ଭୁବନେଶ୍ୱର: ମାଧ୍ୟମିକ ଶିକ୍ଷା ପରିଷଦ (ବିଏସ୍ଇ) ଦ୍ବାରା ପରିଚାଳିତ ବାର୍ଷିକ ମାଟ୍ରିକ ପରୀକ୍ଷାର ଦ୍ବିତୀୟ ଦିନରେ କପି ଓ ଅବ୍ୟବସ୍ଥା ଦେଖାଦେଇଛି। ପ୍ରଶ୍ନପତ୍ର ଲିକ୍ ରୋକିବା ପାଇଁ ଲଗାଯାଇଥିବା ଏଆଇ ଚାଳିତ ସିସିଟିଭି କ୍ୟାମେରାରେ ରାଜ୍ୟର ପ୍ରାୟ ୬୦୦ ସମ୍ବେଦନଶୀଳ ଓ ଅତି ସମ୍ବେଦନଶୀଳ ପରୀକ୍ଷା ଓ ନୋଡାଲ ସେଣ୍ଟରରେ ଅନେକ ଅନିୟମିତତା ଦେଖିବାକୁ ମିଳିଛି।
- ଏଆଇ କ୍ୟାମେରାରେ କଟକ, କଳାହାଣ୍ଡି, ଢେଙ୍କାନାଳ, ପୁରୀ ଓ ନୟାଗଡ଼ ଜିଲ୍ଲାରେ ଅନିୟମିତତା ରେକର୍ଡ କରାଯାଇଛି। କ୍ୟାମେରାରେ କଏଦ ହୋଇଥିବା କିଛି ଘଟଣା ହେଲା:
- କଟକ ଜିଲ୍ଲା ନରସିଂହପୁରର ଏଏନ୍ ହାଇସ୍କୁଲ ଓ ଜନାର୍ଦ୍ଦନପୁରର ଚିତ୍ରୋତ୍ପାଲା ନୋଡାଲ ହାଇସ୍କୁଲରେ ପରୀକ୍ଷା ବେଳେ ଛାତ୍ରଛାତ୍ରୀମାନେ ପରସ୍ପର ସହ କଥା ବାର୍ତ୍ତା କରୁଛନ୍ତି।
- ନିୟମ ଉଲ୍ଲଂଘନ କରି ନରସିଂହପୁର ହାଇସ୍କୁଲର ପରୀକ୍ଷା କକ୍ଷରେ ପଶିଲେ ଜଣେ ମହିଳା ପୁଲିସ କର୍ମଚାରୀ ।
- କଟକ କାନପୁର ବାଳିକା ଉଚ୍ଚ ବିଦ୍ୟାଳୟର ଏକ ପରୀକ୍ଷା କକ୍ଷର ଝରକା ଭିତରୁ ଜଣେ ଅନଧିକୃତ ବ୍ୟକ୍ତି ବୁଲୁଥିବାରୁ ଦୁର୍ନୀତି ସନ୍ଦେହ ପ୍ରକାଶ ପାଇଛି।
- କଳାହାଣ୍ଡି ଜିଲ୍ଲା କୋକସରା ସ୍ଥିତ ଜବାହର ଉଚ୍ଚ ବିଦ୍ୟାପୀଠର ଜଣେ ମହିଳା ଶିକ୍ଷୟିତ୍ରୀ ସକାଳ ୯ଟା ୧୭ମିନିଟରେ ପ୍ରୋଟୋକଲ୍ ଭାଙ୍ଗି ମୋବାଇଲ୍ ଫୋନ୍ ବ୍ୟବହାର କରିଥିଲେ।
- ଢେଙ୍କାନାଳ ଜିଲ୍ଲା ମେରମୁଣ୍ଡାସ୍ଥିତ ଓରୋବିନ୍ଦ ବିଦ୍ୟାମନ୍ଦିରରେ ପୂର୍ବାହ୍ନ ୧୦ଟା ୪ ମିନିଟ୍ ରେ ନିରୀକ୍ଷକମାନେ ଡ୍ୟୁଟିରୁ ବଞ୍ଚିତ ହେବାରୁ ଛାତ୍ରଛାତ୍ରୀମାନେ ଅସୁରକ୍ଷିତ ହୋଇପଡ଼ିଛନ୍ତି।
- ଅଡସପୁରର ପ୍ରାଚୀ ଏକାଡେମୀ, ପୁରୀ ଜିଲ୍ଲା ପିପିଲିର ନୋଡାଲ ହାଇସ୍କୁଲ ଓ ନୟାଗଡ଼ ଜିଲ୍ଲା ରଣପୁରର ବିସି ହାଇସ୍କୁଲରେ ପ୍ରଶ୍ନପତ୍ର ଦେବାରେ ବିଳମ୍ବ ଯୋଗୁଁ ଛାତ୍ରଛାତ୍ରୀଅସୁବିଧାର ସମ୍ମୁଖୀନ ହେଉଛନ୍ତି।
ଏହି ଘଟଣାକୁ ଗମ୍ଭୀରତାର ସହ ନେଇ ବିଏସ୍ଇ ମାଧ୍ୟମିକ ଶିକ୍ଷା ନିର୍ଦ୍ଦେଶକ ଓ କଟକ ଆରକ୍ଷୀ ଅଧୀକ୍ଷକଙ୍କୁ ଦୋଷୀ ଅଧିକାରୀ ଓ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କହିଛି। ଫେବ୍ରୁଆରି ୨୦ତାରିଖରୁ ଆରମ୍ଭ ହୋଇ ମାର୍ଚ୍ଚ ୨ ତାରିଖରେ ଶେଷ ହେବାକୁ ଥିବା ପରୀକ୍ଷାରେ ବାଧା ସୃଷ୍ଟି କରିବାକୁ ଚେଷ୍ଟା କଲେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବୋର୍ଡ ଚେତାବନୀ ଦେଇଛି।
ସିସିଟିଭି କ୍ୟାମେରା ଜରିଆରେ ପରୀକ୍ଷା ପାଇଁ ନିୟୋଜିତ ପରୀକ୍ଷାର୍ଥୀ, ନିରୀକ୍ଷକ ଓ କର୍ମଚାରୀଙ୍କ ଗତିବିଧି ଉପରେ ନଜର ରଖିବା ପାଇଁ କଟକସ୍ଥିତ ମୁଖ୍ୟ କାର୍ଯ୍ୟାଳୟରେ ଏକ କମାଣ୍ଡ କଣ୍ଟ୍ରୋଲ ରୁମ୍ ଖୋଲାଯାଇଛି। କ୍ୟାମେରାରେ ଏଆଇ ଟେକ୍ନୋଲୋଜି ରହିଛି ଯାହା ରିୟଲ ଟାଇମରେ ଯେକୌଣସି ଅନିୟମିତତା କିମ୍ବା ଉଲ୍ଲଂଘନକୁ ଚିହ୍ନଟ କରିପାରିବ ଏବଂ କର୍ତ୍ତୃପକ୍ଷଙ୍କୁ ସତର୍କ କରିପାରିବ । ଏହି କ୍ୟାମେରା ପରୀକ୍ଷାକୁ ସୁରୁଖୁରୁରେ ପରିଚାଳନା କରିବାରେ ସହାୟକ ହେବ ବୋଲି ବୋର୍ଡ ଆଶା ରଖିଛି।
Comments are closed.