ନୂଆଦିଲ୍ଲୀ: ସାଉଦି ଆରବରେ ଶରିଆ ଆଇନ ଅନୁଯାୟୀ ମଦ୍ୟ ତିଆରି, ଆମଦାନି, ବିକ୍ରି, ରଖିବା ଓ ପିଇବା ଉପରେ କଡ଼ା ନିଷେଧାଦେଶ ରହିଛି। ଏହି ନିୟମ ମୁସଲମାନ ଓ ଅଣ-ମୁସଲମାନ ସମସ୍ତଙ୍କ ପାଇଁ ସମାନ ଭାବେ ଲାଗୁ ହୋଇଥାଏ। କିନ୍ତୁ ବର୍ତ୍ତମାନ ବିଦେଶୀ ଅଣ-ମୁସଲମାନଙ୍କ ପାଇଁ କିଛି ନିର୍ଦ୍ଦିଷ୍ଟ ସର୍ତ୍ତରେ ଛୁଟ୍ ଦିଆଯାଇଛି। ତେବେ ପ୍ରଶ୍ନ ଉଠୁଛି – ଯଦି କୌଣସି ମୁସଲମାନ ମଦ୍ୟପାନ କରନ୍ତି, ତାଙ୍କୁ କେତେ ଶାସ୍ତି ମିଳେ?
ସାଉଦି ଆରବରେ ମଦ ରଖିବା, ପିଇବା କିମ୍ବା ବିକ୍ରି କରିବା ଗମ୍ଭୀର ଅପରାଧ। ଏହା ଧରାପଡ଼ିଲେ..
• ସାର୍ବଜନିକ ଭାବେ ୪୦ରୁ ୮୦ ପାହାର ମାଡ଼
• ୬ ମାସରୁ କେତେକ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ
• ବଡ଼ ଧରଣର ଜୋରିମାନା
ଯଦି ଅପରାଧୀ ବିଦେଶୀ ହୁଅନ୍ତି, ତେବେ ତାଙ୍କୁ ଦେଶରୁ ନିର୍ବାସିତ କରାଯାଏ। ବଡ଼ କଥା ହେଲା – ଶାସ୍ତି ଦେବା ସମୟରେ ମୁସଲମାନ ଓ ଅଣ-ମୁସଲମାନ ମଧ୍ୟରେ କୌଣସି ଭେଦଭାବ କରାଯାଏ ନାହିଁ। ଗତ କିଛି ବର୍ଷ ମଧ୍ୟରେ ସାଉଦି ସରକାର ଅଣ-ମୁସଲମାନ ବିଦେଶୀଙ୍କ ପାଇଁ ମଦ୍ୟପାନରେ କିଛି ଛୁଟ୍ ଦେଇଛନ୍ତି। କିନ୍ତୁ ଏହା କେବଳ ସେହି ବିଦେଶୀଙ୍କ ପାଇଁ ଯାହାଙ୍କର ମାସିକ ଆୟ ୫୦ ହଜାର ରିୟାଲ (ପ୍ରାୟ ୧୧ ଲକ୍ଷ ଟଙ୍କା)ରୁ ଅଧିକ। ଏହି ଛୁଟ୍ ସାଧାରଣ ନାଗରିକ କିମ୍ବା ସାଉଦି ମୁସଲମାନଙ୍କ ପାଇଁ ନୁହେଁ।
ଏହି ପରିବର୍ତ୍ତନର ମୁଖ୍ୟ କାରଣ ହେଉଛି ୨୦୩୪ ଫିଫା ବିଶ୍ୱକପ୍। ଏହା ସହିତ ତୈଳ ବ୍ୟତୀତ ଅନ୍ୟ ଆୟ ବଢ଼ାଇବା ଓ ପର୍ଯ୍ୟଟନକୁ ପ୍ରୋତ୍ସାହିତ କରିବା ଲକ୍ଷ୍ୟରେ ସାଉଦି ଆରବ ଏହି ପଦକ୍ଷେପ ନେଇଛି। ଅର୍ଥାତ୍ ଶରିଆ ଆଇନରେ କୌଣସି ବଡ଼ ପରିବର୍ତ୍ତନ ନାହିଁ, କେବଳ ଅର୍ଥନୈତିକ ଓ ପର୍ଯ୍ୟଟନ ଲକ୍ଷ୍ୟ ପାଇଁ ଅଣ-ମୁସଲମାନ ବିଦେଶୀଙ୍କୁ ସୀମିତ ଛୁଟ୍ ଦିଆଯାଇଛି। ମୁସଲମାନଙ୍କ ପାଇଁ ମଦ୍ୟପାନ ନିଷେଧ ଆଗଭଳି କଡ଼ା ରହିଛି।
