Mamata’s TMC at split: ଫାଳ ଫାଳ ଦିଦିଙ୍କ ଦଳ! ବିଧାନସଭାରେ ବିଦ୍ରୋହୀ ୫୯ ବିଧାୟକଙ୍କ ଦସ୍ତଖତ…କାହା ହାତକୁ ଯିବ ଫୁଲ ମାଲିକାନା?

କୋଲକାତା: ପଶ୍ଚିମବଙ୍ଗ ନିର୍ବାଚନରେ ଦୟନୀୟ ପରାଜୟ ପରେ ଏବେ ମମତା ବାନାର୍ଜିଙ୍କ ଦଳ ବଡ ବିପର୍ଯ୍ୟୟର ସାମ୍ନା କରୁଛି । ମମତା ବାନାର୍ଜିଙ୍କ ନେତୃତ୍ବାଧୀନ ତୃଣମୂଳ କଂଗ୍ରେସ ବା ଟିଏମସି ଏବେ ଖଣ୍ଡ ଖଣ୍ଡ ହେବା ଉପରେ । ବିଧାନସଭାରେ ପରାଜୟ୍ର ପରେ ଦଳ ଭିତରେ ଏବେ ଅସନ୍ତୋଷର ନିଆଁ ଜଳୁଛି । ଯାହା ଏବେ ମମତାଙ୍କ ସହିତ ଟିଏମସିର ଅସ୍ତିତ୍ବକୁ ବିପଦରେ ପକାଇଛି । ଆଉ ବୁଧବାର ଏହି ବିଦ୍ରୋହର ବହ୍ନି ତୀବ୍ର ହୋଇଛି । ବହିଷ୍କୃତ ତୃଣମୂଳ କଂଗ୍ରେସ ବିଧାୟକ ରୀତାବ୍ରତ ବାନାର୍ଜୀ ୫୮ ବିଧାୟକଙ୍କ ଦସ୍ତଖତ ସହିତ ରାଜ୍ୟ ବିଧାନସଭାରେ ପହଞ୍ଚିଥିବା ଜଣାପଡ଼ିଛି।

ବିଦ୍ରୋହୀ ଟିଏମସି ବିଧାୟକମାନେ ବଙ୍ଗଳା ବିଧାନସଭାରେ ଏକ ବୈଠକ କରିଥିଲେ। ବିଦ୍ରୋହୀମାନେ ପ୍ରାୟ ୫୮ ଜଣ ବିଧାୟକଙ୍କ ଦସ୍ତଖତ ସହିତ ଏକ ପତ୍ର ବାଚସ୍ପତିଙ୍କ ନିକଟରେ ଦାଖଲ କରିଛନ୍ତି, ଯେଉଁଥିରେ ରୀତାବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା କରିବାକୁ ଦାବି କରାଯାଇଛି। ଏଥିସହିତ ସିଉଲି ସାହା ଏବଂ ଜାଭେଦ ଖାନଙ୍କୁ ବିରୋଧୀ ଦଳ ଉପନେତା ନିଯୁକ୍ତ ପାଇଁ ଦାବି କରାଯାଇଛି। ଯାହା ଏବେ ଟିଏମସିରେ ମହାରାଷ୍ଟ୍ରର ରାଜନୈତିକ ବିଭାଜନକୁ ଅଧିକ ଇନ୍ଧନ ଦେଇଛି ।

ଦୁଇ ବିଦ୍ରୋହୀ TMC ବିଧାୟକ, ରୀତାବ୍ରତ ବାନାର୍ଜୀ ଏବଂ ସନ୍ଦିପନ ସାହା, ନିଜକୁ ପ୍ରକୃତ TMC ବିଧାୟକ ବୋଲି ଘୋଷଣା କରିଛନ୍ତି ଏବଂ ୫୯ ବିଧାୟକଙ୍କ ଦସ୍ତଖତ ଥିବା ଦାବି କରିଛନ୍ତି। ରୀତାବ୍ରତଙ୍କୁ ମମତା ବାନାର୍ଜୀଙ୍କ ଦ୍ୱାରା ସମ୍ପ୍ରତି ଦଳରୁ ବହିଷ୍କାର କରାଯାଇଥିଲା। ଏବେ ଦାବି କରାଯାଉଛି ଯେ ରୀତାବ୍ରତ ବାନାର୍ଜୀ ୫୯ ବିଧାୟକଙ୍କ ସହିତ ଏକ ପୃଥକ ଗୋଷ୍ଠୀ ଗଠନ କରିପାରନ୍ତି। ବିଦ୍ରୋହୀ ଗୋଷ୍ଠୀଙ୍କ କହିବା କଥା, ଦଳର ମୋଟ ୮୦ ଜଣ ବିଧାୟକଙ୍କ ମଧ୍ୟରୁ ପ୍ରାୟ ୬୦ ଜଣ ବିଧାୟକ ନିକଟରେ ବହିଷ୍କୃତ ହୋଇଥିବା ନେତା ରୀତାବ୍ରତ ବାନାର୍ଜୀଙ୍କୁ ସମର୍ଥନ କରି ଏକ ପୃଥକ ଗୋଷ୍ଠୀ ଗଠନ କରିବାକୁ ଯାଉଛନ୍ତି । ଯଦି ଏହି ବିଦ୍ରୋହ ସଫଳ ହୁଏ, ତେବେ ଟିଏମସି ସଂସଦୀୟ ଦଳ ଦୁଇ ଭାଗ ଅର୍ଥାତ୍ ୬୦ ଏବଂ ୨୦ରେ ବିଭକ୍ତ ହୋଇଯିବ । ଏଭଳି ପରିସ୍ଥିତିରେ ମମତା ବାନାର୍ଜୀଙ୍କ ଗୋଷ୍ଠୀ ସଂଖ୍ୟାଲଘୁ ହୋଇଯିବା ସହ ବିଧାନସଭାରେ ମୁଖ୍ୟ ବିରୋଧୀ ଦଳର ମାନ୍ୟତା ମଧ୍ୟ ହରାଇପାରେ ।

