Modi Cabinet Reshuffle: ମୋଦୀ କ୍ୟାବିନେଟ୍ରେ ବଡ଼ ଅଦଳବଦଳ ଚର୍ଚ୍ଚା! ଅକ୍ଟୋବର ୨୭ରେ ସବୁ ମନ୍ତ୍ରଣାଳୟର ‘ରିପୋର୍ଟ କାର୍ଡ’, ଦୀପାବଳି ପୂର୍ବରୁ ହୋଇପାରେ ବଡ଼ ଘୋଷଣା!
ନୂଆଦିଲ୍ଲୀ: କେନ୍ଦ୍ରରେ ମୋଦୀ ସରକାରଙ୍କ ମନ୍ତ୍ରିମଣ୍ଡଳରେ ହୋଇପାରେ ବଡ଼ ଅଦଳବଦଳ! ମନ୍ତ୍ରୀମାନଙ୍କ କାର୍ଯ୍ୟଦକ୍ଷତାର ସମୀକ୍ଷା ସହ ବିଭିନ୍ନ ମନ୍ତ୍ରଣାଳୟର କାମକୁ ନେଇ ଚାଲିଛି ପ୍ରସ୍ତୁତି। ଏଥିପାଇଁ ଆସନ୍ତା ଅକ୍ଟୋବର ୨୭ ତାରିଖରେ କ୍ୟାବିନେଟ୍ ସଚିବ ସମସ୍ତ ମନ୍ତ୍ରଣାଳୟର ସଚିବଙ୍କ ସହ ଏକ ଉଚ୍ଚସ୍ତରୀୟ ବୈଠକ କରିବେ। ଏହି ବୈଠକରେ ମନ୍ତ୍ରଣାଳୟଗୁଡ଼ିକର କାର୍ଯ୍ୟର ସମୀକ୍ଷା କରାଯାଇ ରିପୋର୍ଟ ପ୍ରସ୍ତୁତ ହେବ, ଯାହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଦିଆଯିବ ବୋଲି ରିପୋର୍ଟରେ କୁହାଯାଇଛି।
ସୂଚନା ଅନୁସାରେ, ସମସ୍ତ ମନ୍ତ୍ରଣାଳୟକୁ ନିଜ ନିଜ ବିଭାଗର ଯୋଜନା, ଯୋଜନାର ଅଗ୍ରଗତି, ଲୋକଙ୍କୁ ମିଳୁଥିବା ଲାଭ ଏବଂ ଆଗାମୀ ଦିନର କାର୍ଯ୍ୟଯୋଜନା ସମ୍ପର୍କରେ ରିପୋର୍ଟ ପ୍ରସ୍ତୁତ କରିବାକୁ କୁହାଯାଇଛି। ଅକ୍ଟୋବର ୨୭ର ବୈଠକରେ ପ୍ରତ୍ୟେକ ମନ୍ତ୍ରଣାଳୟର କାର୍ଯ୍ୟକୁ ପୃଥକ୍ ଭାବେ ସମୀକ୍ଷା କରାଯିବ। ଏହି ସମୀକ୍ଷାର ମୁଖ୍ୟ ଉଦ୍ଦେଶ୍ୟ ହେଉଛି ‘ଇଜ୍ ଅଫ୍ ଡୁଇଂ ବିଜନେସ୍’ ଅର୍ଥାତ୍ ବ୍ୟବସାୟ କରିବାକୁ ସହଜ କରିବା ଏବଂ ‘ଇଜ୍ ଅଫ୍ ଲିଭିଂ’ ଅର୍ଥାତ୍ ସାଧାରଣ ଲୋକଙ୍କ ଜୀବନକୁ ସରଳ କରିବା। ଏହି ରିପୋର୍ଟ ଆଧାରରେ ସରକାର ବଡ଼ ନୀତିଗତ ନିଷ୍ପତ୍ତି ନେଇପାରନ୍ତି ବୋଲି ଚର୍ଚ୍ଚା ହେଉଛି।
ପ୍ରଧାନମନ୍ତ୍ରୀ ମୋଦୀ ନିକଟରେ ସରକାରୀ ମୁଖ୍ୟ ଭାବେ ୨୫ ବର୍ଷ ପୂରଣ କରିଛନ୍ତି। ଏହି ଅବସରରେ ସେ ଜନସାଧାରଣଙ୍କ ବିଶ୍ୱାସକୁ ନିଜର ମୁଖ୍ୟ ଶକ୍ତି ବୋଲି ଉଲ୍ଲେଖ କରିବା ସହ ସଂସ୍କାରମୂଳକ ପଦକ୍ଷେପ ଜାରି ରଖିବାକୁ ଆଶ୍ୱାସନ ଦେଇଥିଲେ। ରିପୋର୍ଟ ଅନୁସାରେ, ଏହା ପୂର୍ବରୁ ଦୁଇଟି ମନ୍ଥନ ଶିବିରରେ ପ୍ରଧାନମନ୍ତ୍ରୀ ନିଜେ ମନ୍ତ୍ରୀମାନଙ୍କ କାର୍ଯ୍ୟର ସମୀକ୍ଷା କରିଥିଲେ। ଏବେ କ୍ୟାବିନେଟ୍ ସଚିବଙ୍କ ରିପୋର୍ଟ ମାଧ୍ୟମରେ ବିଭାଗୱାରୀ କାର୍ଯ୍ୟଦକ୍ଷତାର ଚୂଡ଼ାନ୍ତ ମୂଲ୍ୟାଙ୍କନ କରାଯିବାର ସମ୍ଭାବନା ରହିଛି।
ମୋଦୀ ସରକାରଙ୍କ ତୃତୀୟ ପାଳିରେ ମନ୍ତ୍ରିମଣ୍ଡଳର ସମ୍ପ୍ରସାରଣ ସହ ଅଦଳବଦଳ ହୋଇପାରେ ବୋଲି ଚର୍ଚ୍ଚା ଜୋର୍ ଧରିଛି। ଦୀପାବଳି ପୂର୍ବରୁ ଏନେଇ ଘୋଷଣା ହେବାର ସମ୍ଭାବନା ଥିବା କିଛି ରିପୋର୍ଟରେ ଉଲ୍ଲେଖ କରାଯାଇଛି। ତେବେ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ଘୋଷଣା ହୋଇନାହିଁ। ଅନ୍ୟପଟେ, କେନ୍ଦ୍ର ମନ୍ତ୍ରିପରିଷଦର କିଛି ପଦ ଖାଲି ଥିବା ନେଇ ମଧ୍ୟ ଆଲୋଚନା ହେଉଛି। ଶିକ୍ଷା ରାଷ୍ଟ୍ରମନ୍ତ୍ରୀ ଏଲ୍. ମୁରୁଗନ୍ଙ୍କ ପଦ ଓ ରାଜ୍ୟସଭା ସଦସ୍ୟତାରୁ ଇସ୍ତଫା ଦେବା କଥାକୁ ମଧ୍ୟ ଏହି ଚର୍ଚ୍ଚା ସହ ଯୋଡ଼ାଯାଉଛି।
କିଛି ମନ୍ତ୍ରୀଙ୍କ କାର୍ଯ୍ୟରେ ପ୍ରଧାନମନ୍ତ୍ରୀ ଅସନ୍ତୁଷ୍ଟ ଥିବା ଏବଂ ସେମାନଙ୍କୁ ମନ୍ତ୍ରିମଣ୍ଡଳରୁ ବାଦ୍ ଦିଆଯାଇପାରେ ବୋଲି ଚର୍ଚ୍ଚା ହେଉଛି। ଅନ୍ୟପଟେ, ନୂଆ ସାଂସଦଙ୍କୁ ମଧ୍ୟ ମନ୍ତ୍ରୀ ହେବାର ସୁଯୋଗ ମିଳିପାରେ ବୋଲି ଆଲୋଚନା ଚାଲିଛି। ତେବେ କେଉଁ ମନ୍ତ୍ରୀଙ୍କ ଦାୟିତ୍ୱ ବଦଳିବ, କାହାକୁ ନୂଆ ଦାୟିତ୍ୱ ମିଳିବ ଏବଂ ମନ୍ତ୍ରିମଣ୍ଡଳରେ ପ୍ରକୃତରେ ଅଦଳବଦଳ ହେବ କି ନାହିଁ, ତାହା ଏବେ ସ୍ପଷ୍ଟ ହୋଇନାହିଁ। ଅକ୍ଟୋବର ୨୭ର ବୈଠକ ଓ ଏହାର ରିପୋର୍ଟ ପରେ ହିଁ ସରକାରଙ୍କ ପରବର୍ତ୍ତୀ ପଦକ୍ଷେପ ସମ୍ପର୍କରେ ସ୍ପଷ୍ଟ ଚିତ୍ର ମିଳିପାରେ।
ବଡ଼ ପ୍ରଶ୍ନ ହେଉଛି, ଦୀପାବଳି ପୂର୍ବରୁ ମୋଦୀ କ୍ୟାବିନେଟ୍ରେ ହେବ କି ବଡ଼ ଫେରବଦଳ, ନା ରିପୋର୍ଟ ଆଧାରରେ ଆସିବ ନୂଆ ନୀତିଗତ ନିଷ୍ପତ୍ତି? ଏବେ ସମସ୍ତଙ୍କ ନଜର ଅକ୍ଟୋବର ୨୭ର ବୈଠକ ଉପରେ।