ଭାରତ ସରକାରଙ୍କ ନିର୍ଦ୍ଦେଶରେ ଆପଲ୍ ଏବଂ ଗୁଗଲ୍ ବ୍ୟାନ୍ କଲା ଏହି ୨ ଟି ଆପ୍, ଫୋନରୁ କରନ୍ତୁ ତୁରନ୍ତ ଡିଲେଟ

ନୂଆଦିଲ୍ଲୀ: ଗୁଗୁଲ ଏବଂ ଆପଲ୍ ଭାରତରେ ଥିବା ସେମାନଙ୍କର ଆପ୍ ଷ୍ଟୋରରୁ ଦୁଇଟି ଆପ୍ ହଟେଇଛନ୍ତି । ଯାହା ବିଦେଶୀ ସିମ୍ କାର୍ଡ (ଇ-ସିମ୍) ସେବା ଯୋଗାଉଥିଲା | ଏହି ଆପଗୁଡିକ ପ୍ଲେ ଷ୍ଟୋର ଏବଂ ଆପ୍ ଷ୍ଟୋରରୁ ହଟାଇ ଦିଆଯାଇଛି | ଭାରତ ସରକାରଙ୍କ ଟେଲିକମ୍ ବିଭାଗ (DoT) ଏହି ଆପଗୁଡିକୁ ହଟାଇବାକୁ ନିର୍ଦ୍ଦେଶ ଦେଇଛି । ସରକାରଙ୍କ ନିର୍ଦ୍ଦେଶ ଅନୁସାରେ, ଏହି ଆପଗୁଡିକ ସାଇବର ଠକେଇ ପାଇଁ ବ୍ୟବହୃତ ହେଉଛି । ଭାରତରେ ଏହି ଦୁଇଟି ଆପର ୱେବସାଇଟ୍ ବ୍ଲକ କରିବାକୁ ସରକାର ଭାରତୀୟ ଇଣ୍ଟରନେଟ୍ ସେବା ପ୍ରଦାନକାରୀ (ଆଇଏସପି) ଏବଂ ଟେଲିକମ୍ କମ୍ପାନୀଗୁଡ଼ିକୁ କହିଛନ୍ତି।

ବନ୍ଦ ହୋଇଥିବା ଏହି ଦୁଇଟି ଆପ୍ ହେଉଛି ଏରାଲୋ ଏବଂ ହୋଲାଫ୍ଲାଇ | ଏହି ଆପଗୁଡିକ ଆଉ ଭାରତର ଗୁଗୁଲ୍ ପ୍ଲେ ଷ୍ଟୋରରେ ଡାଉନଲୋଡ୍ ହୋଇପାରିବ ନାହିଁ | ଏହି ଦୁଇଟି ଆପ୍ ବିଶ୍ଵର ବିଭିନ୍ନ ଦେଶରେ ସିମ୍ କାର୍ଡ ପରି ସେବା ଯୋଗାଇବା ପାଇଁ ବ୍ୟବହୃତ ହେଉଥିଲା | ତେବେ ଏନେଇ ଆପଲ୍ ଏବଂ ଗୁଗଲ୍ ତରଫରୁ ଏପର୍ଯ୍ୟନ୍ତ କୌଣସି ଅଫିସିଆଲ୍ ବିବୃତ୍ତି ଦିଆଯାଇନାହିଁ । ସରକାରୀ ନିର୍ଦ୍ଦେଶ ପରେ ସେମାନେ ଏହି ଆପଗୁଡିକୁ ଆପ ଷ୍ଟୋରରୁ ହଟାଇ ଦେଇଛନ୍ତି।