ମୁମ୍ବାଇ: ବଲିଉଡର ସିଙ୍ଘମ୍ ତଥା ଭର୍ସାଟାଇଲ୍ ଅଭିନେତା ଅଜୟ ଦେବଗନ୍ ଖୁବଶୀଘ୍ର ଦର୍ଶକଙ୍କୁ ଏକ ନୂଆ ଏବଂ ଭୟାନକ ଅବତାରରେ ନଜର ଆସିବାକୁ ଯାଉଛନ୍ତି । ଦୀର୍ଘ ୨୧ ବର୍ଷର ବ୍ୟବଧାନ ପରେ ସେ ପୁଣିଥରେ ଏକ ‘ସୁପରନେଚୁରାଲ୍ ଥ୍ରିଲର୍’ ବା ଅଲୌକିକ ହରର୍ ଫିଲ୍ମରେ ଅଭିନୟ କରିବାକୁ ପ୍ରସ୍ତୁତ ହେଉଛନ୍ତି । ମିଳିଥିବା ସୂଚନା ଅନୁଯାୟୀ, ନିର୍ଦ୍ଦେଶକ ରୋହିତ ଯୁଗରାଜଙ୍କ ଆଗାମୀ ସିନେମାରେ ଅଜୟ ଏକ ‘ଗ୍ରେ’ ସେଡ୍ ବା ସାମାନ୍ୟ ନକାରାତ୍ମକ ଏବଂ ରହସ୍ୟମୟ ଚରିତ୍ରରେ ଅଭିନୟ କରିବେ । ତାଙ୍କର ଏହି ନୂଆ ପ୍ରୋଜେକ୍ଟକୁ ନେଇ ବଲିଉଡ୍ କରିଡରରେ ଏବେଠାରୁ ଜୋରଦାର ଚର୍ଚ୍ଚା ଆରମ୍ଭ ହୋଇଯାଇଛି।
ଦର୍ଶକମାନେ ନିଶ୍ଚୟ ମନେ ରଖିଥିବେ, ୨୦୦୫ ମସିହାରେ ମୁକ୍ତିଲାଭ କରିଥିବା ଲୋକପ୍ରିୟ ଫିଲ୍ମ ‘କାଳ’ରେ ଅଜୟ ଦେବଗନ୍ ଏକ ଅଲୌକିକ ଭୂମିକାରେ ନଜର ଆସିଥିଲେ । ତାଙ୍କର ସେହି ଦମଦାର ଅଭିନୟ ଆଜି ବି ଲୋକଙ୍କ ମନରେ ସତେଜ ରହିଛି । ଏବେ ଠିକ୍ ଦୁଇ ଦଶନ୍ଧି ପରେ ସେ ପୁଣି ସେହିଭଳି ଏକ ଅନ୍ଧକାର ଦୁନିଆକୁ ଫେରୁଛନ୍ତି । ନିର୍ଦ୍ଦେଶକ ରୋହିତ ଯୁଗରାଜ ଏହି ନୂଆ ପ୍ରୋଜେକ୍ଟ ପାଇଁ ଏକ ଜବରଦସ୍ତ ସ୍କ୍ରିପ୍ଟ ପ୍ରସ୍ତୁତ କରିଛନ୍ତି । କାହାଣୀଟି ଅଜୟଙ୍କୁ ବେଶ୍ ପସନ୍ଦ ଆସିଥିବାରୁ ସେ ଏଥିରେ ଅଭିନୟ କରିବା ପାଇଁ ତୁରନ୍ତ ସବୁଜ ସଙ୍କେତ ଦେଇଥିବା ଜଣାପଡ଼ିଛି । ବର୍ତ୍ତମାନ ଏହି ଫିଲ୍ମର ପ୍ରି-ପ୍ରଡକ୍ସନ୍ କାମ ଖୁବ୍ ଜୋରସୋରରେ ଆଗେଇ ଚାଲିଛି ।
ବର୍ତ୍ତମାନ ବଲିଉଡରେ ହରର୍-କମେଡି ଏବଂ ସୁପରନେଚୁରାଲ୍ ଫିଲ୍ମଗୁଡ଼ିକର ଟ୍ରେଣ୍ଡ୍ ଚାଲିଛି। ନିକଟରେ ମୁକ୍ତିଲାଭ କରିଥିବା ସୁପରହିଟ୍ ଫିଲ୍ମ ‘ଶୈତାନ’ରେ ଅଜୟ ଏକ ପରିବାରର ରକ୍ଷକ ଭାବେ କଳାଯାଦୁ ବିରୋଧରେ ଲଢ଼ୁଥିବା ବେଳେ, ଏହି ନୂଆ ଫିଲ୍ମରେ ସେ ନିଜେ ଏକ ଭୟାନକ ତଥା ନକାରାତ୍ମକ ରୂପରେ ଆସିବେ। ତେବେ ଅଜୟଙ୍କ ଏହି ଆଗାମୀ ସିନେମା କମେଡି ନୁହେଁ, ବରଂ ଏହା ଏକ ସମ୍ପୂର୍ଣ୍ଣ ସିରିୟସ୍ ଏବଂ ଡାର୍କ ଥ୍ରିଲର୍ ହେବ ।
ଗୋଟିଏ ପଟେ ଆକ୍ସନ୍ ଏବଂ ଅନ୍ୟପଟେ କ୍ରାଇମ୍ ଥ୍ରିଲର୍ରେ ନିଜର ଦକ୍ଷତା ପ୍ରମାଣିତ କରିଥିବା ଅଜୟ, ଏବେ ହରର୍ ଜୋନର୍ରେ ମଧ୍ୟ ଏକ ନୂଆ ବେଞ୍ଚମାର୍କ ସୃଷ୍ଟି କରିବାକୁ ଲକ୍ଷ୍ୟ ରଖିଛନ୍ତି। ଖୁବଶୀଘ୍ର ଫିଲ୍ମର ଅନ୍ୟ ଷ୍ଟାରକାଷ୍ଟ ଏବଂ ସୁଟିଂ ସିଡ୍ୟୁଲ୍ ସମ୍ପର୍କରେ ନିର୍ମାତାଙ୍କ ପକ୍ଷରୁ ବିଧିବଦ୍ଧ ଘୋଷଣା କରାଯିବ। ଅଜୟଙ୍କ ପ୍ରଶଂସକମାନେ ତାଙ୍କର ଏହି ନୂଆ ଅବତାରକୁ ବଡ଼ ପରଦାରେ ଦେଖିବା ପାଇଁ ଉତ୍ସାହର ସହ ଅପେକ୍ଷା କରିଛନ୍ତି।
