Captain Suryakumar Yadav: କ୍ୟାପଟେନ୍ ସୂର୍ଯ୍ୟକୁମାର ଯାଦବଙ୍କ ମହାନତା, ଏସିଆ କପ୍‌ର ମ୍ୟାଚ୍ ଫି’ ଭାରତୀୟ ସେନାକୁ ସମର୍ପିତ

ମୁମ୍ବାଇ: ମହାନତା ଦେଖାଇଲେ କ୍ୟାପଟେନ୍ ସୂର୍ଯ୍ୟକୁମାର ଯାଦବ। ଏସିଆ କପ୍‌ର ମ୍ୟାଚ୍ ଫି’ ଭାରତୀୟ ସେନାକୁ କଲେ ସମର୍ପିତ। ପହଲଗାମ୍ ଆତଙ୍କବାଦୀ ହମ୍‌ଲାରେ ନିହତଙ୍କ ପରିବାରକୁ ଦାନ କଲେ ବିଜୟର ପୁରସ୍କାର। ରବିବାର ରାତିରେ ଦୁବାଇରେ ପାକିସ୍ତାନ ବିପକ୍ଷରେ ଏସିଆ କପ୍ ଜିତିବା ପରେ ଯାଦବ ଏହା ଘୋଷଣା କରିଛନ୍ତି। ଭାରତୀୟ ଅଧିନାୟକ ଏସିଆ କପ୍ ର ପ୍ରଥମ ମ୍ୟାଚ୍ ଜିତିବା ପରେ ପହଲଗାମ୍ ଆକ୍ରମଣରେ ସହିଦ ହୋଇଥିବା ଲୋକଙ୍କ ପରିବାରକୁ ସେନା ଏବଂ ତାଙ୍କ ମ୍ୟାଚ୍ ଫିସ୍ ଉତ୍ସର୍ଗ କରିଥିଲେ।

ସେ ଟ୍ୱିଟ୍ କରିଛନ୍ତି, “ମୁଁ ଏହି ଟୁର୍ଣ୍ଣାମେଣ୍ଟରୁ ମୋର ମ୍ୟାଚ୍ ଫିସ୍ ଆମର ସଶସ୍ତ୍ର ସେନା ଏବଂ ପହଲଗାମ୍ ଆତଙ୍କବାଦୀ ଆକ୍ରମଣରେ ସହିଦ ହୋଇଥିବା ଲୋକଙ୍କ ପରିବାରକୁ ସାହାଯ୍ୟ କରିବା ପାଇଁ ଦାନ କରିବାକୁ ନିଷ୍ପତ୍ତି ନେଇଛି।”

ରବିବାର ରାତିରେ ଦୁବାଇରେ ପାକିସ୍ତାନ ବିପକ୍ଷରେ ଏସିଆ କପ୍ ଫାଇନାଲରେ ତିଲକ ବର୍ମା ଏକ ଚମତ୍କାର ଅର୍ଦ୍ଧଶତକ ହାସଲ କରିଥିଲେ ଏବଂ ସଞ୍ଜୁ ସାମସନ୍ ଏବଂ ଶିବମ୍ ଦୁବେଙ୍କ ସହ ଉପଯୋଗୀ ଭାଗୀଦାରି କରିଥିଲେ। ଏହି ତିନୋଟି ଅମୂଲ୍ୟ ଇନିଂସ ଭାରତକୁ ପାକିସ୍ତାନକୁ ପରାସ୍ତ କରିବାରେ ସାହାଯ୍ୟ କରିଥିଲା। ଏହି ବିଜୟ ସହିତ, ଭାରତ ଏହାର ଦ୍ୱିତୀୟ ଟି-୨୦ ଅନ୍ତର୍ଜାତୀୟ ଏସିଆ କପ୍ ଟାଇଟଲ୍ ଏବଂ ଏକଦିବସୀୟ ସଂସ୍କରଣ ସମେତ ସାମଗ୍ରିକ ଭାବରେ ଏହାର ନବମ ବିଜୟ ହାସଲ କରିଛି।

ଏସିଆ କପ୍ ୨୦୨୫ ଫାଇନାଲରେ ଭାରତ ପାକିସ୍ତାନକୁ ହରାଇ ଚାମ୍ପିଅନ ହୋଇଛି। ଏସିଆ ଦଖଲ କରିଛି ଭାରତୀୟ କ୍ରିକେଟ୍‌ ଦଳ। ପାରମ୍ପାରିକ ପ୍ରତିଦ୍ବନ୍ଦ୍ବୀ ପାକିସ୍ତାନ ବିପକ୍ଷରେ ହ୍ୟାଟ୍ରିକ୍ ବିଜୟ ସହ ଭାରତ ନବମ ଥର ପାଇଁ ଏସିଆ କପ୍‌ ମୁକୁଟ ଜିତିଛି। କିନ୍ତୁ ମ୍ୟାଚ ପରେ ଭାରତୀୟ ଦଳ ପାକିସ୍ତାନ କ୍ରିକେଟ ବୋର୍ଡ (ପିସିବି) ଅଧ୍ୟକ୍ଷ ମୋହସିନ ନକଭିଙ୍କ ହାତରୁ ଟ୍ରଫି ନେବାକୁ ମନା କରିଥିଲା। ମ୍ୟାଚ ଶେଷ ହେବା ପରେ ମୋହସିନ ନକଭି ଟ୍ରଫି ଧରି ଷ୍ଟେଜରେ ଅପେକ୍ଷା କରୁଥିଲେ। କିନ୍ତୁ ଭାରତୀୟ ଖେଳାଳିମାନେ ସ୍ପଷ୍ଟ କରିଥିଲେ ଯେ ସେମାନେ ନକଭିଙ୍କ ହାତରୁ ଟ୍ରଫି ନେବେ ନାହିଁ। ନକଭି ଷ୍ଟେଜରୁ ନଓହ୍ଲେଇଲେ ଭାରତୀୟ ଦଳ ଷ୍ଟେଜକୁ ଯିବେ ନାହିଁ ବୋଲି କହିଥିଲେ। ଶେଷରେ ଭାରତୀୟ ଦଳ ଟ୍ରଫି ଗ୍ରହଣ ନ କରିବାକୁ ନିଷ୍ପତ୍ତି ନେଇଥିଲା।