ଫୁଲବାଣୀ: ଗୋଟିଏ ସମୟ ଥିଲା ଯେତେବେଳେ କନ୍ଧମାଳରେ ପକ୍ଷୀ ମାନଙ୍କ ଭଳି ବାଦୁଡ଼ି ଦେଖିବା ମଧ୍ୟ ଅତି ସାଧାରଣ କଥା ଥିଲା । ଏଠାରେ ଦିନ ସମୟରେ ବଡୁଡି ମାନେ ଗଛ ଉପରେ ଶୋଇ ରହିଥିବା ନଜର ଆସୁଥିଲେ । କିନ୍ତୁ ବର୍ତ୍ତମାନ ଏହି ଦୃଶ୍ୟ ଦେଖିବା ଦୁର୍ଲଭ ହୋଇ ଗଲାଣି ।
କନ୍ଧମାଳର ଅନୁକୂଳ ପରିବେଶ ପାଇଁ ବାଦୁଡ଼ିମାନେ ଏଠାରେ ରହିବାକୁ ଭଲ ପାଇଥାନ୍ତି। ବିଶେଷତଃ ନିଛାଟିଆ ସ୍ଥାନରେ ଥିବା ବଡ଼ ବଡ଼ ଗଛ, ପୁରୁଣା ପୋଲ, ଅନ୍ଧାରୁଆ ଘର ଓ ପାହାଡ଼ ଗୁମ୍ପା ଗୁଡିକ ବାଦୁଡ଼ିମାନଙ୍କ ପାଇଁ ସୁରକ୍ଷିତ ବାସସ୍ଥାନ ଥିଲା ।
ଜିଲ୍ଲାର ଦାରିଙ୍ଗବାଡ଼ି, ରାଇକିଆ, କୋଟଗଡ଼, ବେଲଘର, ତୁମୁଡ଼ିବନ୍ଧ ଆଜି ସ୍ଥାନମାନଙ୍କରେ ଅଧିକ ସଂଖ୍ୟାରେ ବାଦୁଡ଼ି ରହନ୍ତି। ହେଲେ ଜିଲ୍ଲା ସଦର ମହକୁମା ଫୁଲବାଣୀ ସହରରେ ସବୁଠାରୁ ଅଧିକ ସଂଖ୍ୟାରେ ବାଦୁଡ଼ି ଦେଖିବାକୁ ମିଳିଥାଏ।
ଗଣମାଧ୍ୟମର ରିପୋର୍ଟ ଅନୁସାରେ ଜଙ୍ଗଲ ଅବକ୍ଷୟ ଓ ଜଙ୍ଗଲରେ ଖାଦ୍ୟ ଭାବ ଯୋଗୁଁ ଜିଲ୍ଲାରେ ପୂର୍ବଭଳି ଆଉ ବାଦୁଡ଼ି ଦେଖିବାକୁ ମିଳୁ ନାହାନ୍ତି। ଅବାଧ ଶିକାର ମଧ୍ୟ ଏହାର ଏକ ବଡ କାରଣ । ଏହାର ମାଂସରେ ଔଷଧୀୟ ଗୁଣ ଥିବା ଯୋଗୁଁ ଅନେକ ଲୋକ ଏହାର ମାଂସ ଖାଇଥାନ୍ତି । ଶିକାରୀମାନେ ଫାଶ ପକାଇ ଓ ବିଷ ଦେଇ ବାଦୁଡ଼ି ଶିକାର କରୁଛନ୍ତି।
ଏହାଛଡା ବାଦୁଡ଼ି ମାଂସର ସ୍ବାଦ କୁଆଡ଼େ ନିଆରା ବୋଲି ଲୋକେ କହନ୍ତି। ଶିକାରୀ ସ୍ଥାନୀୟ ଅଞ୍ଚଳରେ ଗୋଟାକୁ ୫ଶହ ଟଙ୍କାରେ ବିକୁଥିବା ବେଳେ ବାହାରକୁ ପାଠାଇଲେ ହଜାର ଟଙ୍କା କି ତାଠାରୁ ଅଧିକ ନେଇଥାଆନ୍ତି।