ନୂଆଦିଲ୍ଲୀ: ବ୍ରାଜିଲ୍ରେ ଚାଲିଛି ସତେ ଯେମିତି ମୃତ୍ୟୁର ତାଣ୍ଡବ ଲୀଳା । ଗତକାଲି ଏକ ଭୟଙ୍କର ସଡକ ଦୁର୍ଘଟଣାରେ ୩୮ ଜଣ ପ୍ରାଣ ହରାଇଥିବା ବେଳେ ଆଜି ଆଉ ଏକ ବଡ ଧରଣର ବିମାନ ଦୁର୍ଘଟଣା ହୋଇଛି । ବିମାନ ଦୁର୍ଘଟଣାରେ ୧୦ଜଣଙ୍କର ମୃତ୍ୟୁ ହୋଇଥିବା ନେଇ ସୂଚନା ମିଳିଛି । ଦକ୍ଷିଣ ବ୍ରାଜିଲ୍ ଗ୍ରାମାଡ଼ୋ ନିକଟରେ ଘଟିଛି ଏହି ବିମାନ ଦୁର୍ଘଟଣା । ଦୁର୍ଘଟଣାଗ୍ରସ୍ତ ବିମାନ ଏକାଧିକ ଘର ଓ ଦୋକାନରେ ଖସିବାରୁ ୧୭ ଜଣ ଆହତ ହୋଇଛନ୍ତି ।
ସୂଚନା ଅନୁସାରେ, ଦକ୍ଷିଣ ବ୍ରାଜିଲ୍ ଗ୍ରାମାଡ଼ୋ ନିକଟରେ ଏକ ଛୋଟ ଘରୋଇ ବିମାନ ଉଡାଣ ଭରିବାର ଗୋଟିଏ ମିନିଟ ମଧ୍ୟରେ ଦୁର୍ଘଟଣାଗସ୍ତ ହୋଇଥିଲା । ବିମାନଟି ପ୍ରଥମେ ଏକ ବିଲ୍ଡିଂରେ ମାଡ ହୋଇଥିଲା । ଏହାପରେ ଏକ ଦୋକନ ଉପରେ ପଡିଥିଲା । ବିମାନରେ ଜଣେ ବ୍ୟବସାୟୀ ଓ ତାଙ୍କ ପୁରା ପରିବାର ଯାଉଥିଲେ । ବିମାନ ଦୁର୍ଘଟଣା ଯୋଗୁଁ ପରିବାରର ସମସ୍ତଙ୍କର ମୃତ୍ୟୁ ହୋଇଛି । ସେପଟେ ବିମାନଟି ଦୋକାନରେ ଖସିବାରୁ ୧୭ ଜଣ ଆହତ ହୋଇଛନ୍ତି । ଦୁର୍ଘଟଣାର ପୁରା ଭିଡିଓ ଏବେ ସାମ୍ନାକୁ ଆସିଛି । ଦୁର୍ଘଟଣାରେ ପୁରା ବିମାନଟି ଜଳିଯାଇଥିବା ଦେଖିବାକୁ ମିଳିଛି । ତେବେ ଦୁର୍ଘଟଣାର ପ୍ରକୃତ କାରଣ ଜଣାପଡିନଥିବା ବେଳେ ଘନ କୁହୁଡି ଯୋଗୁ ବିମାନଟି ଦୁର୍ଘଟଣାଗସ୍ତ ହୋଇଥିବା କୁହାଯାଉଛି ।
ସୂଚନାଯୋଗ୍ୟ, ଗତକାଲି ଦକ୍ଷିଣ-ପୂର୍ବ ବ୍ରାଜିଲର ମିନାସ୍ ଜେରାଇସରେ ଏକ ବସ୍ ଏବଂ ଟ୍ରକ୍ ମଧ୍ୟରେ ଧକ୍କା ହୋଇଥିଲା । ବସ୍ଟି ରାଜଧାନୀ ସାଓ ପାଉଲୋରୁ ଯାତ୍ରୀଙ୍କୁ ନେଇ ଯାଉଥିଲା । ଟିଫିଲୋ ଓଟୋନି ନିକଟରେ ବସର ଟାୟର ଫାଟି ଯାଇଥିଲା । ଫଳରେ ଡ୍ରାଇଭର ନିୟନ୍ତ୍ରଣ ହରାଇଥିଲେ । ଏହାପରେ ଟ୍ରକ୍ ସହ ବସ୍ଟି ମୁହାଁମୁହିଁ ଧକ୍କା ହୋଇଥିଲା । ଧକ୍କା ହେବା ପରେ ବସ୍ରେ ନିଆଁ ଲାଗିଯାଇଥିଲା । ଫଳରେ ଯାତ୍ରୀମାନେ ଜୀବନ୍ତ ଜଳି ଯାଇଥିଲେ । ବସ୍ରେ ମୋଟ ୪୫ ଜଣ ଯାତ୍ରୀ ଥିଲେ । ବସ୍ ଡ୍ରାଇଭରଙ୍କ ସମେତ ୩୮ ଜଣଙ୍କର ମୃତ୍ୟୁ ହୋଇଥିଲା ।