ଓ୍ବାଶିଂଟନ୍: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବେ ଖୋଲାଖୋଲି ଭାବରେ କାନାଡାକୁ ଧମକ ଦେଇଛନ୍ତି ଏବଂ କହିଛନ୍ତି ଯେ ଯଦି ଏହା ଚୀନ୍ ସହିତ କୌଣସି ପ୍ରକାରର ବାଣିଜ୍ୟ ଚୁକ୍ତି କରେ ତେବେ ସେ ୧୦୦% ଶୁଳ୍କ ଲାଗୁ କରିବେ । ଏକ ସୋସିଆଲ ମିଡିଆ ପୋଷ୍ଟରେ ଟ୍ରମ୍ପ କାନାଡା ପ୍ରଧାନମନ୍ତ୍ରୀ ମାର୍କ କାର୍ନିଙ୍କୁ କଡ଼ା ସମାଲୋଚନା କରିଛନ୍ତି ଏବଂ କହିଛନ୍ତି ଯେ, ଯଦି ସେ ଭାବୁଛନ୍ତି ଯେ, କାନାଡାକୁ ଚୀନ୍ ପାଇଁ ‘ଡ୍ରପ୍ ଅଫ୍ ପୋର୍ଟ’ କରିବେ, ଯେଉଁଠାରୁ ଚୀନ୍ ଆମେରିକାକୁ ସାମଗ୍ରୀ ଏବଂ ଉତ୍ପାଦ ପଠାଇବ, ତେବେ ସେ ଏକ ବଡ଼ ଭୁଲ କରୁଛନ୍ତି । ଟ୍ରମ୍ପ କହିଛନ୍ତି, “ଯଦି କାନାଡା ଚୀନ୍ ସହିତ ଏକ ଚୁକ୍ତି କରେ, ତେବେ ଆମେରିକାକୁ ଆସୁଥିବା ସମସ୍ତ କାନାଡା ସାମଗ୍ରୀ ଏବଂ ଉତ୍ପାଦ ଉପରେ ତୁରନ୍ତ ୧୦୦% ଶୁଳ୍କ ଲାଗୁ କରାଯିବ।”
ଏହା ପୂର୍ବରୁ, ଡୋନାଲ୍ଡ ଟ୍ରମ୍ପ ଗ୍ରୀନଲ୍ୟାଣ୍ଡ ପାଇଁ ଆମେରିକାର ପ୍ରସ୍ତାବିତ ଗୋଲଡେନ୍ ଡୋମ୍ କ୍ଷେପଣାସ୍ତ୍ର ପ୍ରତିରକ୍ଷା ପ୍ରକଳ୍ପକୁ ପ୍ରତ୍ୟାଖ୍ୟାନ କରିବା ପାଇଁ କାନାଡାକୁ ଚେତାବନୀ ଦେଇଥିଲେ ଏବଂ କହିଥିଲେ ଯେ ସେମାନେ ବୁଝିପାରୁନାହାଁନ୍ତି, ଚୀନ୍ ଗୋଟିଏ ବର୍ଷ ମଧ୍ୟରେ ସେମାନଙ୍କୁ ଗିଳିଦେବ ।
ଟ୍ରମ୍ପ କାନାଡା ବିଷୟରେ କହିଥିଲେ ଯେ ଆମେରିକାର ପଡ଼ୋଶୀ ଦେଶ ଆମେରିକା ସମର୍ଥିତ ସୁରକ୍ଷା ବଦଳରେ ଚୀନ୍ ସହିତ ସମ୍ପର୍କ ବୃଦ୍ଧି କରିବାରେ ବ୍ୟସ୍ତ । ଡୋନାଲ୍ଡ ଟ୍ରମ୍ପ ଟ୍ରୁଥ୍ ସୋସିଆଲରେ ଲେଖିଛନ୍ତି, “କାନାଡା ଗ୍ରୀନଲ୍ୟାଣ୍ଡରେ ଗୋଲଡେନ୍ ଡୋମ୍ ନିର୍ମାଣକୁ ବିରୋଧ କରୁଛି, ଯେତେବେଳେ ଗୋଲଡେନ୍ ଡୋମ୍ କାନାଡାକୁ ସୁରକ୍ଷା ଦେବ । ବରଂ, ସେମାନେ ଚୀନ୍ ସହିତ ବ୍ୟବସାୟ କରିବା ସପକ୍ଷରେ ଭୋଟ ଦେଇଛନ୍ତି, ଯାହା ପ୍ରଥମ ବର୍ଷ ମଧ୍ୟରେ ସେମାନଙ୍କୁ ‘ଗିଳିଦେବ’।”
ପ୍ରକୃତରେ, ଡାଭୋସ୍ ବିଶ୍ୱ ଅର୍ଥନୈତିକ ଫୋରମରେ, କାନାଡା ପ୍ରଧାନମନ୍ତ୍ରୀ ମାର୍କ କାର୍ନି ଏକ ଭୟଙ୍କର ଚେତାବନୀ ଦେଇଥିଲେ, ଆମେରିକା ନେତୃତ୍ୱାଧୀନ ବିଶ୍ୱ ବ୍ୟବସ୍ଥା ଉପରେ ପ୍ରଶ୍ନ ଉଠାଇଥିଲେ । ସେ କହିଥିଲେ, “ବିଶ୍ୱ ଏକ ସରଳ ପରିବର୍ତ୍ତନ ନୁହେଁ ବରଂ ଏକ ବିନାଶକାରୀ ଫାଟ ଅନୁଭବ କରୁଛି, ଯେଉଁଠାରେ ଦଶନ୍ଧି ପୁରୁଣା ନିୟମ-ଆଧାରିତ ବ୍ୟବସ୍ଥା ମଳିନ ହେଉଛି।” କାର୍ନି କହିଥିଲେ, “ମିଡିଲ ପାଓ୍ବାରଗୁଡ଼ିକୁ ଏକାଠି କାମ କରିବାକୁ ପଡିବ । ଯଦି ଆମେ ଟେବୁଲରେ ନ ଥାଉ, ତେବେ ଆମେ ମେନୁରେ ରହିବୁ ।” ସେ ଆମେରିକାକୁ ଇଙ୍ଗିତ କରୁଥିଲେ, ଏବଂ ଏହି ଭାଷଣ ହିଁ ଟ୍ରମ୍ପଙ୍କୁ କ୍ରୋଧିତ କରିଛି ।