ଆଡିଲେଡ: ଅଷ୍ଟ୍ରେଲିଆ-ବର୍ଡର ଗାଭାସ୍କର ଟ୍ରଫିର ଦ୍ୱିତୀୟ ଟେଷ୍ଟରେ ଭାରତ ଶୋଚନୀୟ ଭାବେ ୧୦ ୱିକେଟରେ ଅଷ୍ଟ୍ରେଲିଆ ନିକଟରୁ ପରାଜିତ ହୋଇଛି । ଏଥିସହ ୫ ମ୍ୟାଚ ବିଶିଷ୍ଟ ସିରିଜ ୧-୧ ସମାନ ସ୍ଥିତିକୁ ଆସିଛି । ପର୍ଥ ଟେଷ୍ଟରେ ଭାରତ ୨୯୫ ରନରେ ବିଜୟ ହାସଲ କରିଥିଲା । ଭାରତ ଦ୍ୱିତୀୟ ଇନିଂସରେ ୧୭୫ ରନ କରି ଅଲଆଉଟ ହୋଇଯାଇଥିଲା । ନୀତିଶ ରେଡ୍ଡୀ(୪୨)ଙ୍କ ବ୍ୟତୀତ ଅନ୍ୟ କୌଣସି ବ୍ୟାଟ୍ସମ୍ୟାନ ଭଲ ପ୍ରଦର୍ଶନ କରିପାରି ନ ଥିଲେ । ୧୨୮/୫ରୁ ଭାରତୀୟ ଦଳ ବ୍ୟାଟିଂ ଆରମ୍ଭ କରି ୧୭୫ ରନରେ ଅଲଆଉଟ ହୋଇ ଯାଇଥିଲା । ୪୭ ରନରେ ଦଳ ବାକିଥିବା ୫ଟି ୱିକେଟ ହରାଇଥିଲା । ରିଷଭ ପନ୍ତ ୨୮, ଶୁଭମନ ଗିଲ ୨୮ ଓ ଯଶସ୍ୱୀ ଜୈସୱାଲ ୨୪ ରନ କରିଥିଲେ । ପ୍ୟାଟ କମିନ୍ସ ୫ଟି, ସ୍କଟ ବୋଲାଣ୍ଡ ୩ଟି ଓ ମିଚେଲ ଷ୍ଟାର୍କ ୨ଟି ୱିକେଟ ଅକ୍ତିଆର କରିଥିଲେ ।
ବିଜୟ ହାସଲ ପାଇଁ ଅଷ୍ଟ୍ରେଲିଆକୁ ୧୯ରନର ଟାର୍ଗେଟ ମିଳିଥିଲା । କୌଣସି ୱିକେଟ ନ ହରାଇ ଘରୋଇ ଦଳ ବିଜୟ ଲକ୍ଷ୍ୟ ହାସଲ କରିନେଇଥିଲା । ନାଥାନ ମ୍ୟାକ୍ସୱିନ ୧୦ ଓ ଉସମାନ ଖ୍ୱାଜା ୯ ରନ କରି ଅପରାଜିତ ରହିଥିଲେ । ପୂର୍ବରୁ ଭାରତର ପ୍ରଥମ ଇନିଂସ ସ୍କୋର ୧୮୦ ରନ ଜବାବରେ ଅଷ୍ଟ୍ରେଲିଆ ଟ୍ରେଭିସ ହେଡଙ୍କ ଆକର୍ଷଣୀୟ ଶତକ ଯୋଗୁ ୩୩୭ ରନ କରିଥିଲା । ହେଡ ପ୍ଲେୟାର ଅଫ ଦି ମ୍ୟାଚ ବିବେଚିତ ହୋଇଥିଲେ । ଡିସେମ୍ବର ୧୪ରୁ ଗାବାରେ ତୃତୀୟ ଟେଷ୍ଟ ଖେଳାଯିବ ।
Comments are closed.