ବ୍ରିଜ ତଳକୁ ଖସିଲା ହାଇୱା, ୨ ନିଖୋଜ

ଝାରସୁଗୁଡା: ଝାରସୁଗୁଡା ରଂଫେଲ୍ ବ୍ରିଜ ତଳକୁ ଏକ ହାଇଓ୍ୱା ଖସି ପଡିଛି । ଫଳରେ ଏଥିରେ ଥିବା ୨ଜଣ ନିଖୋଜ ହୋଇଯାଇଛନ୍ତି । ହାଇଓ୍ଵାର ଚାଳକଙ୍କୁ ଉଦ୍ଧାର କରାଯାଇ ହସ୍‌ପିଟାଲରେ ଭର୍ତ୍ତି କରାଯାଇଛି। ନିଖୋଜ ଯୁବକ ଦ୍ୱୟ ହେଲେ ଜିତେନ୍ଦ୍ର ପ୍ରଧାନ ଓ ଅରବିନ୍ଦ ସାହୁ। ଉଦ୍ଧାର ହୋଇଥିବା ହାଇଓ୍ଵା ଚାଳକଙ୍କ ନାମ ଆଦିତ୍ୟ ସାହୁ।

ସୂଚନା ଅନୁସାରେ ଝାରସୁଗୁଡ଼ା ଜିଲ୍ଲା ବନହରପାଲି ଥାନା ଅନ୍ତର୍ଗତ ରମ୍ପେଲା ପଂଚାୟତର ବରକାନୀ ଗାଁର ତିନି ଜଣ ଯୁବକ ଜିତେନ୍ଦ୍ର ପ୍ରଧାନ, ଅରବିନ୍ଦ ସାହୁ ଓରଫ ପପୁ ଓ ଆଦିତ୍ୟ ସାହୁ ଆଜି ଅପରାହ୍ନ ପ୍ରାୟ ୧ଟାରେ ସମ୍ବଲପୁର ଜିଲ୍ଲା ରେଙ୍ଗାଲିରୁ ହାଇଓ୍ଵା ନେଇ ଇବ୍‌ ଥର୍ମାଲ ଆଡ଼କୁ ଯାଉଥିଲେ। ଯିବା ରାସ୍ତାରେ ଇବ୍‌ ସେତୁ ଉପରେ ଡାହାଡ଼ ପାର୍ଶ୍ୱକୁ ହାଇଓ୍ଵା ଖସିପଡ଼ିଥିଲା। ତେବେ ଇବ୍‌ ନଦୀରେ ଗଭୀର ପାଣି ଥିବାରୁ ହାଇଓ୍ଵାଟି ସଂପୂର୍ଣ୍ଣ ରୂପେ ବୁଡ଼ିଯାଇଛି। ତେବେ ୩ଜଣଙ୍କ ମଧ୍ୟରୁ ଜଣଙ୍କୁ ଉଦ୍ଧାର କରାଯାଇଛି । ଏବେବି ୨ ଜଣ ନିଖୋଜ ଅଛନ୍ତି ।