Asia Cup 2025 Controversy: ବୟକଟରୁ ଟ୍ରଫି ଚୋରି ଯାଏଁ…ବିବାଦରେ ଏସିଆ କପ୍: ବେଇଜ୍ଜତ୍ ଭୁଲି ପାରିବନି ପାକିସ୍ତାନ…

ନୂଆଦିଲ୍ଲୀ: ଏସିଆ କପ୍ ୨୦୨୫ ଟାଇଟେଲ ଜିତିଲା ଭାରତ । ପ୍ରଥମ ଥର ପାଇଁ ଫାଇନାଲରେ ପାକିସ୍ତାନ ସହ ମୁହାଁମୁହିଁ ହୋଇଥିବା ଟିମ୍ ଇଣ୍ଡିଆ ୫ ୱିକେଟରେ ଟିମ୍ ପାକିସ୍ତାନକୁ ହରାଇ ନବମ ଥର ପାଇଁ ଏସିଆ ଦଖଲ କରିଛି ଭାରତ । ତେବେ ଟସ୍ ପଡିବା ଠାରୁ ଆରମ୍ଭ କରି ଫାଇନାଲରେ ଭାରତ ମୁକୁଟ ପିନ୍ଧିବା ପର୍ଯ୍ୟନ୍ତ ଅନେକ ବିବାଦ ଦ୍ୱାରା ପ୍ରଭାବିତ ହୋଇଛି ଏସିଆ କପ୍ ୨୦୨୫ । ଯାହା ଏଥରର ଟୁର୍ଣ୍ଣାମେଣ୍ଟକୁ ଶିରୋନାମାରେ ରଖିଥିଲା। ଯେଉଁଥିରେ ଭାରତ ବିଜୟର ଆଉ ଏକ ଫର୍ଦ୍ଦ ନିଜ ଖାତାରେ ଯୋଡିଥିବା ବେଳେ ପାକିସ୍ତାନକୁ କେବଳ ଅପମାନିତ ହେବାକୁ ପଡିଛି । ଯାହାକୁ କେବେ ଭୁଲିପାରିବେ ନାହିଁ ପାକ୍ ଖେଳାଳୀ । ଟୁର୍ଣ୍ଣାମେଣ୍ଟ ବୟକଟ ଠାରୁ ଆରମ୍ଭ କରି ହାତ ମିଳାଇବା ଏବଂ ଟ୍ରଫି ଚୋରି ପର୍ଯ୍ୟନ୍ତ ବେଇଜ୍ଜତ୍ ହୋଇଛି ପାକିସ୍ତାନ ।

ଟୁର୍ଣ୍ଣାମେଣ୍ଟ ଦୁବାଇକୁ ସ୍ଥାନାନ୍ତରିତ

ଏସିଆ କପ୍ ୨୦୨୫ ଭାରତରେ ଅନୁଷ୍ଠିତ ହେବାର ଥିଲା, କିନ୍ତୁ ପରେ ପିସିବି ମୁଖ୍ୟ ଏବଂ ଏସିସି ମୁଖ୍ୟ ମୋହସିନ ନକଭି ନିଶ୍ଚିତ କରିଥିଲେ କି ୟୁଏଇରେ ଖେଳାଯିବ। ଭାରତ ଏହି ଟୁର୍ଣ୍ଣାମେଣ୍ଟର ଆନୁଷ୍ଠାନିକ ଆୟୋଜକ ରହିବ, କିନ୍ତୁ ସେମାନେ ଦେଶରେ ମ୍ୟାଚ୍ ଆୟୋଜନ କରିବେ ନାହିଁ । କାରଣ ଆଇସିସି ଚାମ୍ପିଅନ୍ସ ଟ୍ରଫି ପୂର୍ବରୁ BCCI ଏବଂ PCB ରାଜି ହୋଇଥିଲେ ଯେ ଭାରତ ଏବଂ ପାକିସ୍ତାନ ୨୦୨୮ ପର୍ଯ୍ୟନ୍ତ ପରସ୍ପର ଦେଶରେ କୌଣସି ମ୍ୟାଚ୍ ଖେଳିବେ ନାହିଁ। ଆଉ ଏହା ବି ଚର୍ଚ୍ଚା ହେଉଥିଲା ଯେ BCCI ପାକିସ୍ତାନକୁ ବୟକଟ କରିବାକୁ ଏବଂ ନଖେଳିବାକୁ ନିଷ୍ପତ୍ତି ନେଇଛି । କିନ୍ତୁ ପରେ ଭାରତ ସରକାରଙ୍କ ନିର୍ଦ୍ଦେଶ ପରେ, ସେମାନେ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟ ଖେଳିବାକୁ ନିଷ୍ପତ୍ତି ନେଇଥିଲେ।

