ଭୁବନେଶ୍ୱର: ଓଦା, ଶୁଖିଲା ଅଲଗା ଅଲଗା କରିନଦେଲେ ବିଏମସି ଅଳିଆ ଗାଡି ବର୍ଜ୍ୟବସ୍ତୁକୁ ଗ୍ରହଣ କରିବ ନାହିଁ। କଠିନ ବର୍ଜ୍ୟବସ୍ତୁ ପରିଚାଳନାରେ ଉନ୍ନତି ଆଣିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ ଭୁବନେଶ୍ୱର ମହାନଗର ନିଗମ ପକ୍ଷରୁ ଶୁକ୍ରବାର ଏହି ଘୋଷଣା କରାଯାଇଛି । ଏହି ପୃଥକୀକରଣ ଦ୍ୱାରା ବାୟୋମିଥେନ୍ ପ୍ଲାଣ୍ଟ ପାଇଁ କଞ୍ଚାମାଲ ଭାବେ କାମ କରୁଥିବା ଓଦା ଆବର୍ଜନାକୁ ଶୁଖିଲା ବର୍ଜ୍ୟବସ୍ତୁଠାରୁ ଅଲଗା କରି ପ୍ରକ୍ରିୟାକରଣ କରାଯିବ।
ଏବେଠାରୁ ଆଉ ପୃଥକୀକରଣ ହୋଇନଥିବା ବର୍ଜ୍ୟବସ୍ତୁକୁ ଗ୍ରହଣ କରାଯିବ ନାହିଁ। ଏହି ନିଷ୍ପତ୍ତିର ଉଦ୍ଦେଶ୍ୟ ହେଉଛି ଦୈନିକ ୫୦ ଟନ୍ କ୍ଷମତା ବିଶିଷ୍ଟ ୪ଟି ବାୟୋ-ମିଥେନ୍ ଗ୍ୟାସ୍ ପ୍ଲାଣ୍ଟର କାର୍ଯ୍ୟକ୍ଷମ ପରିଚାଳନାକୁ ସୁଗମ କରିବା।
ବର୍ଜ୍ୟବସ୍ତୁ ପରିଚାଳନାକୁ ପ୍ରୋତ୍ସାହିତ କରିବା ପାଇଁ ବିଏମସି ପ୍ରତିଶ୍ରୁତିବଦ୍ଧ ଏବଂ ନାଗରିକମାନଙ୍କୁ ସେମାନଙ୍କ ବର୍ଜ୍ୟବସ୍ତୁକୁ ଦୁଇଟି ବର୍ଗରେ ବିଭକ୍ତ କରିବା ପାଇଁ ପ୍ରୋତ୍ସାହିତ କରିବା ପାଇଁ ବିଏମସି ଏହି ପଦକ୍ଷେପ ନେଇଛି।
ଭୁବନେଶ୍ୱର ଉପକଣ୍ଠରେ ୪ଟି ନିର୍ଦ୍ଧାରିତ ସ୍ଥାନରେ ପିପିପି ମୋଡରେ ପ୍ରତିଷ୍ଠା ହେବାକୁ ଥିବା ଏହି ବାୟୋମିଥେନ୍ ପ୍ଲାଣ୍ଟରେ ଓଦା ବର୍ଜ୍ୟବସ୍ତୁକୁ ବାୟୋମିଥେନ୍ ଗ୍ୟାସରେ ଓ ବଳକା ବର୍ଜ୍ୟବସ୍ତୁକୁ ସିମେଣ୍ଟରେ ପରିଣତ କରାଯିବ। ଏହି ପରିବର୍ତ୍ତନ ପ୍ରକ୍ରିୟା ସହରର ଅଙ୍ଗାରକାମ୍ଳକୁ ହ୍ରାସ କରିବା ଦିଗରେ ପ୍ରୋତ୍ସାହିତ କରିବ ବୋଲି ବିଶ୍ବାସ ରଖିଛି ବିଏମସି।
ବିଏମସି କମିସନର୍ ବିଜୟ ଅମୃତା କୁଲାଙ୍ଗେ ବାୟୋମିଥେନ୍ ପ୍ଲାଣ୍ଟର ପ୍ରଭାବୀ କାର୍ଯ୍ୟ ପାଇଁ ପୃଥକୀକରଣ ଉପରେ ଗୁରୁତ୍ୱାରୋପ କରିଥିଲେ। ସେ କହିଥିଲେ ଯେ କଠିନ ବର୍ଜ୍ୟବସ୍ତୁ ପରିଚାଳନାକୁ ନେଇ ଆମେ ବହୁତ ଗମ୍ଭୀର ଅଛୁ। ସରକାର ଆମକୁ ୨୦୦ ଟିପିଡି କ୍ଷମତା ବିଶିଷ୍ଟ ବାୟୋଗ୍ୟାସ ପ୍ଲାଣ୍ଟ ସ୍ଥାପନ ପାଇଁ ଅନୁମତି ଦେଇଛନ୍ତି। ଆମେ ୫୦ ଟିପିଡି କ୍ଷମତା ବିଶିଷ୍ଟ ୪ଟି ପ୍ଲାଣ୍ଟ ପାଇଁ ଟେଣ୍ଡର ଆହ୍ୱାନ କରିସାରିଛୁ। ଓଦା ଟାଇପର ଅଳିଆକୁ ସେଠାରେ ପ୍ରୋସେସିଂ କରାଯିବ। ଏହି ବାୟୋଗ୍ୟାସ୍ ପ୍ଲାଣ୍ଟଗୁଡ଼ିକର ପୂର୍ବ ସର୍ତ୍ତ ହେଉଛି ପୃଥକୀକରଣ। ଯଦି ଆମ ନାଗରିକମାନେ ସେମାନଙ୍କ ଅଳିଆ ଆବର୍ଜନାକୁ ଅଲଗା ନକରନ୍ତି, ତେବେ ଏହା ପ୍ଲାଣ୍ଟଗୁଡ଼ିକରେ ତ୍ରୁଟି ସୃଷ୍ଟି କରିବ।
ବିଏମସି ମେୟର ସୁଲୋଚନା ଦାସ ବର୍ଜ୍ୟବସ୍ତୁ ପୃଥକୀକରଣ ନେଇ ଭୁବନେଶ୍ୱର ବାସୀଙ୍କ ମଧ୍ୟରେ ବଢ଼ୁଥିବା ସଚେତନତାକୁ ପ୍ରଶଂସା କରିଥିଲେ। ସେ କହିଥିଲେ ଯେ ଭୁବନେଶ୍ୱରବାସୀ ଆବର୍ଜନାକୁ ଅଲଗା କରିବାର ଉପଯୋଗିତା ବିଷୟରେ ଅବଗତ ହୋଇଛନ୍ତି। ସେମାନେ ଅଳିଆ ଆବର୍ଜନାକୁ ଅଲଗା କରୁଛନ୍ତି। ତେଣୁ ଆମେ ଏବେ ୫୦ ଟିପିଡି କ୍ଷମତା ବିଶିଷ୍ଟ ୪ଟି ବାୟୋ ମିଥେନ ପ୍ଲାଣ୍ଟ ପ୍ରତିଷ୍ଠା କରିବାକୁ ଯାଉଛୁ। ପ୍ଲାଣ୍ଟରେ ଥିବା ମେସିନରେ କେବଳ ପୃଥକ ପୃଥକ ଅଳିଆ ଆସିବ।
Comments are closed.