Russian Foreign Ministry: ‘ଭାରତ-ରୁଷ ସମ୍ପର୍କ ଦୃଢ଼ ଏବଂ ସେହିପରି ରହିବ…’ ପୁଟିନଙ୍କ ବୈଦେଶିକ ମନ୍ତ୍ରଣାଳୟ ମୋଦୀଙ୍କୁ କଲେ ପ୍ରଶଂସା

ନୂଆଦିଲ୍ଲୀ: ରୁଷ ବୈଦେଶିକ ମନ୍ତ୍ରଣାଳୟ ଭାରତକୁ ପ୍ରଶଂସା କରିଛି । ଭାରତକୁ ପ୍ରଶଂସା କରି କହିଛି ଯେ, ନୂଆଦିଲ୍ଲୀ ମସ୍କୋ ସହିତ ସହଯୋଗ ଜାରି ରଖିବା ଏବଂ ସମ୍ପର୍କ ଭାଙ୍ଗିବା ପାଇଁ ଚାପକୁ ପ୍ରତ୍ୟାଖ୍ୟାନ କରିବାର ସାହସ ଦେଖାଇଛି । RT (Russia Today) ର ପ୍ରଶ୍ନର ଉତ୍ତରରେ ମନ୍ତ୍ରଣାଳୟ କହିଛି ଯେ, ପାଶ୍ଚାତ୍ୟ ଚାପ ଏବଂ ଧମକ ସତ୍ତ୍ୱେ ଭାରତ ରୁଷ ସହିତ ବହୁମୁଖୀ ସହଯୋଗ ଜାରି ରଖିବାକୁ ସ୍ଥିର କରିଛି ଏବଂ ଏହା ବିସ୍ତାର କରିବାର ସଂକଳ୍ପ ଦେଖାଉଛି। ସତ କହିବାକୁ ଗଲେ, ଭାରତ ଏବଂ ରୁଷ ମଧ୍ୟରେ ସମ୍ପର୍କ ସ୍ଥିର ଏବଂ ଆତ୍ମବିଶ୍ୱାସର ସହିତ ଆଗକୁ ବଢ଼ୁଛି। ଏହି ପ୍ରକ୍ରିୟାକୁ ବାଧା ଦେବାର ଯେକୌଣସି ପ୍ରୟାସ ବିଫଳ ହେବ।

ପାଶ୍ଚାତ୍ୟ ଦେଶଗୁଡ଼ିକର ଚାପ ସତ୍ତ୍ୱେ ନୂଆଦିଲ୍ଲୀର ରୁଷ ସହିତ ସମ୍ପର୍କ ବଜାୟ ରଖିବା କେବଳ ଆମର ଦୀର୍ଘକାଳୀନ ବନ୍ଧୁତାର ଭାବନା ​​ଏବଂ ପରମ୍ପରାକୁ ପ୍ରତିଫଳିତ କରେ ନାହିଁ ବରଂ ଅନ୍ତର୍ଜାତୀୟ ବ୍ୟାପାରରେ ରଣନୈତିକ ସ୍ୱାୟତ୍ତତାର ପ୍ରତୀକ ବୋଲି ରୁଷ ବୈଦେଶିକ ମନ୍ତ୍ରଣାଳୟର ଅଧିକାରୀମାନେ କହିଛନ୍ତି ।

ପୁଟିନଙ୍କ ମନ୍ତ୍ରଣାଳୟ ରୁଷ ଟୁଡେକୁ କହିଛି ଯେ, ଭାରତ ଯେତେ ଚାପରେ ରହୁଥିଲେ ମଧ୍ୟ, ସେ ନିଜର ଲକ୍ଷ୍ୟ ଏବଂ ଲାଭ ବିଷୟରେ ଚିନ୍ତା କରିବାକୁ କେବେବି ସଂକୋଚ କରେ ନାହିଁ। ଦେଶକୁ ପ୍ରଥମେ ରଖିବା ତାଙ୍କର ଲକ୍ଷ୍ୟ ପ୍ରଶଂସନୀୟ। ରୁଷରୁ ତେଲ କିଣିବା ପାଇଁ ଏତେ ଆନ୍ତର୍ଜାତୀୟ ଚାପ ସତ୍ତ୍ୱେ, ସେ ତେଲ କିଣିବା ବନ୍ଦ କରିନାହାଁନ୍ତି। ଏହା ଦର୍ଶାଉଛି ଯେ ପ୍ରଧାନମନ୍ତ୍ରୀ ମୋଦୀ ତାଙ୍କର ଜାତୀୟ ସ୍ୱାର୍ଥ ଏବଂ ସାର୍ବଭୌମତ୍ୱକୁ କେତେ ଗୁରୁତ୍ୱ ଦିଅନ୍ତି।

ଗତ ମାସରେ ଆମେରିକା ଭାରତୀୟ ଉତ୍ପାଦ ଉପରେ ୫୦% ଶୁଳ୍କ ଲଗାଇଥିବା ବେଳେ ଏବେ ରୁଷର ଏହିପରି ବୟାନ ଆସିଛି। ଏହା ରୁଷର ତୈଳ ଏବଂ ପ୍ରତିରକ୍ଷା ଉପକରଣ କ୍ରୟ ପାଇଁ ଦଣ୍ଡ ସ୍ୱରୂପ ମୂଳ ଶୁଳ୍କ ସହିତ ଅତିରିକ୍ତ ଥିଲା।

ସୂଚନାଥାଉକି, ଟ୍ରମ୍ପ୍ କିଛିଦିନ ତଳେ ସ୍ୱୀକାର କରିଛନ୍ତି ଯେ, ରୁଷିଆ ତୈଳ କିଣିବାକୁ ନେଇ ଭାରତ ଉପରେ ଭାରୀ ଶୁଳ୍କ ଲଗାଇବା ତାଙ୍କର ନିଷ୍ପତ୍ତି ଭାରତ ସହିତ ସମ୍ପର୍କକୁ ତିକ୍ତ କରଛି ।