ବାହାନଗା ଟ୍ରେନ ଦୁର୍ଘଟଣା: ସିଗନାଲରେ ଟାମ୍ପରିଂ ହୋଇଥିବା ରିପୋର୍ଟରେ ଦାବି

ଭୁବନେଶ୍ୱର: ବାହାନଗା ଟ୍ରେନ୍ ଦୁର୍ଘଟଣାର କାରଣ କ’ଣ ? ସିବିଆଇ ଏହାର ତଦନ୍ତ ଜାରି ରଖିଥିବା ବେଳେ ଏବେ ସ୍ୱୟଂଚାଳିତ ସିଗନାଲ୍ ସିଷ୍ଟମର ସନ୍ଦିଗ୍ଧ ମାନୁଆଲ୍ ବାଇପାସ୍ ଉପରେ କେନ୍ଦ୍ରୀତ ହୋଇଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ଦୁର୍ଘଟଣା ପୂର୍ବରୁ କୌଣସି କାରଣରୁ ସ୍ୱୟଂଚାଳିତ ସିଗନାଲିଂ ସିଷ୍ଟମ ଟାମ୍ପରିଂ ହୋଇଛି କି ନାହିଁ ତାହା ତଦନ୍ତକାରୀ ଅଧିକାରୀମାନେ ବର୍ତ୍ତମାନ ଜାଣିବାକୁ ଚେଷ୍ଟା କରୁଛନ୍ତି। ଟ୍ରେନ୍ କେଉଁ ଟ୍ରାକ୍ ଦେଇ ଯିବ ତାହା ସ୍ୱୟଂଚାଳିତ ସିଗନାଲ୍ ସିଷ୍ଟମ୍ ସ୍ଥିର କରିଥାଏ।

ସୂତ୍ରରୁ ପ୍ରକାଶ ଯେ ତଦନ୍ତକାରୀମାନେ ଜାଣିବାକୁ ପାଇଛନ୍ତି ଯେ ସେହି ଟ୍ରାକ୍ ଉପରେ ଏକ୍ସପ୍ରେସ ଟ୍ରେନ୍ ଯାଇଥିଲା ଯେଉଁଠାରେ ପୂର୍ବରୁ ମାଲଗାଡି ଛିଡା ହୋଇଥିଲା। ରେଳ ସୁରକ୍ଷା ଆୟୋଗର ତଦନ୍ତକାରୀମାନେ ସନ୍ଦେହ କରୁଛନ୍ତି ଯେ ରେଳ କର୍ମଚାରୀମାନେ ନିକଟସ୍ଥ ରେଲଓ୍ବେ କ୍ରସିଂ ବା ଫାଟକ ଦେଇ ଯିବାଆସିବା ବନ୍ଦ କରିବାରେ ବ୍ୟବହୃତ ତ୍ରୁଟିପୂର୍ଣ୍ଣ ସମସ୍ୟା ଯୋଗୁଁ ରେଳ କର୍ମଚାରୀମାନେ ସିଗନାଲ ସିଷ୍ଟମ୍କୁ ବାଇପାସ୍ କରିଥିଲେ ବା ଟାମ୍ପରିଂ କରିଥିଲେ। ଅର୍ଥାତ ନିଜକୁ ସୁହାଇଲାଭଳି ଏକ ବ୍ୟବସ୍ଥା ଆପଣାଇଥିଲେ। ତଦନ୍ତ କମିଶନର ତିନି ଅଧିକାରୀଙ୍କ ମଧ୍ୟରୁ ଦୁଇ ଜଣ ଏହିପରି ବିଶ୍ବାସ କରୁଛନ୍ତି। କିନ୍ତୁ ଗଣମାଧ୍ୟମରେ ସେମାନେ କହିବା ପାଇଁ ଅଧିକୃତ ନୁହେଁ ତେଣୁ ସେମାନେ ତାଙ୍କ ନାମ ଗୋପନ ରଖି ଏହି ସୂଚନା ଦେଇଥିବା ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି।

