ଅଫିସରଙ୍କୁ ମାଡ ଘଟଣା-ନିନ୍ଦା କଲେ ଅପରାଜିତା

ଭୁବନେଶ୍ୱର : ବିଏମସି ଅଫିସରେ ଅତିରିକ୍ତ କମିଶନର ରତ୍ନାକର ସାହୁଙ୍କୁ ମାଡ ଘଟଣା ଏବେ ସାରା ରାଜ୍ୟରେ ଚହଳ ପକାଇଛି । ଗତକାଲି ହୋଇଥିବା ଏହି ଘଟଣାକୁ ଘୋର ନିନ୍ଦା କରିଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ । ରତ୍ନାକର ସାହୁ ଜନଶୁଣାଣିରେ ଲୋକଙ୍କ କଥା ଶୁଣୁଥିଲେ । ସରକାରୀ କାମରେ ଥିବା ବେଳେ ତାଙ୍କୁ ୪ ରୁ ୬ ଆସି ଆକ୍ରମଣ କଲେ । ଏହି ଘଟଣାକୁ ମୁଁ ନିନ୍ଦା କରୁଛି ବୋଲି ସାଂସଦ ଅପରାଜିତା ଷଡଙ୍ଗୀ କହିଛନ୍ତି । ମୁଁ ମୋର ୬ ବର୍ଷର ରାଜନୀତି କ୍ୟାରିୟରରେ ଏମିତି ଘଟଣା ଦେଖିନାହିଁ ବୋଲି ସେ କହିଛନ୍ତି । ମୋର ବିଶ୍ୱାସ ଅଛି ଯିଏ ଏଥିରେ ସମ୍ପୃକ୍ତ ଅଛନ୍ତି ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଆଉ ଦୋଷୀକୁ ଏମିତି ଦଣ୍ଡ ମିଳୁ ଯାହା ଦ୍ୱାରା ଏହି ଘଟଣାର ଆଉ ପୁନରାବୃତି ହେବ ନାହିଁ । ଓଡିଶା ଏକ ଶାନ୍ତିପ୍ରିୟ ରାଜ୍ୟ, ଏଠାକାର ଲୋକ ବହୁତ ଭଲ ଚିନ୍ତାଧାର ମଣିଷ । ତେଣୁ ଏମିତି ଘଟଣା ହେଲେ ସମସ୍ତ ଓଡିଶାବାସୀ ମର୍ମାହତ ହୋଇପଡନ୍ତି ବୋଲି ଅପରାଜିତା କହିଛନ୍ତି । ତେବେ ଏହି ଘଟଣାରେ ପୋଲିସ ସଠିକରୂପେ କାମ କରିବ ବୋଲି ମୋର ବିଶ୍ୱାସ ଥିବା ସେ କହିଛନ୍ତି ।