ବିଶାଖାପଟନମ: ଆନ୍ଧ୍ରପ୍ରଦେଶ ଉପମୁଖ୍ୟମନ୍ତ୍ରୀ ପବନ କଲ୍ୟାଣ ଜାତୀୟ ସ୍ତରରେ ‘ସନାତନ ଧର୍ମ ରକ୍ଷା ବୋର୍ଡ’ ଗଠନ କରିବାକୁ ଦାବି କରିଛନ୍ତି। ପ୍ରସିଦ୍ଧ ତିରୁମାଲା ଲଡୁ ପ୍ରସାଦରେ ପଶୁ ଚର୍ବି ମିଶାଯାଇଥିବା ଅଭିଯୋଗ ହେବା ପରେ ଏହି ଦାବି ଉଠିଛି। ଗୁଜୁରାଟର ଏକ ପରୀକ୍ଷାଗାରର ଏକ ରିପୋର୍ଟରେ ପ୍ରସାଦରେ ବ୍ୟବହୃତ ଘିଅରେ ଗାଈ ଚର୍ବି ଏବଂ ମାଛ ତେଲ ଥିବା କୁହାଯାଇଛି। ଏହି ଦାବିକୁ ନେଇ ଶ୍ରଦ୍ଧାଳୁଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ଆନ୍ଧ୍ରପ୍ରଦେଶ ଉପମୁଖ୍ୟମନ୍ତ୍ରୀ ପବନ କଲ୍ୟାଣ କହିଛନ୍ତି, ତିରୁପତି ବାଲାଜୀ ପ୍ରସାଦରେ ପଶୁ ଚର୍ବି ମିଶାଯାଉଥିବା ଖବରକୁ ନେଇ ଆମେ ସମସ୍ତେ ଦୁଃଖିତ। ଏହା ଦ୍ୱାରା ମନ୍ଦିରର ଅପମାନ, ଜମି ପ୍ରସଙ୍ଗ ଓ ଅନ୍ୟାନ୍ୟ ଧାର୍ମିକ ପ୍ରଥା ଉପରେ ଅନେକ ପ୍ରଶ୍ନ ଉଠୁଛି। ସମ୍ଭବତଃ ଜାତୀୟ ସ୍ତରରେ ଏକ ‘ସନାତନ ଧର୍ମ ରକ୍ଷା ବୋର୍ଡ’ ଗଠନ କରିବାର ସମୟ ଆସିଛି, ଯେଉଁଥିରେ ଭାରତର ମନ୍ଦିର ସହ ଜଡ଼ିତ ସମସ୍ତ ସମସ୍ୟାର ଅନୁଧ୍ୟାନ କରାଯିବ।
ରାମ ଜନ୍ମଭୂମି ମନ୍ଦିରର ମୁଖ୍ୟ ପୂଜକ ଆଚାର୍ଯ୍ୟ ସତ୍ୟେନ୍ଦ୍ର ଦାସ ଏହି ଘଟଣାକୁ ନିନ୍ଦା କରିବା ସହ ଏହା ଏକ ଠକେଇ ବୋଲି କହିଛନ୍ତି। ଏହା ଏକ ଜଘନ୍ୟ ଅପରାଧ ଏବଂ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ଭାବନାକୁ ଆଘାତ ଦେଇଛି। ଯଦି ଏହା ସତ, ତେବେ ଏହା ଏକ ଅକ୍ଷମୀୟ ଅପରାଧ ଏବଂ ଦୋଷୀଙ୍କୁ କଠୋର ଦଣ୍ଡ ମିଳିବା ଉଚିତ୍ ।
ତିରୁମାଲା ତିରୁପତି ଦେବସ୍ଥାନମ୍ (ଟିଟିଡି) କର୍ମଚାରୀ ସଂଘର ସଭାପତି କନ୍ଦ୍ରାପୁ ମୁରଲୀ ତିରୁମାଲା ଲଡୁ ପ୍ରସ୍ତୁତିରେ ପଶୁ ଚର୍ବି ବ୍ୟବହାର ଉପରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍ ଚନ୍ଦ୍ରବାବୁ ନାଇଡୁ ଦେଇଥିବା ମନ୍ତବ୍ୟକୁ ତୀବ୍ର ସମାଲୋଚନା କରିଛନ୍ତି। ମୁରଲୀ ଏହି ମନ୍ତବ୍ୟକୁ ଟିଟିଡି କର୍ମଚାରୀଙ୍କ ପ୍ରତି ଅପମାନ ବୋଲି କହିବା ସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପରିବର୍ତ୍ତେ ମୁଖ୍ୟମନ୍ତ୍ରୀ କାହିଁକି ସାର୍ବଜନୀନ ବୟାନ ଦେଇଛନ୍ତି ବୋଲି ପ୍ରଶ୍ନ କରିଛନ୍ତି।
ଏହି ବିବାଦ ରାଜନୈତିକ ପ୍ରତିକ୍ରିୟା ସୃଷ୍ଟି କରିଛି, ଯେଉଁଠାରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ପୂର୍ବ ୱାଇଏସଆରସିପି ସରକାର ମନ୍ଦିର ବ୍ୟାପାରକୁ ଠିକ୍ ଭାବରେ ପରିଚାଳନା କରୁନଥିବା ଅଭିଯୋଗ କରିଛନ୍ତି। ତେଲୁଗୁ ଦେଶମ ପାର୍ଟି (ଟିଡିପି)ର ମୁଖପାତ୍ର ଅନାମ ଭେଙ୍କଟ ରମଣା ରେଡ୍ଡୀ ଲ୍ୟାବ ରିପୋର୍ଟ ଦାଖଲ କରିଛନ୍ତି, ଯେଉଁଥିରେ ଲଡୁରେ ପଶୁ ଚର୍ବି ଥିବା ସ୍ପଷ୍ଟ ହୋଇଛି।
ସେଣ୍ଟର ଫର ଆନାଲିସିସ୍ ଆଣ୍ଡ ଲର୍ଣ୍ଣିଂ ଇନ୍ ହର୍ପସ୍ନାଫ୍ ଆଣ୍ଡ ଫୁଡ୍ (ସିଏଏଫ୍ ) ପକ୍ଷରୁ ପ୍ରକାଶିତ ରିପୋର୍ଟ ଅନୁଯାୟୀ ତିରୁମାଲା ମନ୍ଦିରକୁ ଯୋଗାଇ ଦିଆଯାଉଥିବା ଘିଅ ପ୍ରସ୍ତୁତିରେ ଗାଈର ଚର୍ବି ଓ ମାଛ ତେଲ ବ୍ୟବହାର କରାଯାଇଥିଲା। ଶାସକ ଦଳର ମୁଖପାତ୍ର ରେଡ୍ଡୀ କହିଛନ୍ତି, “ଲ୍ୟାବ ପରୀକ୍ଷାରେ ଏହି ଉପାଦାନଗୁଡ଼ିକର ବ୍ୟବହାରକୁ ପ୍ରମାଣିତ କରାଯାଇଛି, ଯେଉଁଥିରେ ଘିଅର ଏସ-ମୂଲ୍ୟ ୧୯.୭ ମାପ କରାଯାଇଥିଲା।