ସେଲସ ମ୍ୟାନ୍‌‌ ସାଜିଥିଲେ ଚୋର;ମିଳିଲା ୧୩୬ଟି ମୋବାଇଲ୍‌‌ ଫୋନ୍‌‌

ବ୍ରହ୍ମପୁର: ଯେଉଁ କମ୍ପାନିରେ ସେଲସ ମ୍ୟାନ୍‌‌ ଭାବେ କାର୍ଯ୍ୟ କରୁଥିଲେ, ଶେଷରେ ସେଇ କମ୍ପାନିରୁ ହିଁ ଚୋରି କଲେ। ପୋଲିସ ହାତରେ ଧରାପଡ଼ିଲେ। ପାଖରୁ ମିଳିଲା ୧୩୬ଟି ମୋବାଇଲ ଫୋନ୍‌‌। ବ୍ରହ୍ମପୁରରେ ଏଭଳି ଘଟଣା ଦେଖିବାକୁ ମିଳିଛି।
ଗୋଷାଣିନୂଆଗାଁ ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥ କଡ଼ରେ ରହିଛି ହାଇଭିଲୁପ୍‌‌ ଲଜିଷ୍ଟିକ୍ସ ପ୍ରାଇଭେଟେ ଲିମିଟେଡ ନାମକ ଏକ ମୋବାଇଲ କମ୍ପାନିର ଗୋଦାମ୍‌‌। ଗତ ୧୫ ତାରିଖ ବିଳମ୍ବିତ ରାତିରେ ଗୋଦାମର ସଟରକୁ ଖୋଲି କେହି ଦୁର୍ବୃତ୍ତ ବିପୁଳ ପରିମାଣରେ ମୋବାଇଲ ଚୋରି କରିନେଇଥିଲେ। ୧୬ ତାରିଖ ସକାଳେ ଗୋଦାମ ଖୋଲିବା ପରେ ଏହା ଜଣାପଡ଼ିଥିଲା। ଗୋଦାମ ଭିତରୁ ୧୩୬ଟି ନୂଆଁ ଫୋନ୍‌‌ ଏବଂ ୪ଟି ଚାର୍ଜର ଚୋରି ହୋଇଯାଇଥିଲା। ଏନେଇ ମ୍ୟାନେଜର ବିରୁପାକ୍ଷ ଦାସ ଗୋଷାଣିନୂଆଗାଁ ଥାନାରେ ଅଭିଯୋଗ କରିଥିଲେ। ପୋଲିସ ୯/୨୩ରେ ଏକ ମାମଲା ରୁଜୁ କରିଥିଲା। ତଦନ୍ତ ବେଳେ ସେଠାରେ କାର୍ଯ୍ୟ କରୁଥିବା ସେଲସ ମ୍ୟାନେଜର ଜି.ନରେଶ(୨୧) ତାଙ୍କ ସାଙ୍ଗ ଏସ.ଅଜୟ କୁମାର(୨୨)ଙ୍କ ସହଯୋଗରେ ଚୋରି କରିଥିବା ଜଣାପଡ଼ିଥିଲା। ଉଭୟଙ୍କୁ ପୋଲିସ ଗିରଫ ସହିତ ତାଙ୍କ ପାଖରୁ ଚୋରି ୧୩୬ଟି ମୋବାଇଲ ଫୋନ ଏବଂ ଚାର୍ଜର ଜବତ କରିଛି। ଗିରଫ ପରେ ଉଭୟଙ୍କୁ କୋର୍ଟ ଚାଲାଣ କରାଯାଇଥିବା ବ୍ରହ୍ମପୁର ଏସପି ଡା.ସର୍ବଣା ବିବେକ ଏମ୍‌‌ ସୂଚନା ଦେଇଛନ୍ତି।