବରିଷ୍ଠ ଓକିଲ ଅନେକ ବାର ଆସୋସିଏସନର ଦୀର୍ଘକାଳୀନ ସଦସ୍ୟତା ପାଇଁ ଆଇନଗତ ସମାଜରେ ଜଣାଶୁଣା। ରାକେଶ କିଶୋରଙ୍କ ପାଖରେ ସୁପ୍ରିମକୋର୍ଟ ବାର ଆସୋସିଏସନ, ଶାହଦରା ବାର ଆସୋସିଏସନ ଏବଂ ଦିଲ୍ଲୀ ବାର କାଉନସିଲର ସଦସ୍ୟତା କାର୍ଡ ଥିବା ଜଣାପଡିଛି।

ତେବେ କହିରଖୁଛୁ, ଏହି ଘଟଣା ମଧ୍ୟପ୍ରଦେଶର ଖଜୁରାହୋ କମ୍ପ୍ଲେକ୍ସରେ ଏକ କ୍ଷତିଗ୍ରସ୍ତ ବିଷ୍ଣୁ ମୂର୍ତ୍ତିର ପୁନରୁଦ୍ଧାର ପାଇଁ ଏକ ଆବେଦନ ସହିତ ଜଡିତ। ଏହି ଘଟଣାଟି ମୁଖ୍ୟ ବିଚାରପତି ଗଭାଇଙ୍କ ଏକ ଶୁଣାଣି ସମୟରେ ବିବାଦୀୟ ମନ୍ତବ୍ୟ, “ଯାଅ ଏବଂ ଭଗବାନଙ୍କୁ ମାଗ” ଦେବାର କିଛି ସପ୍ତାହ ପରେ ଘଟିଛି।

ସେପ୍ଟେମ୍ବର ୧୬ ତାରିଖରେ, ସୁପ୍ରିମକୋର୍ଟ ଖଜୁରାହୋର ଜାଭାରି ମନ୍ଦିରରେ ଥିବା ଭଗବାନ ବିଷ୍ଣୁଙ୍କ ସାତ ଫୁଟ ଉଚ୍ଚ ପ୍ରତିମା ପୁନଃନିର୍ମାଣ ଏବଂ ପୁନଃସ୍ଥାପନ ପାଇଁ ନିର୍ଦ୍ଦେଶ ଦାବି କରୁଥିବା ଏକ ଆବେଦନକୁ ଖାରଜ କରି ଦେଇଥିଲେ। ଆବେଦନକୁ ଖାରଜ କରି କୋର୍ଟ ଏହାକୁ ଏକ ପ୍ରଚାର ଆବେଦନ ବୋଲି କହିଥିଲେ। ମୁଖ୍ୟ ବିଚାରପତି ଗଭାଇ ସେତେବେଳେ କହିଥିଲେ, “ଏହା ସମ୍ପୂର୍ଣ୍ଣ ଭାବରେ ଏକ ପ୍ରଚାର ଆବେଦନ। ଯାଇ ଈଶ୍ୱରଙ୍କୁ କିଛି କରିବାକୁ କୁହନ୍ତୁ। ଯଦି ଆପଣ ଭଗବାନ ବିଷ୍ଣୁଙ୍କ ଜଣେ ଦୃଢ଼ ଭକ୍ତ ବୋଲି ଦାବି କରନ୍ତି, ତେବେ ଟିକେ ପ୍ରାର୍ଥନା କରନ୍ତୁ ଏବଂ ଧ୍ୟାନ କରନ୍ତୁ।” ଯାହାକୁ ନେଇ ହିନ୍ଦୁ ସଂଗଠନଗୁଡ଼ିକ ସିଜେଆଇଙ୍କ ଏହି ମନ୍ତବ୍ୟ ଉପରେ ଅସନ୍ତୋଷ ପ୍ରକାଶ କରିଥିଲେ, ଯାହା ସୋସିଆଲ ମିଡିଆରେ ବିତର୍କ ସୃଷ୍ଟି କରିଥିଲା। ଆଉ ଏହାକୁ ନେଇ କ୍ରୋଧିତ ହୋଇ ସିଜେଆଇଙ୍କ ଉପରକୁ ଚପଲ ଫିଙ୍ଗିଥିଲେ ଅଭିଯୁକ୍ତ ଓକିଲ ।