ଦଳ ଭିତରେ ବିଭାଜନର ବିପଦ ବିଷୟରେ ଟିଏମସି ମଧ୍ୟ ଅବଗତ। ତେଣୁ, ଟିଏମସି ସାଂସଦ କଲ୍ୟାଣ ବାନାର୍ଜୀ ବିଧାନସଭା ବାଚସ୍ପତିଙ୍କୁ ଚିଠି ଲେଖି ଶୋଭନଦେବ ଚଟ୍ଟୋପାଧ୍ୟାୟଙ୍କୁ ବିରୋଧୀ ଦଳ ନେତା ଭାବରେ ମାନ୍ୟତା ଦେବାକୁ ଦାବି କରିଛନ୍ତି। ଟିଏମସି ମଧ୍ୟ ଆଶାମା ପାତ୍ରଙ୍କୁ ବିରୋଧୀ ଦଳ ଉପନେତା ଏବଂ ନୟନା ବନ୍ଦୋପାଧ୍ୟାୟଙ୍କୁ ମୁଖ୍ୟ ସଚେତକ ଭାବରେ ନିଯୁକ୍ତି ଦେବାକୁ ଦାବି କରିଛି। କଲ୍ୟାଣ ବାନାର୍ଜୀ ତାଙ୍କ ଚିଠିରେ ଅତୀତର ପରମ୍ପରାକୁ ଉଲ୍ଲେଖ କରି ଦର୍ଶାଇଛନ୍ତି ଯେ ଯେତେବେଳେ ସେ ମେ ୧୫ ତାରିଖରେ ବାଚସ୍ପତି ନିର୍ବାଚିତ ହୋଇଥିଲେ, ଶୋଭନଦେବ ତାଙ୍କୁ ବିରୋଧୀ ଦଳ ନେତା ଭାବରେ ପୋଡିୟମକୁ ନେଇଯାଇଥିଲେ। ପରବର୍ତ୍ତୀ ସମୟରେ, ବାଚସ୍ପତି ତାଙ୍କ ଭାଷଣରେ ଶୋଭନଦେବଙ୍କୁ ବିରୋଧୀ ଦଳ ନେତା ଭାବରେ ଉଲ୍ଲେଖ କରିଥିଲେ।

ତେବେ କହିରଖୁଛୁ, ସାମ୍ପ୍ରତିକ ନିର୍ବାଚନରେ, ଟିଏମସିର ୮୦ ଜଣ ବିଧାୟକ ନିର୍ବାଚିତ ହୋଇଥିଲେ। ଏଥିମଧ୍ୟରୁ ଟିଏମସିକୁ ବିଭାଜନ ପାଇଁ ୫୪ ଜଣ ବିଧାୟକଙ୍କ ଆବଶ୍ୟକତା ଅଛି। ତଦନୁସାରେ, ଯଦି ୫୯ ଜଣ ବିଧାୟକ ଏକ ପୃଥକ ଗୋଷ୍ଠୀ ଗଠନ କରନ୍ତି ଏବଂ ମମତା ବାନାର୍ଜୀଙ୍କଠାରୁ ଅଲଗା ହୋଇଯାଆନ୍ତି, ତେବେ ଦଳ ପରିବର୍ତ୍ତନ ବିରୋଧୀ ଆଇନ ସେମାନଙ୍କ ଉପରେ ପ୍ରଯୁଜ୍ୟ ହେବ ନାହିଁ ଏବଂ ସେମାନେ ସେମାନଙ୍କର ସଦସ୍ୟତା ହରାଇବେ ନାହିଁ। ଯେକୌଣସି ଦଳରୁ ଅଲଗା ହୋଇ ଏକ ପୃଥକ ଦଳ ଗଠନ କରିବାକୁ ଦୁଇ-ତୃତୀୟାଂଶ ବହୁମତ ଆବଶ୍ୟକ।