ଜୁନ୍ ୨ ରେ ବାହାନଗା ବଜାର ଷ୍ଟେସନରେ ଘଟିଥିବା ଏହି ଦୁର୍ଘଟଣାରେ ଅତି କମରେ ୨୮୮ ଜଣଙ୍କର ମୃତ୍ୟୁ ଘଟିଛି। ଏଥିସହ ଏହି ଭୟଙ୍କର ଦୁର୍ଘଟଣାରେ ୧୦୦୦ ରୁ ଅଧିକ ଆହତ ହୋଇଛନ୍ତି। ଦୁଇ ଦଶନ୍ଧି ମଧ୍ୟରେ ଏହା ଦେଶର ସବୁଠାରୁ ଖରାପ ଟ୍ରେନ୍ ଦୁର୍ଘଟଣା।

ଭାରତୀୟ ଏବଂ ଆନ୍ତର୍ଜାତୀୟ ଗଣମାଧ୍ୟମ ରିପୋର୍ଟ କରିସାରିଛି ଯେ ସ୍ୱୟଂଚାଳିତ ସିଗନାଲିଂ ସିଷ୍ଟମରେ ସମ୍ଭାବ୍ୟ ତ୍ରୁଟି ହେତୁ ଏହି ଦୁର୍ଘଟଣା ଘଟିଥାଇପାରେ। ଭାରତୀୟ ରେଳ ମୁଖପାତ୍ର କହିଛନ୍ତି ଯେ ଆବଶ୍ୟକତା ଅନୁଯାୟୀ ମରାମତି କାର୍ଯ୍ୟ କରାଯାଉଛି, କିନ୍ତୁ ସ୍ୱୟଂଚାଳିତ ସିଷ୍ଟମକୁ ଟାମ୍ପରିଂ କରିବାକୁ ଅନୁମତି ନାହିଁ। ଘଟଣାର କାରଣ ସମ୍ପର୍କରେ ସେ ସ୍ପଷ୍ଟ ନକହି କହିଛନ୍ତି ଯେ ତଦନ୍ତ ଜାରି ରହିଛି।

ରେଳ ମନ୍ତ୍ରଣାଳୟର ମୁଖ୍ୟ ସୂଚନା ଅଧିକାରୀ ଅମିତାଭ ଶର୍ମା କହିଛନ୍ତି ଯେ ଦୁର୍ଘଟଣାର କାରଣ ଅନୁସନ୍ଧାନ କରାଯାଉଛି। ତଦନ୍ତକାରୀ ସନ୍ଦେହ ବିଷୟରେ ପଚରାଯିବାରୁ ସେ କହିଥିଲେ ଯେ ଇଲେକ୍ଟ୍ରୋନିକ୍ ସିଷ୍ଟମକୁ ହସ୍ତକୃତ ଭାବରେ ବାଇପାସ୍ କରାଯାଇପାରିବ। ଶର୍ମା କହିଛନ୍ତି, ଏସବୁ କଳ୍ପନାଜଳ୍ପନା ଯାହାକୁ ଆମେ ବର୍ତ୍ତମାନ ସୁଦ୍ଧା ନିଶ୍ଚିତ କରିପାରିବୁ ନାହିଁ।

ବାହାନାଗା ଗାଁର ପାଞ୍ଚ ଜଣ କହିଛନ୍ତି ଯେ ରେଲଓ୍ବେ କ୍ରସିଂରେ ଥିବା ପ୍ରତିବନ୍ଧକ ତିନିମାସ ଧରି ଖରାପ ରହିଥିଲା ​​ଏବଂ ବାରମ୍ବାର ମରାମତି କରାଯାଉଥିଲା। ସେ କହିଛନ୍ତି ଯେ ଯେତେବେଳେ ତ୍ରୁଟି ଦେଖାଦେଇଥିଲା, ପ୍ରତିବନ୍ଧକ ବନ୍ଦ ଅବସ୍ଥାରେ ଅଟକି ରହିଥିଲା ​​ଏବଂ ରେଳ କର୍ମଚାରୀମାନେ ଏହାକୁ ମାନୁଆଲ ଭାବରେ ବ୍ୟବହାର କରୁଥିଲେ।