Japan Election: ଜାପାନ ନିର୍ବାଚନରେ ପ୍ରଧାନମନ୍ତ୍ରୀ ତାକାଇଚିଙ୍କ ଐତିହାସିକ ବିଜୟ, ଅଭିନନ୍ଦନ ଜଣାଇଲେ ମୋଦି
ଟୋକିଓ: ଜାପାନ ପ୍ରଧାନମନ୍ତ୍ରୀ ସାନାଏ ତାକାଇଚି ରବିବାର ଏକ ଐତିହାସିକ ବିଜୟ ହାସଲ କରିଛନ୍ତି । ଭୋଟ୍ ଶେଷ ହେବାର ଦୁଇ ଘଣ୍ଟା ମଧ୍ୟରେ ତାକାଇଚିଙ୍କ ମେଣ୍ଟ ବହୁମତ ପାଇଁ ଆବଶ୍ୟକ ୨୩୩ ଆସନ ଅତିକ୍ରମ କରିଛି । ତାଙ୍କ ଲିବରଲ୍ ଡେମୋକ୍ରାଟିକ୍ ପାର୍ଟି (LDP) ଏକ ବିଶାଳ ବିଜୟ ହାସଲ କରିଛି, ଯାହାକୁ ଏପର୍ଯ୍ୟନ୍ତ ଏହାର ସର୍ବୋତ୍ତମ ପ୍ରଦର୍ଶନ ମଧ୍ୟରୁ ଗୋଟିଏ ବୋଲି ବିବେଚନା କରାଯାଉଛି ।
ଗଣମାଧ୍ୟମ ରିପୋର୍ଟ ଅନୁଯାୟୀ, ଭୋଟିଂ ଶେଷ ହେବାର ମାତ୍ର ଦୁଇ ଘଣ୍ଟା ପରେ ଲିବରଲ୍ ଡେମୋକ୍ରାଟିକ୍ ପାର୍ଟି ବହୁମତ ସଂଖ୍ୟା ଅତିକ୍ରମ କରିଛି । ପ୍ରଧାନମନ୍ତ୍ରୀ ତାକାଇଚିଙ୍କ ଦଳକୁ ବହୁମତ ପାଇଁ ୨୩୩ ଆସନ ଆବଶ୍ୟକ ଥିଲା, ଯାହାକୁ ସେ ସହଜରେ ହାସଲ କରିନେଇଥିଲା । ୬୪ ବର୍ଷୀୟ ତାକାଇଚିଙ୍କ ନେତୃତ୍ୱରେ ଏଲଡିପି ୪୬୫ ଆସନରୁ ୩୧୨ ଆସନ ଜିତିଥିଲା, ଯାହା ୨୩୩ ଆସନ ବିଶିଷ୍ଟ ବହୁମତ ସଂଖ୍ୟାଠାରୁ ବହୁତ ଅଧିକ ।
ପ୍ରଧାନମନ୍ତ୍ରୀ ତାକାଇଚିଙ୍କୁ ତାଙ୍କ ଜବରଦସ୍ତ ବିଜୟ ପାଇଁ ଅନେକ ଦେଶର ରାଷ୍ଟ୍ରପତି ଏବଂ ପ୍ରଧାନମନ୍ତ୍ରୀ ଅଭିନନ୍ଦନ ଜଣାଇଛନ୍ତି । ଆମେରିକା ରାଷ୍ଟ୍ରପତି ଟ୍ରମ୍ପ ଏବଂ ପ୍ରଧାନମନ୍ତ୍ରୀ ମୋଦି ମଧ୍ୟ ସେମାନଙ୍କ ସୋସିଆଲ ମିଡିଆ ହ୍ୟାଣ୍ଡେଲ ମାଧ୍ୟମରେ ତାକାଇଚିଙ୍କୁ ତାଙ୍କ ଜବରଦସ୍ତ ବିଜୟ ପାଇଁ ଅଭିନନ୍ଦନ ଜଣାଇଛନ୍ତି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାପାନୀ ପ୍ରତିନିଧି ସଭା ନିର୍ବାଚନରେ ସାନାଏ ତାକାଇଚିଙ୍କୁ ତାଙ୍କର ଐତିହାସିକ ବିଜୟ ପାଇଁ ଅଭିନନ୍ଦନ ଜଣାଇଛନ୍ତି । ତାଙ୍କ ସୋସିଆଲ ମିଡିଆ ହ୍ୟାଣ୍ଡେଲ, ଏକ୍ସ ରୁ ପୋଷ୍ଟ କରି ସେ ଲେଖିଛନ୍ତି, “ଭାରତ-ଜାପାନ ସ୍ୱତନ୍ତ୍ର ରଣନୈତିକ ଏବଂ ବିଶ୍ୱ ସହଭାଗୀତା ବିଶ୍ୱରେ ଶାନ୍ତି, ସ୍ଥିରତା ଏବଂ ସମୃଦ୍ଧିକୁ ପ୍ରୋତ୍ସାହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ । ମୁଁ ନିଶ୍ଚିତ ଯେ ଆପଣଙ୍କ ସକ୍ଷମ ନେତୃତ୍ୱରେ, ଆମେ ଭାରତ-ଜାପାନ ବନ୍ଧୁତାକୁ ଆହୁରି ଉଚ୍ଚତାକୁ ନେଇଯିବୁ।”