ମୁମ୍ବାଇ; ଅକ୍ଷୟ କୁମାର, ଗୋବିନ୍ଦା ଏବଂ ପରେଶ ରାୱଲଙ୍କ ସୁପରହିଟ୍ କମେଡି ଚଳଚ୍ଚିତ୍ର ‘ଭାଗମ୍ ଭାଗ’ ଦର୍ଶକଙ୍କୁ ବହୁତ ମନୋରଞ୍ଜନ କରିଥିଲା। ଏହି ଚଳଚ୍ଚିତ୍ରଟି ବକ୍ସ ଅଫିସରେ ଭଲ କଲେକ୍ସନ ମଧ୍ୟ କରିଥିଲା l ଏପରି ପ୍ରଶଂସକମାନେ ଏହି ତିନିଜଣଙ୍କୁ ପୁଣିଥରେ ଏକାଠି ପରଦାରେ ଦେଖିବା ପାଇଁ ଦୀର୍ଘ ସମୟ ଧରି ଅପେକ୍ଷା କରି ରହିଛନ୍ତି l ତେବେ ଅପେକ୍ଷା କରିଥିବା ସେହି ପ୍ରଶଂସକଙ୍କ ପାଇଁ ଖୁସିଖବର l ଖୁବ୍ ଶୀଘ୍ର ପ୍ରେକ୍ଷାଳୟକୁ ଆସିବାକୁ ଯାଉଛି ଜବରଦସ୍ତ କମେଡି ସହ ‘ଭାଗମ୍ ଭାଗ’ ଚଳଚ୍ଚିତ୍ରର ସିକ୍ୱେଲ୍ l ଏନେଇ ଘୋଷଣା କରାଯାଇଛି l
2006ରେ ରିଲିଜ ହୋଇଥିବା ‘ଭାଗମ୍ ଭାଗ’ ଚଳଚ୍ଚିତ୍ରର ସିକ୍ୱେଲ୍ ସହ ପୁଣିଥରେ ଅକ୍ଷୟ କୁମାର, ଗୋବିନ୍ଦା ଏବଂ ପରେଶ ରାୱଲ ଦମଦାର କମେଡି ଦେଖିବେ ପ୍ରଶଂସକ । ରିପୋର୍ଟ ଅନୁଯାୟୀ, ମୂଳ ତାରକାଙ୍କ ସହ ଖୁବ ଶୀଘ୍ର ମୁକ୍ତିଲାଭ କରିବାକୁ ଯାଉଛି ‘ଭାଗମ୍ ଭାଗ 2’ l ତେବେ ‘ହେରା ଫେରି’, ‘ଭାଗମ ଭାଗ’ ଏବଂ ‘ଗରମ ମସାଲା’ ଅକ୍ଷୟ କୁମାରଙ୍କ ପାଇଁ ତିନୋଟି ସର୍ବଶ୍ରେଷ୍ଠ ଥିଲା l ସେ ପ୍ରଥମରୁ ‘ହେରା ଫେରି’ ଏବଂ ‘ଭାଗମ ଭାଗ’ର ଫ୍ରାଞ୍ଚାଇଜ୍ ଅଧିକାରଗୁଡିକ ନିଜ ହାତକୁ ନେଇଛନ୍ତି l ପ୍ରିୟଦର୍ଶନଙ୍କ ନିର୍ଦ୍ଦେଶିତ ଏହି କମେଡି ଚଳଚ୍ଚିତ୍ରର ଅଧିକାର ହାସଲ କରିଛନ୍ତି ଅକ୍ଷୟ ଏବଂ ନୂତନ ଗ୍ରୁପ ସହିତ ଏହାର ସିକ୍ୱେଲ ଲେଖିବା ଆରମ୍ଭ କରିଛନ୍ତି।
ତେବେ ଯଦି ଯୋଜନା ଅନୁଯାୟୀ ସବୁକିଛି ଚାଲେ, ତେବେ ଆଗାମୀ ବର୍ଷ 2025 ରେ ଫିଲ୍ମ ‘ଭାଗମ୍ ଭାଗ 2’ ର ସୁଟିଂ ଆରମ୍ଭ ହେବ l ଏବଂ 2026ରେ ଚଳଚ୍ଚିତ୍ରଟି ପ୍ରେକ୍ଷାଳୟକୁ ଆସିବ l ତେବେ ନିକଟରେ ଅକ୍ଷୟଙ୍କୁ ସିଙ୍ଘମ ଏଗେନରେ ଦେଖିବାକୁ ମିଳିଥିଲା l ଆଗକୁ ଅକ୍ଷୟଙ୍କ ‘ହାଉସଫୁଲ୍ 5’, ‘ୱେଲକମ ଟୁ ଦ ଜଙ୍ଗଲ’, ‘ସ୍କାଏ ଫୋର୍ସ’, ‘ଭୁତ ବଙ୍ଗଳା’ ଏବଂ ‘ଜଲି ଏଲଏଲବି 3’ ଆସିବାକୁ ଯାଉଛି l