ଲାହୋର: ପାକିସ୍ତାନ ସୁପର ଲିଗରେ ବାବର ଆଜମଙ୍କ ବିସ୍ଫୋରକ ବ୍ୟାଟିଂ ଜାରୀ ରହିଛି । ପେଶୱାର ଜାଲମୀର ଅଧିନାୟକ ବାବର ଏଥିସହ ଟି୨୦ କ୍ରିକେଟରେ ଇତିହାସ ରଚିଛନ୍ତି । ସେ ଏହି ଫର୍ମାଟରେ ଦ୍ରୁତ ୧୦ ହଜାର ରନ କରିବାରେ ରେକର୍ଡ କରିଛନ୍ତି । ସେ ବିରାଟ କୋହଲି ଓ କ୍ରିସ ଗେଲଙ୍କୁ ମଧ୍ୟ ପଛରେ ପକାଇ ଦେଇଛନ୍ତି । ଓଭରାଲ ୧୩ତମ ବ୍ୟାଟ୍ସମ୍ୟାନ ଭାବେ ସେ ଏହି କୀର୍ତିମାନ ସ୍ଥାପନ କରିଛନ୍ତି । ଗେଲ ୨୮୫ ଇନିଂସରେ ୧୦ ହଜାର ରନ କରି ଶୀର୍ଷରେ ରହିଥିଲେ । ବାବର ୨୭୧ ପାରୀରେ ତାଙ୍କୁ ପଛରେ ପକାଇ ଦେଇଛନ୍ତି । କୋହଲି ୨୯୯ ଇନିଂସରେ ୧୦ ହଜାର ରନ କରିଛନ୍ତି ।
ଏମାନଙ୍କ ପଛକୁ ଡେଭିଡ ୱାର୍ଣ୍ଣର (୩୨୭ ଇନିଂସ), ଆରୋନ ଫିଂଚ (୩୨୭ ଇନିଂସ) ଓ ଜୋସ ବଟଲର (୩୫୦ ଇନିଂସ) ରହିଛନ୍ତି । ବାବର ପାକିସ୍ତାନ ପକ୍ଷରୁ ୫୨ ଟେଷ୍ଟରେ ୪୫ରୁ ଊର୍ଦ୍ଧ୍ୱ ଆଭରେଜରେ ୩୮୯୮ ରନ କରିଛନ୍ତି । ସେହିପରି ୧୧୭ ଦିନିକିଆରେ ୫୭୨୯ ଓ ୧୦୩ ଟି୨୦ରେ ୩୬୯୮ ରନ କରିଛନ୍ତି । ୨୦୨୩ ଦିନିକିଆ ବିଶ୍ୱକପରେ ବାବରଙ୍କ ନେତୃତ୍ୱରେ ପାକିସ୍ତାନ ନୈରାଶ୍ୟଜନକ ପ୍ରଦର୍ଶନ କରିଥିଲା । ପରେ ସେ ଅଧିନାୟକ ପଦର ଇସ୍ତଫା ଦେଇଥିଲେ ।
Comments are closed.