ନୂଆଦିଲ୍ଲୀ: ଶୀତକାଳୀନ ଝଡ଼ ଏବଂ ପ୍ରବଳ ତୁଷାରପାତ ପୂର୍ବାନୁମାନ କରି ରବିବାର ଦିନ ଏୟାର ଇଣ୍ଡିଆ ଆମେରିକାର ନ୍ୟୁୟର୍କ ଏବଂ ନେୟର୍କକୁ ସମସ୍ତ ଉଡ଼ାଣ ବାତିଲ କରିଛି।
“୨୨ ଏବଂ ୨୩ ଫେବୃଆରୀରେ ଆମେରିକାର ପୂର୍ବ ତଟ ସହିତ ନ୍ୟୁୟର୍କ, ନ୍ୟୁ ଜର୍ସି ଏବଂ ଆଖପାଖ ଅଞ୍ଚଳରେ ପ୍ରବଳ ତୁଷାରପାତ ସହିତ ଏକ ଭୟଙ୍କର ଶୀତକାଳୀନ ଝଡ଼ ଆଶା କରାଯାଉଛି। ଯାହାଫଳରେ ବିମାନ ପରିଚାଳନା ଗୁରୁତ୍ୱପୂର୍ଣ୍ଣ ଭାବରେ ପ୍ରଭାବିତ ହୋଇପାରେ। ତେଣୁ ଯାତ୍ରୀ ଏବଂ କର୍ମଚାରୀଙ୍କ ସୁରକ୍ଷା ଏବଂ ସୁବିଧାକୁ ଧ୍ୟାନରେ ରଖି ୨୩ ଫେବୃଆରୀରେ ନ୍ୟୁୟର୍କ ଏବଂ ନେୟର୍କକୁ ସମସ୍ତ ଏୟାର ଇଣ୍ଡିଆ ବିମାନକୁ ବାତିଲ କରାଯାଇଥିବା ନେଇ ଏୟାର ଇଣ୍ଡିଆ ଏକ ବିବୃତ୍ତିରେ କହିଛି। ଯଦି କେହି ଏହି ତାରିଖରେ ଉଡ଼ାଣ ବୁକ୍ କରିଛନ୍ତି ତେବେ ଆମର ଟିମ୍ ସମସ୍ତ ସମ୍ଭାବ୍ୟ ସହାୟତା ଯୋଗାଇ ଦେବେ ବୋଲି ମଧ୍ୟ କମ୍ପାନୀ ତରଫରୁ ସୂଚନା ଦିଆଯାଇଛି।
ନ୍ୟୁୟର୍କ ସହର ଏବଂ ଦେଶର ଉତ୍ତର-ପୂର୍ବ ଅଂଶ ପାଇଁ ଏକ ତୁଷାରପାତ ଚେତାବନୀ ଜାରି କରାଯିବା ସହ ରବିବାରଠାରୁ ସେଠାରେ ପ୍ରବଳ ପବନ ଏବଂ ଶକ୍ତିଶାଳୀ ଝଡ଼ ଆସିପାରେ ବୋଲି ବିଭାଗ ସୂଚନା ଦେଇଛି। ଏହାକୁ ଦୃଷ୍ଟିରେ ରଖି ୧,୦୦୦ରୁ ଅଧିକ ଉଡ଼ାଣ ପୂର୍ବରୁ ବାତିଲ କରାଯାଇଛି। ଏହି ତୁଷାରପାତ ଜାନୁଆରୀ ଶେଷ ଭାଗରେ ସହରରେ ଆସିଥିବା ତୁଷାରପାତ ଠାରୁ ମଧ୍ୟ ଅଧିକ ବିପଜ୍ଜନକ ହୋଇପାରେ ବୋଲି ନ୍ୟୁୟର୍କ ମେୟର ଜୋହରାନ୍ ମାମଦାନି ଚେତାବନୀ ଦେଇଛନ୍ତି।
Comments are closed.