କରୋନା ଭୂତାଣୁ: ସିଙ୍ଗାପୁର ନ ଯିବାକୁ ନାଗରିକଙ୍କୁ ପରାମର୍ଶ

ନୂଆଦିଲ୍ଲୀ: ଦିନକୁ ଦିନ କାୟା ବିସ୍ତାର କରିବାରେ ଲାଗିଛି ମାରାତ୍ମକ ଭୂତାଣୁ କରୋନା । ଏହାକୁ ନଜରରେ ରଖି କେନ୍ଦ୍ର ସରକାର ସିଙ୍ଗାପୁର ନଯିବାକୁ ନାଗରିକଙ୍କୁ ପରାମର୍ଶ ଦେଇଛନ୍ତି । ନିହାତି ଜରୁରୀ କାମ ନଥିଲେ ଭାରତୀୟ ସିଙ୍ଗାପୁର ନଯିବା ପାଇଁ ପରାମର୍ଶ ଦିଆଯାଇଛି ।
ସୋମବାରଠୁ ନେପାଳ, ଇଣ୍ଡୋନେସିଆ, ଭିଏତନାମା, ମାଲେସିଆ ଆଦି ଦେଶରୁ ଭାରତ ଆସୁଥିବା ବିମାନ ଯାତ୍ରୀଙ୍କୁ ବିମାନ ବନ୍ଦରରେ ପରୀକ୍ଷା କରାଯିବ । ଏବେ ଚୀନ୍, ହଂକଂ, ଥାଇଲାଣ୍ଡ, ଦକ୍ଷିଣ କୋରିଆ, ସିଙ୍ଗାପୁର ଏବଂ ଜାପାନରୁ ଆସୁଥିବା ବିମାନ ଯାତ୍ରୀମାନଙ୍କୁ ୨୧ଟି ନିର୍ଦ୍ଧାରିତ ବିମାନ ବନ୍ଦରରେ ପରୀକ୍ଷା କରାଯାଉଛି । ସେମାନେ କରୋନା ଭୂତାଣୁରେ ସଂକ୍ରମିତ କି ନାହିଁ, ତାହା ପରୀକ୍ଷା କରାଯାଉଛି ।
ଏନେଇ ନୂଆଦିଲ୍ଲୀରେ କ୍ୟାବିନେଟ ସଚିବଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା । ଏଥିରେ କରୋନା ଭୂତାଣୁ ସଂକ୍ରମଣରେ ସ୍ଥିତି ଓ ଭାରତୀୟଙ୍କ ନିରାପତ୍ତା ନେଇ ସମୀକ୍ଷା କରାଯାଇଥିଲା । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ କହିଥିଲେ ଯେ, ସରକାରଙ୍କ ବ୍ୟାପକ ତଦାରଖ ବ୍ୟବସ୍ଥା ଓ ପଦକ୍ଷେପ ଯୋଗୁଁ ଭାରତ କରୋନା ସଂକ୍ରମଣରୁ ଏଯାଏଁ ସୁରକ୍ଷିତ ରହିଛି ।