ପ୍ରଥମ ମୁକାବିଲାରେ ‘ନୋ ହ୍ୟାଣ୍ଡସେକ୍’

ସେପ୍ଟେମ୍ବର ୯ରୁ ଆରମ୍ଭ ହୋଇଥିବା ଏସିଆ କପ୍ ୨୦୨୫ରେ ଭାରତ ଏବଂ ପାକିସ୍ତାନ ମଧ୍ୟରେ ପ୍ରଥମ ମ୍ୟାଚ୍ ସେପ୍ଟେମ୍ବର ୧୪ ରେ ହୋଇଥିଲା। ଟସ୍ ସମୟରେ ଅଧିନାୟକ ସୂର୍ଯ୍ୟ ପାକିସ୍ତାନୀ ଅଧିନାୟକ ସଲମାନ ଅଲି ଆଗାଙ୍କ ସହ ହାତ ମିଳାଇ ନଥିଲେ। ମ୍ୟାଚ୍ ପରେ ମଧ୍ୟ ଟିମ୍ ଇଣ୍ଡିଆ ପାକିସ୍ତାନୀ ଖେଳାଳିଙ୍କ ସହ ହାତ ନମିଳାଇ ପାଭିଲିୟନକୁ ଫେରି ଯାଇଥିଲେ। ଏହା ପରେ ହିଁ ତେଜିଥିଲା ବିବାଦ । ହ୍ୟାଣ୍ଡସେକ୍ ବିବାଦକୁ ନେଇ ପରେ ଜଣାପଡ଼ିଥିଲା ପିସିବି ମ୍ୟାଚ୍ ରେଫରି ଆଣ୍ଡି ପାଇକ୍ରଫ୍ଟଙ୍କ ବିରୁଦ୍ଧରେ ଆଇସିସିରେ ଅଭିଯୋଗ ଦାଖଲ କରିଥିଲା। ସେମାନେ ଆଣ୍ଡିଙ୍କୁ ଏସିଆ କପ୍‌ରୁ ବାହାର କରିବାକୁ ଧମକ ଦେଇଥିଲେ, ନଚେତ୍ ପାକିସ୍ତାନ ଟୁର୍ଣ୍ଣାମେଣ୍ଟ ବର୍ଜନ କରିବ । ଆଉ ୟୁଏଇ ବିପକ୍ଷରେ ମ୍ୟାଚ୍ ଆରମ୍ଭ କରିବାରେ ବି ବିଳମ୍ବ କରିଥିଲା। ପରେ ପିସିବି ଏବଂ ଆଇସିସି ଆଲୋଚନା କରିଥିଲେ ଏବଂ ପାକିସ୍ତାନ ଖେଳିବା ଜାରି ରଖିଥିଲା। ପାକିସ୍ତାନ ଆଣ୍ଡି ପାଇକ୍ରଫ୍ଟଙ୍କ ସହିତ ଏକ କଥାବାର୍ତ୍ତାର ଭିଡିଓ ଜାରି କରିଥିଲା, ଯାହା ଅଡିଓ-ମୁକ୍ତ ଥିଲା। ଏହା ମଧ୍ୟ ଏକ ବଡ଼ ବିବାଦ ମଧ୍ୟ ସୃଷ୍ଟି କରିଥିଲା।

