କରୋନା ମୁକାବିଲା: ସ୍ୱତନ୍ତ୍ର ଟ୍ରେନରେ ଓଡ଼ିଶା ଆସିଲା ଔଷଧ ଓ ଜରୁରୀ ସାମଗ୍ରୀ

ଭୁବନେଶ୍ୱର: ରାଜ୍ୟର ବିଭିନ୍ନ ଷ୍ଟେସନରେ ପହଁଚିଛି ଔଷଧ ସମେତ ଜରୁରୀ ସାମଗ୍ରୀ । ପଲାସା, ବ୍ରହ୍ମପୁର, ବଲାଙ୍ଗୀର, ବରଗଡ, ସମ୍ବଲପୁର ଏବଂ ରାୟଗଡା ଷ୍ଟେସନରେ ଆଜି କାର୍ଟୁନରେ ଭର୍ତି ବିଭିନ୍ନ ଔଷଧ ପହଁଚିଛି । ବିଶାଖାପାଟଣା ଷ୍ଟେସନରୁ ସ୍ୱତନ୍ତ୍ର ପାର୍ସଲ ଏକ୍ସପ୍ରେସ ଟ୍ରେନରେ ଏସବୁ ଔଷଧ ଆସିଛି । ସେହିପରି କେସିଙ୍ଗା ଷ୍ଟେସନରେ ପହଁଚିଛି ବିଭିନ୍ନ ମେଡିକାଲ ଉପକରଣ ।ଏସବୁ ବାଦ ଦୁଗ୍ଧ ପାଉଡର ଏବଂ ଜରୁରୀ ଔଷଧ ବ୍ରହ୍ମପୁର ଷ୍ଟେସନରେ ପହଁଚିଛି । ସେହିପରି ବିିଜୟାନଗରମରୁ ଟିଟିଲାଗଡ ଏବଂ ବଲାଙ୍ଗୀରକୁ ପଇଡ ଆସିଥିବା ବେଳେ ରାୟଗଡାକୁ ଗ୍ରୋସରୀ ସାମଗ୍ରୀ ଆସିଛି ।
ଏଫସିଆଇ ଦ୍ୱାରା ମଧ୍ୟପ୍ରଦେଶର ଗରା ଷ୍ଟେସନରୁ ୫୮ଟି ୱାଗନରେ ୩୩୬୪ ଟନ୍ ଗହମ କଟକରେ ପହଁଚିଛି । ସେହିପରି ଶ୍ରୀକାକୁଲମ, ପେଣ୍ଡୁର୍ଥୀ, ବରଗଡ ଏବଂ ବଲାଙ୍ଗୀରରୁ ଦକ୍ଷିଣ ଭାରତ ଅଭିମୁଖେ ଚାଉଳ ନିଆଯାଇଛି ।
ମହାମାରୀ କରୋନା ଯୋଗୁଁ ସାରା ଦେଶରେ ଲକଡାଉନ୍ ଜାରି ରହିଥିବା ବେଳେ ଲୋକଙ୍କ ପାଖରେ କେମିତି ଜରୁରୀ ସାମଗ୍ରୀ ପହଁଚିବ ସେନେଇ ୨୪ ଘଂଟିଆ କାମରେ ଲାଗିଛି ଭାରତୀୟ ରେଳବାଇ । ସ୍ୱତନ୍ତ୍ର ମାଲ ପରିବହନ ଟ୍ରେନ୍ରେ ଖାଦ୍ୟ, ତେଲ, କୋଇଲା, ଫଳ ଏବଂ ପନିପରିବା ସମେତ କ୍ଷୀର, ଖାଇବା ତେଲ, ଚିନି ଏବଂ ଲୁଣ ଭଳି ଅତ୍ୟାବଶ୍ୟକ ସାମଗ୍ରୀ ପଠାଯାଇଛି । ଦେଶବାସୀଙ୍କୁ ଘରେ ରୁହନ୍ତୁ ଏବଂ ସୁସ୍ଥ ରୁହନ୍ତୁର ବାର୍ତା ଦେଇ କୋଭିଡ-୧୯ ବିରୋଧରେ ଲଢେଇ ଜାରି ରଖିଛନ୍ତି ଭାରତୀୟ ରେଳବାଇର ଯୋଦ୍ଧା ।