ପ୍ରୋଫେସନାଲ୍ ପଲିଟିକ୍ସ କରେ ବିଜେପି: ନବୀନ-ଅଖିଳେଶଙ୍କ ଆଲୋଚନା ନେଇ ଜୋର୍ ଧରିଲା ରାଜନୀତି ଚର୍ଚ୍ଚା
ଭୁବନେଶ୍ୱର: ଓଡ଼ିଶା ରାଜନୀତିରେ ହଟଚମଟ ଚାଲିଥିବା ବେଳେ ୟୁପିର ପୂର୍ବତନ ମୁଖ୍ୟମନ୍ତ୍ରୀ ତଥା ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଓଡ଼ିଶା ଗସ୍ତ କରିଛନ୍ତି। ଏହାସହ ଅଖିଳେଶ ଯାଦବ ଗତ ତିନି ମାସରେ ଦ୍ୱିତୀୟ ଥର ଓଡ଼ିଶା ଗସ୍ତ କରିଛନ୍ତି। ଗତକାଲି ଭୁବନେଶ୍ୱରସ୍ଥିତ ଅନୁଷ୍ଠିତ ଏକ କାର୍ଯ୍ୟକ୍ରମରେ ଅଖିଳେଶ ଯାଦବ, ସାଂସଦ ରାଜୀବ ରାୟଙ୍କ ସମେତ ଅନେକ ନେତା ଯୋଗ ଦେଇଥିଲେ। ଏହି ଅବସରରେ ଅଖିଳେଶ ବିଜେପିକୁ ଟାର୍ଗେଟ କରିଥିଲେ। ଏହାସହ ସେ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ବ୍ୟତୀତ ଅନ୍ୟ କିଛି ପ୍ରଭାବଶାଳୀ ନେତାଙ୍କ ସହ ଆଲୋଚନା କରିଛନ୍ତି।
ରାଜ୍ୟରେ ସମାଜବାଦୀ ପାର୍ଟିକୁ ସେ ମଜଭୁତ କରିବାକୁ ଚାହୁଁଥିବା ଗଣମାଧ୍ୟମକୁ କହିଛନ୍ତି। ବିଜେପି ବିଭାଜନ ରାଜନୀତି କରୁଥିବା ବେଳେ ସପା କିନ୍ତୁ ସମାନ ବିଚାରଧାରାର ଲୋକଙ୍କୁ ନେଇ ରାଜନୀତି କରେ। ପ୍ରୋଫେସନାଲ୍ ପଲିଟିକ୍ସ କରେ ବିଜେପି। ଓଡ଼ିଶାରେ ସମାଜବାଦରେ ବିଶ୍ୱାସ କରୁଥିବା ନେତାଙ୍କୁ ଯୋଡ଼ିବାକୁ ଆହ୍ୱାନ ଦେଇଛନ୍ତି ଅଖିଳେଶ। ସେ କହିଛନ୍ତି, ଓଡିଶାରେ ସମାଜବାଦୀ ପାର୍ଟି ଗଠନ କରିବାକୁ ଦଳ ସବୁବେଳେ ପ୍ରୟାସ କରୁଛି। ଆମର ପ୍ରୟାସ ହେବ ପିଡିଏକୁ ଆଗକୁ ନେବା। ଆମେ ଓଡ଼ିଶାକୁ ଆସିବା ଜାରି ରଖିବୁ। ବିଜେପିର ଏଜେଣ୍ଡା ହେଉଛି ସାମ୍ପ୍ରଦାୟିକ। ଯେତେବେଳେ ବିଜେପି ଦୁର୍ବଳ ହୁଏ, ସେତେବେଳେ ସେ ସାମ୍ପ୍ରଦାୟିକ ପଥ ଗ୍ରହଣ କରେ। ଯେତେବେଳେ ସମଗ୍ର ଦେଶରେ ବିଜେପିର ପର୍ଦ୍ଦାଫାଶ ହେବ, ସେତେବେଳେ ବିଜେପି ଶାସନ ଦିଲ୍ଲୀରୁ ହଟିବ।
ଆମେ ସମସ୍ତଙ୍କୁ ଏକତ୍ର କରି ରାଜନୀତି କରିବାକୁ ଚାହୁଁଛୁ। ବିଭାଜନର ରାଜନୀତି ଶେଷ ହେବା ଉଚିତ, ଲୋକଙ୍କୁ ଏକତ୍ର କରିବାର ରାଜନୀତି ହେବା ଉଚିତ। ପଶ୍ଚିମବଙ୍ଗରେ ଚଳିତ ନିର୍ବାଚନାରେ ବିଜେପି ହାରିବ ଏବଂ ମମତା ଜୀ ସେଠାରେ ଜିତିବେ। କଂଗ୍ରେସ ପୂର୍ବତନ ବିଧାୟକ ମହମ୍ମଦ ମୋକିମଙ୍କୁ ନିଲମ୍ବନ କରିଥିବାବେଳେ ବିଜେଡି, ବିଧାୟକ ସନାତନ ମହାକୁଡ଼ ଓ ଅରବିନ୍ଦ ମହାପାତ୍ରଙ୍କୁ ନିଲମ୍ବନ କରିଛି । ଏଭଳି ସମୟରେ ଅଖିଳେଶଙ୍କ ଗସ୍ତକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଛି । ଅଖିଳେଶ କହିଛନ୍ତି, ନେତାଜୀ ତଥା ତାଙ୍କ ପିତା ମୂଲାୟମ ସିଂ ଯାଦବଙ୍କର ବହୁ ସହଯୋଗୀ ଓଡ଼ିଶାରେ ଅଛନ୍ତି । ସେ ଓଡ଼ିଶା ବାରମ୍ବାର ଆସିବେ ବୋଲି କହିଛନ୍ତି । ସାରା ଦେଶରେ ବିଜେପିର ମନ୍ଦ ଉଦ୍ଦେଶ୍ୟ ଜଣାପଡ଼ିବା ପରେ ହିଁ ଏହି ଦଳ ହଟିବ ବୋଲି ଅଖିଳେଶ କହିଛନ୍ତି ।
ଅଖିଳେଶ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ସାକ୍ଷାତ କରି କହିଛନ୍ତି, ନବୀନ ପଟ୍ଟନାୟକ ବରିଷ୍ଠ ନେତା । ଓଡ଼ିଶାର ବିକାଶରେ ତାଙ୍କର ଓ ତାଙ୍କ ପିତା ବିଜୁ ବାବୁଙ୍କର ବହୁତ ବଡ଼ ଯୋଗଦାନ ଥିଲା । ବିଜୁ ବାବୁ ନେତାଜୀଙ୍କ ସହ କାମ କରିଥିଲେ । ଯାହା ଫଳରେ ଏକ ପ୍ରକାର ସମ୍ପର୍କ ଗଢ଼ି ଉଠିଥିଲା । ଏବେ ଆମେ ଦୁଇ ଜଣ ମଧ୍ୟ ବିଜେପି ବିରୋଧରେ ଲଢ଼େଇ କରୁଛୁ ବୋଲି ଅଖିଳେଶ କହିଛନ୍ତି।