ଜରିମାନା ଭରିଲା ଉଭୟ ଭାରତ, ପାକିସ୍ତାନ

୨୧ ସେପ୍ଟେମ୍ବରରେ, ସୁପର ଓଭର ମ୍ୟାଚ୍ ସମୟରେ, ପାକିସ୍ତାନୀ ଖେଳାଳିମାନେ ଟିମ୍ ଇଣ୍ଡିଆ ସହିତ ଯୁକ୍ତିତର୍କ କରିବାକୁ ଚେଷ୍ଟା କରିଥିଲେ। ଏହି ସମୟରେ, ଅଭିଷେକ ଶର୍ମା, ଶାହିନ ଆଫ୍ରିଦି ଏବଂ ହାରିସ୍ ରୌଫଙ୍କ ସହିତ ଝଗଡ଼ା କରିଥିଲେ। ମ୍ୟାଚ୍ ସମୟରେ, ସାହିବଜାଦା ଫରହାନ ତାଙ୍କର ଅର୍ଦ୍ଧଶତକ ପୂରଣ କରିବା ପରେ ଏକ ‘ବନ୍ଧୁକ ଉତ୍ସବ’ କରିଥିଲେ ଏବଂ ହାରିସ୍ ରୌଫ ୬-୦ ଏବଂ ଏକ ଯୁଦ୍ଧ ବିମାନ ଆଡ଼କୁ ଇଙ୍ଗିତ କରିଥିଲେ। ଏହା ଦୁଇ ଦଳ ମଧ୍ୟରେ ଉତ୍ତେଜନା ବୃଦ୍ଧି କରିଥିଲା। ପରେ ଏହା ଉପରେ ଆକ୍ସନ ନେଇ ଅପମାନଜନକ ଭାଷା ବ୍ୟବହାର ଏବଂ ବିଭିନ୍ନ ଇଙ୍ଗିତ କରିବା ପାଇଁ ICC ହାରିସ୍ ରୌଫଙ୍କୁ ତାଙ୍କ ମ୍ୟାଚ୍ ଫିର ୩୦% ଜରିମାନା କରିଥିଲା। ଅନ୍ୟପଟେ କ୍ରିକେଟ୍ ସମୟରେ ସେନା ଏବଂ ଅପରେସନ୍ ସିନ୍ଦୁର ସହିତ ଜଡିତ ପ୍ରସଙ୍ଗ ଉଠାଇବା ପାଇଁ PCB ସୂର୍ଯ୍ୟକୁମାର ଯାଦବଙ୍କ ବିରୁଦ୍ଧରେ ଅଭିଯୋଗ ମଧ୍ୟ ଦାଖଲ କରିଥିଲା। ସୂର୍ଯ୍ୟଙ୍କୁ ମଧ୍ୟ ତାଙ୍କ ମ୍ୟାଚ୍ ଫିର ୩୦% ଜରିମାନା କରାଯାଇଥିଲା।

ଫାଇନାଲରେ ବି ଜାରି ରହିଥିଲା ତାତି

ଏସିଆ କପ୍ ଫାଇନାଲରେ ପୂରା ଯାତ୍ରାର ଉତ୍ତେଜନା ଜାରି ରହିଥିଲା । ଫାଇନାଲ୍ ପୂର୍ବରୁ, ଉଭୟ ଦେଶର ଅଧିନାୟକ ଟ୍ରଫି ସହିତ ଫଟୋସୁଟ୍ କରିବାର ନଜିର ରହିଥିବା ବେଳେ ଟିମ୍ ଇଣ୍ଡିଆ ଅଧିନାୟକ ସୂର୍ଯ୍ୟକୁମାର ଯାଦବ ଏଥିରେ ଅଂଶଗ୍ରହଣ କରି ନଥିଲେ। ପାକିସ୍ତାନ ମଧ୍ୟ ଟୁର୍ଣ୍ଣାମେଣ୍ଟ ସମୟରେ ଭାରତ ବିପକ୍ଷରେ ମ୍ୟାଚ୍ ପୂର୍ବରୁ ସାମ୍ବାଦିକ ସମ୍ମିଳନୀ ବାତିଲ କରିଥିଲା। ପରେ ଭାରତ ଫାଇନାଲରେ ବିଜୟୀ ହୋଇଥିଲା କିନ୍ତୁ ACC ଅଧ୍ୟକ୍ଷ ଏବଂ ପାକିସ୍ତାନୀ ମନ୍ତ୍ରୀ ମୋହସିନ ନକଭିଙ୍କଠାରୁ ଟ୍ରଫି ଗ୍ରହଣ କରିବାକୁ ମନା କରିଥିଲା। ପ୍ରେଜେଣ୍ଟେସନ ସମାରୋହ ସମୟରେ, ନକଭି ଟ୍ରଫି ପ୍ରଦାନ କରିବାକୁ ଅପେକ୍ଷା କରିଥିଲେ, କିନ୍ତୁ ଭାରତୀୟ ଖେଳାଳିମାନେ ଷ୍ଟେଜ୍ ପହଞ୍ଚି ନଥିଲେ । ତା’ପରେ ମୋହସିନ ଟ୍ରଫି ନିଜ ସହିତ ନେଇଯାଇଥିବା ଅଭିଯୋଗ କରିଛି ବିସିସିଆଇ। ଆଉ ଟିମ୍ ଇଣ୍ଡିଆ କପ୍ ବିନା ବିଜୟ ପାଳନ କରିଥିଲା ।