ସେପ୍ଟେମ୍ବର ୧ରୁ ଦିଲ୍ଲୀରୁ ଏହି ସହରକୁ ବିମାନ ଚଳାଚଳ ବନ୍ଦ କରିବ ଏୟାର ଇଣ୍ଡିଆ

ନୂଆଦିଲ୍ଲୀ: ସୋମବାର ଏୟାର ଇଣ୍ଡିଆ କମ୍ପାନୀ ଏକ ବଡ଼ ନିଷ୍ପତ୍ତି ନେଇଛି । କମ୍ପାନୀ ସେପ୍ଟେମ୍ବର ୧ ତାରିଖରୁ ଦିଲ୍ଲୀରୁ ୱାଶିଂଟନକୁ ସିଧାସଳଖ ବିମାନ ସେବା ବନ୍ଦ କରିଦେଇଛି । ଏୟାର ଇଣ୍ଡିଆ କହିଛି ଯେ ୨୬ଟି ବୋଇଂ ୭୮୭-୮ ବିମାନକୁ ଅପଗ୍ରେଡ୍ କରିବାକୁ ପଡିବ । ଏହି କାରଣରୁ ୱାଶିଂଟନକୁ ସିଧାସଳଖ ବିମାନ ଚଳାଚଳ ବନ୍ଦ କରାଯାଇଛି ।

ଏୟାର ଇଣ୍ଡିଆ କହିଛି ଯେ, ଏହି ବିମାନଗୁଡ଼ିକୁ ଅପଗ୍ରେଡ୍ କରିବାର କାମ ପ୍ରାୟ ୧୬ ମାସ ପର୍ଯ୍ୟନ୍ତ ଜାରି ରହିବ । ୨୦୨୬ ଶେଷ ସୁଦ୍ଧା ବିମାନଗୁଡ଼ିକୁ ଅପଗ୍ରେଡ୍ କରାଯିବ । ଗ୍ରାହକଙ୍କ ଅଭିଜ୍ଞତାକୁ ଆହୁରି ଉନ୍ନତ କରିବା ପାଇଁ ଏହି ଅପଗ୍ରେଡ୍ କରାଯାଉଛି ଏବଂ ଏହାର ଫଳସ୍ୱରୂପ ଅତି କମରେ ୨୦୨୬ ଶେଷ ପର୍ଯ୍ୟନ୍ତ ଯେକୌଣସି ସମୟରେ ଅନେକ ବିମାନ ଉପଲବ୍ଧ ହେବ ନାହିଁ ।

Air India to suspend services to Washington, D.C. from September 1. pic.twitter.com/REI2k1bkD2

— Press Trust of India (@PTI_News) August 11, 2025

ସେହି ସମୟରେ, ପାକିସ୍ତାନର ଏୟାରସ୍ପେସ୍ ବନ୍ଦ ରହିଛି, ଯାହା ଫଳରେ ଦୂରଗାମୀ ବିମାନରେ ସମସ୍ୟା ସୃଷ୍ଟି ହେଉଛି । ୧ ସେପ୍ଟେମ୍ବର ୨୦୨୫ ପରେ ବୁକିଂ କରିଥିବା ଯାତ୍ରୀମାନଙ୍କ ସହିତ ଯୋଗାଯୋଗ କରାଯିବ ଏବଂ ସେମାନଙ୍କୁ ଦୁଇଟି ବିକଳ୍ପ ଦିଆଯିବ । ଅନ୍ୟ ଏକ ବିମାନରେ ବୁକ୍ କରିବା ଏବଂ ସମ୍ପୂର୍ଣ୍ଣ ଟଙ୍କା ଫେରସ୍ତ ପାଇବାର ବିକଳ୍ପ ରହିବ ବୋଲି ଏୟାର ଇଣ୍ଡିଆ ପକ୍ଷରୁ କୁହାଯାଇଛି ।

ଯାତ୍ରୀମାନେ ଏବେ ବି ଏୟାର ଇଣ୍ଡିଆର ଆଲାସ୍କା ଏୟାରଲାଇନ୍ସ, ଡେଲ୍ଟା ଏୟାରଲାଇନ୍ସ, ୟୁନାଇଟେଡ୍ ଏୟାରଲାଇନ୍ସ ପରି ଇଣ୍ଟରଲାଇନ୍ ପାର୍ଟନର ମାଧ୍ୟମରେ ଜେଏଫକେ, ନ୍ୟୁୟର୍କ, ନେୱାର୍କ, ଚିକାଗୋ କିମ୍ବା ସାନ ଫ୍ରାନ୍ସିସ୍କୋ ଦେଇ ୱାଶିଂଟନ ଡିସି ଯାଇପାରିବେ । ଗୋଟିଏ ଟିକେଟରେ, ବ୍ୟାଗଗୁଡ଼ିକୁ ସିଧାସଳଖ ଶେଷ ଗନ୍ତବ୍ୟସ୍ଥଳକୁ ପଠାଯିବ ।ଏୟାର ଇଣ୍ଡିଆ ଏବେ ବି ଉତ୍ତର ଆମେରିକାର ୬ଟି ସହରକୁ ନନ୍-ଷ୍ଟପ୍ ବିମାନ ପରିଚାଳନା କରୁଛି । ଏଥିରେ କାନାଡାର ଟୋରଣ୍ଟୋ ମଧ୍ୟ ଅନ୍ତର୍ଭୁକ୍ତ ଥିବା ସୂଚନା ରହିଛି ।